| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
အသာဓာရဏပာရာဇိကံ
Asādhāraṇapārājikaṃ
၅. ဥဗ္ဘဇာဏုမဏ္ဍလသိက္ခာပဒဝဏ္ဏနာ
5. Ubbhajāṇumaṇḍalasikkhāpadavaṇṇanā
ဥဗ္ဘကပ္ပရန္တိ ဒုတိယမဟာသန္ဓိတော ဥဒ္ဓံ။ ဣတော စိတော စ သဉ္စရဏန္တိ ဟတ္ထသ္သ ဝာ ကာယသ္သ ဝာ တိရိယံ ဣတော စိတော စ သဉ္စရဏံ။
Ubbhakapparanti dutiyamahāsandhito uddhaṃ. Ito cito ca sañcaraṇanti hatthassa vā kāyassa vā tiriyaṃ ito cito ca sañcaraṇaṃ.
ဧကတောအဝသ္သုတေတိ (ပာစိ. အဋ္ဌ. ၆၆၂) ဘိက္ခုနိယာ အဝသ္သဝေ, ဘိက္ခုနိယာ ကာယသံသဂ္ဂရာဂေန အဝသ္သုတဘာဝေ သတီတိ အတ္ထော။ ဘိက္ခုနိယာ ဝသေနေဝ စ ဧကတောအဝသ္သုတဘာဝော ဂဟေတဗ္ဗော။ ဝုတ္တဉ္ဟေတံ သမန္တပာသာဒိကာယံ (ပာစိ. အဋ္ဌ. ၆၆၂) –
Ekatoavassuteti (pāci. aṭṭha. 662) bhikkhuniyā avassave, bhikkhuniyā kāyasaṃsaggarāgena avassutabhāve satīti attho. Bhikkhuniyā vaseneva ca ekatoavassutabhāvo gahetabbo. Vuttañhetaṃ samantapāsādikāyaṃ (pāci. aṭṭha. 662) –
‘‘ဧကတောအဝသ္သုတေတိ ဧတ္ထ ကိဉ္စာပိ ‘ဧကတော’တိ အဝိသေသေန ဝုတ္တံ, တထာပိ ဘိက္ခုနိယာ ဧဝ အဝသ္သုတေ သတိ အယံ အာပတ္တိဘေဒော ဝုတ္တောတိ ဝေဒိတဗ္ဗော’’တိ။
‘‘Ekatoavassuteti ettha kiñcāpi ‘ekato’ti avisesena vuttaṃ, tathāpi bhikkhuniyā eva avassute sati ayaṃ āpattibhedo vuttoti veditabbo’’ti.
ပုရိသသ္သ ကာယန္တိ ပုရိသသ္သ ယံ ကဉ္စိ ကာယံ။ ဥဘတောအဝသ္သုတေပီတိ ဘိက္ခုနိယာ စေဝ ပုရိသသ္သ စ ကာယသံသဂ္ဂရာဂေန အဝသ္သုတဘာဝေ သတိပိ။ ကာယေနာတိ ယထာပရိစ္ဆိန္နေန အတ္တနော ကာယေန။ ကာယပ္ပဋိဗဒ္ဓန္တိ ပုရိသသ္သ ကာယပ္ပဋိဗဒ္ဓံ။ အဝသေသကာယေန ဝာတိ ယထာပရိစ္ဆိန္နကာယတော အဝသေသေန ကာယေန, ဥဗ္ဘက္ခကအဓောဇာဏုမဏ္ဍလအဓောကပ္ပရသင္ခာတေန ကာယေနာတိ ဝုတ္တံ ဟောတိ။ တသ္သ ကာယန္တိ အဝသ္သုတသ္သ တသ္သ ပုရိသသ္သ ယံ ကဉ္စိ ကာယံ။ ယထာ စေတ္ထ သယံ အာမသန္တိယာ ထုလ္လစ္စယံ, ဧဝံ တသ္သ အာမသနံ သာဒိယန္တိယာပီတိ ဒဋ္ဌဗ္ဗံ။ ပုရိသသ္သ ကာယသံသဂ္ဂရာဂော နတ္ထီတိ ပုရိသသ္သ မေထုနရာဂော, ဂေဟသိတပေမံ, သုဒ္ဓစိတ္တံ ဝာ။ အဝသေသေတိ ပာရာဇိကခေတ္တတော အဝသေသေ။ ကာယပ္ပဋိဗဒ္ဓေန ကာယပ္ပဋိဗဒ္ဓာဒိဘေဒေတိ ‘‘ကာယပ္ပဋိဗဒ္ဓေန ကာယပ္ပဋိဗဒ္ဓံ အာမသတိ, အာပတ္တိ ဒုက္ကဋသ္သာ’’တိအာဒိကေ (ပာစိ. ၆၅၉, ၆၆၂) သဗ္ဗဝာရေ။ ‘‘အသဉ္စိစ္စာ’’တိအာဒီသု ဝိရဇ္ဈိတ္ဝာ ဝာ အာမသန္တိယာ, အညဝိဟိတာယ ဝာ, ‘‘အယံ ပုရိသော’’တိ ဝာ ‘‘ဣတ္ထီ’’တိ ဝာ အဇာနန္တိယာ ဝာ, တေန ဖုဋ္ဌာယပိ တံ ဖသ္သံ အသ္သာဒယန္တိယာ ဝာ အာမသနေပိ သတိ အနာပတ္တိ။
Purisassa kāyanti purisassa yaṃ kañci kāyaṃ. Ubhatoavassutepīti bhikkhuniyā ceva purisassa ca kāyasaṃsaggarāgena avassutabhāve satipi. Kāyenāti yathāparicchinnena attano kāyena. Kāyappaṭibaddhanti purisassa kāyappaṭibaddhaṃ. Avasesakāyena vāti yathāparicchinnakāyato avasesena kāyena, ubbhakkhakaadhojāṇumaṇḍalaadhokapparasaṅkhātena kāyenāti vuttaṃ hoti. Tassa kāyanti avassutassa tassa purisassa yaṃ kañci kāyaṃ. Yathā cettha sayaṃ āmasantiyā thullaccayaṃ, evaṃ tassa āmasanaṃ sādiyantiyāpīti daṭṭhabbaṃ. Purisassa kāyasaṃsaggarāgo natthīti purisassa methunarāgo, gehasitapemaṃ, suddhacittaṃ vā. Avaseseti pārājikakhettato avasese. Kāyappaṭibaddhena kāyappaṭibaddhādibhedeti ‘‘kāyappaṭibaddhena kāyappaṭibaddhaṃ āmasati, āpatti dukkaṭassā’’tiādike (pāci. 659, 662) sabbavāre. ‘‘Asañciccā’’tiādīsu virajjhitvā vā āmasantiyā, aññavihitāya vā, ‘‘ayaṃ puriso’’ti vā ‘‘itthī’’ti vā ajānantiyā vā, tena phuṭṭhāyapi taṃ phassaṃ assādayantiyā vā āmasanepi sati anāpatti.
ဥဗ္ဘဇာဏုမဏ္ဍလသိက္ခာပဒဝဏ္ဏနာ နိဋ္ဌိတာ။
Ubbhajāṇumaṇḍalasikkhāpadavaṇṇanā niṭṭhitā.
