| Library / Tipiṭaka / ತಿಪಿಟಕ • Tipiṭaka / ಥೇರೀಗಾಥಾ-ಅಟ್ಠಕಥಾ • Therīgāthā-aṭṭhakathā |
೪. ತಿಸ್ಸಾಥೇರೀಗಾಥಾವಣ್ಣನಾ
4. Tissātherīgāthāvaṇṇanā
ತಿಸ್ಸೇ ಸಿಕ್ಖಸ್ಸು ಸಿಕ್ಖಾಯಾತಿ ತಿಸ್ಸಾಯ ಸಿಕ್ಖಮಾನಾಯ ಗಾಥಾ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರಾ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಂ ಕುಸಲಂ ಉಪಚಿನಿತ್ವಾ ಸಮ್ಭತಕುಸಲಪಚ್ಚಯಾ ಇಮಸ್ಮಿಂ ಬುದ್ಧುಪ್ಪಾದೇ ಕಪಿಲವತ್ಥುಸ್ಮಿಂ ಸಕ್ಯರಾಜಕುಲೇ ನಿಬ್ಬತ್ತಿತ್ವಾ ವಯಪ್ಪತ್ತಾ ಬೋಧಿಸತ್ತಸ್ಸ ಓರೋಧಭೂತಾ ಪಚ್ಛಾ ಮಹಾಪಜಾಪತಿಗೋತಮಿಯಾ ಸದ್ಧಿಂ ನಿಕ್ಖಮಿತ್ವಾ ಪಬ್ಬಜಿತ್ವಾ ವಿಪಸ್ಸನಾಯ ಕಮ್ಮಂ ಕರೋತಿ। ತಸ್ಸಾ ಸತ್ಥಾ ಹೇಟ್ಠಾ ವುತ್ತನಯೇನೇವ ಓಭಾಸಂ ವಿಸ್ಸಜ್ಜೇತ್ವಾ –
Tisse sikkhassu sikkhāyāti tissāya sikkhamānāya gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinitvā sambhatakusalapaccayā imasmiṃ buddhuppāde kapilavatthusmiṃ sakyarājakule nibbattitvā vayappattā bodhisattassa orodhabhūtā pacchā mahāpajāpatigotamiyā saddhiṃ nikkhamitvā pabbajitvā vipassanāya kammaṃ karoti. Tassā satthā heṭṭhā vuttanayeneva obhāsaṃ vissajjetvā –
೪.
4.
‘‘ತಿಸ್ಸೇ ಸಿಕ್ಖಸ್ಸು ಸಿಕ್ಖಾಯ, ಮಾ ತಂ ಯೋಗಾ ಉಪಚ್ಚಗುಂ।
‘‘Tisse sikkhassu sikkhāya, mā taṃ yogā upaccaguṃ;
ಸಬ್ಬಯೋಗವಿಸಂಯುತ್ತಾ, ಚರ ಲೋಕೇ ಅನಾಸವಾ’’ತಿ॥ – ಗಾಥಂ ಅಭಾಸಿ।
Sabbayogavisaṃyuttā, cara loke anāsavā’’ti. – gāthaṃ abhāsi;
ತತ್ಥ ತಿಸ್ಸೇತಿ ತಸ್ಸಾ ಆಲಪನಂ। ಸಿಕ್ಖಸ್ಸು ಸಿಕ್ಖಾಯಾತಿ ಅಧಿಸೀಲಸಿಕ್ಖಾದಿಕಾಯ ತಿವಿಧಾಯ ಸಿಕ್ಖಾಯ ಸಿಕ್ಖ, ಮಗ್ಗಸಮ್ಪಯುತ್ತಾ ತಿಸ್ಸೋ ಸಿಕ್ಖಾಯೋ ಸಮ್ಪಾದೇಹೀತಿ ಅತ್ಥೋ। ಇದಾನಿ ತಾಸಂ ಸಮ್ಪಾದನೇ ಕಾರಣಮಾಹ ‘‘ಮಾ ತಂ ಯೋಗಾ ಉಪಚ್ಚಗು’’ನ್ತಿ ಮನುಸ್ಸತ್ತಂ, ಇನ್ದ್ರಿಯಾವೇಕಲ್ಲಂ, ಬುದ್ಧುಪ್ಪಾದೋ, ಸದ್ಧಾಪಟಿಲಾಭೋತಿ ಇಮೇ ಯೋಗಾ ಸಮಯಾ ದುಲ್ಲಭಕ್ಖಣಾ ತಂ ಮಾ ಅತಿಕ್ಕಮುಂ। ಕಾಮಯೋಗಾದಯೋ ಏವ ವಾ ಚತ್ತಾರೋ ಯೋಗಾ ತಂ ಮಾ ಉಪಚ್ಚಗುಂ ಮಾ ಅಭಿಭವೇಯ್ಯುಂ। ಸಬ್ಬಯೋಗವಿಸಂಯುತ್ತಾತಿ ಸಬ್ಬೇಹಿ ಕಾಮಯೋಗಾದೀಹಿ ಯೋಗೇಹಿ ವಿಮುತ್ತಾ ತತೋ ಏವ ಅನಾಸವಾ ಹುತ್ವಾ ಲೋಕೇ ಚರ, ದಿಟ್ಠಸುಖವಿಹಾರೇನ ವಿಹರಾಹೀತಿ ಅತ್ಥೋ।
Tattha tisseti tassā ālapanaṃ. Sikkhassu sikkhāyāti adhisīlasikkhādikāya tividhāya sikkhāya sikkha, maggasampayuttā tisso sikkhāyo sampādehīti attho. Idāni tāsaṃ sampādane kāraṇamāha ‘‘mā taṃ yogā upaccagu’’nti manussattaṃ, indriyāvekallaṃ, buddhuppādo, saddhāpaṭilābhoti ime yogā samayā dullabhakkhaṇā taṃ mā atikkamuṃ. Kāmayogādayo eva vā cattāro yogā taṃ mā upaccaguṃ mā abhibhaveyyuṃ. Sabbayogavisaṃyuttāti sabbehi kāmayogādīhi yogehi vimuttā tato eva anāsavā hutvā loke cara, diṭṭhasukhavihārena viharāhīti attho.
ಸಾ ತಂ ಗಾಥಂ ಸುತ್ವಾ ವಿಪಸ್ಸನಂ ವಡ್ಢೇತ್ವಾ ಅರಹತ್ತಂ ಪಾಪುಣೀತಿ ಆದಿನಯೋ ಹೇಟ್ಠಾ ವುತ್ತನಯೇನೇವ ವೇದಿತಬ್ಬೋ।
Sā taṃ gāthaṃ sutvā vipassanaṃ vaḍḍhetvā arahattaṃ pāpuṇīti ādinayo heṭṭhā vuttanayeneva veditabbo.
ತಿಸ್ಸಾಥೇರೀಗಾಥಾವಣ್ಣನಾ ನಿಟ್ಠಿತಾ।
Tissātherīgāthāvaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಥೇರೀಗಾಥಾಪಾಳಿ • Therīgāthāpāḷi / ೪. ತಿಸ್ಸಾಥೇರೀಗಾಥಾ • 4. Tissātherīgāthā
