| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. திஸ்ஸஸுத்தவண்ணனா
2. Tissasuttavaṇṇanā
84. து³தியே மது⁴ரகஜாதோ வியாதி ஸஞ்ஜாதக³ருபா⁴வோ விய அகம்மஞ்ஞோ. தி³ஸாபி மேதி அயங் புரத்தி²மா அயங் த³க்கி²ணாதி ஏவங் தி³ஸாபி மய்ஹங் ந பக்கா²யந்தி, ந பாகடா ஹொந்தீதி வத³தி. த⁴ம்மாபி மங் ந படிப⁴ந்தீதி பரியத்தித⁴ம்மாபி மய்ஹங் ந உபட்ட²ஹந்தி, உக்³க³ஹிதங் ஸஜ்ஜா²யிதங் ந தி³ஸ்ஸதீதி வத³தி. விசிகிச்சா²தி நோ மஹாவிசிகிச்சா². ந ஹி தஸ்ஸ ‘‘ஸாஸனங் நிய்யானிகங் நு கோ², ந நு கோ²’’தி விமதி உப்பஜ்ஜதி. ஏவங் பனஸ்ஸ ஹோதி ‘‘ஸக்கி²ஸ்ஸாமி நு கோ² ஸமணத⁴ம்மங் காதுங், உதா³ஹு பத்தசீவரதா⁴ரணமத்தமேவ கரிஸ்ஸாமீ’’தி.
84. Dutiye madhurakajāto viyāti sañjātagarubhāvo viya akammañño. Disāpi meti ayaṃ puratthimā ayaṃ dakkhiṇāti evaṃ disāpi mayhaṃ na pakkhāyanti, na pākaṭā hontīti vadati. Dhammāpi maṃ na paṭibhantīti pariyattidhammāpi mayhaṃ na upaṭṭhahanti, uggahitaṃ sajjhāyitaṃ na dissatīti vadati. Vicikicchāti no mahāvicikicchā. Na hi tassa ‘‘sāsanaṃ niyyānikaṃ nu kho, na nu kho’’ti vimati uppajjati. Evaṃ panassa hoti ‘‘sakkhissāmi nu kho samaṇadhammaṃ kātuṃ, udāhu pattacīvaradhāraṇamattameva karissāmī’’ti.
காமானமேதங் அதி⁴வசனந்தி யதா² ஹி நின்னங் பல்லலங் ஓலோகெந்தஸ்ஸ த³ஸ்ஸனராமணெய்யகமத்தங் அத்தி², யோ பனெத்த² ஓதரதி, தங் சண்ட³மீனாகுலதாய ஆகட்³டி⁴த்வா அனயப்³யஸனங் பாபேதி, ஏவமேவங் பஞ்சஸு காமகு³ணேஸு சக்கு²த்³வாராதீ³னங் ஆரம்மணே ராமணெய்யகமத்தங் அத்தி², யோ பனெத்த² கே³த⁴ங் ஆபஜ்ஜதி, தங் ஆகட்³டி⁴த்வா நிரயாதீ³ஸு ஏவ பக்கி²பந்தி. அப்பஸ்ஸாதா³ ஹி காமா ப³ஹுது³க்கா² ப³ஹுபாயாஸா, ஆதீ³னவோ எத்த² பி⁴ய்யோதி இமங் அத்த²வஸங் படிச்ச ‘‘காமானமேதங் அதி⁴வசன’’ந்தி வுத்தங். அஹமனுக்³க³ஹேனாதி அஹங் த⁴ம்மாமிஸானுக்³க³ஹேஹி அனுக்³க³ண்ஹாமி. அபி⁴னந்தீ³தி ஸம்படிச்சி². ந கேவலஞ்ச அபி⁴னந்தி³, இமங் பன ஸத்து² ஸந்திகா அஸ்ஸாஸங் லபி⁴த்வா க⁴டெந்தோ வாயமந்தோ கதிபாஹேன அரஹத்தே பதிட்டா²ஸி. து³தியங்.
Kāmānametaṃ adhivacananti yathā hi ninnaṃ pallalaṃ olokentassa dassanarāmaṇeyyakamattaṃ atthi, yo panettha otarati, taṃ caṇḍamīnākulatāya ākaḍḍhitvā anayabyasanaṃ pāpeti, evamevaṃ pañcasu kāmaguṇesu cakkhudvārādīnaṃ ārammaṇe rāmaṇeyyakamattaṃ atthi, yo panettha gedhaṃ āpajjati, taṃ ākaḍḍhitvā nirayādīsu eva pakkhipanti. Appassādā hi kāmā bahudukkhā bahupāyāsā, ādīnavo ettha bhiyyoti imaṃ atthavasaṃ paṭicca ‘‘kāmānametaṃ adhivacana’’nti vuttaṃ. Ahamanuggahenāti ahaṃ dhammāmisānuggahehi anuggaṇhāmi. Abhinandīti sampaṭicchi. Na kevalañca abhinandi, imaṃ pana satthu santikā assāsaṃ labhitvā ghaṭento vāyamanto katipāhena arahatte patiṭṭhāsi. Dutiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. திஸ்ஸஸுத்தங் • 2. Tissasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. திஸ்ஸஸுத்தவண்ணனா • 2. Tissasuttavaṇṇanā
