| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৯. তিস্সসুত্তং
9. Tissasuttaṃ
২৪৩. সাৰত্থিযং ৰিহরতি। অথ খো আযস্মা তিস্সো ভগৰতো পিতুচ্ছাপুত্তো যেন ভগৰা তেনুপসঙ্কমি ; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি দুক্খী দুম্মনো অস্সূনি পৰত্তযমানো। অথ খো ভগৰা আযস্মন্তং তিস্সং এতদৰোচ – ‘‘কিং নু খো ত্ৰং, তিস্স, একমন্তং নিসিন্নো দুক্খী দুম্মনো অস্সূনি পৰত্তযমানো’’তি? ‘‘তথা হি পন মং, ভন্তে, ভিক্খূ সমন্তা ৰাচাসন্নিতোদকেন 1 সঞ্জম্ভরিমকংসূ’’তি 2। ‘‘তথাহি পন ত্ৰং, তিস্স, ৰত্তা নো চ ৰচনক্খমো; ন খো তে তং, তিস্স, পতিরূপং কুলপুত্তস্স সদ্ধা অগারস্মা অনগারিযং পব্বজিতস্স, যং ত্ৰং ৰত্তা নো চ ৰচনক্খমো। এতং খো তে, তিস্স, পতিরূপং কুলপুত্তস্স সদ্ধা অগারস্মা অনগারিযং পব্বজিতস্স – ‘যং ত্ৰং ৰত্তা চ অস্স ৰচনক্খমো চা’’’তি।
243. Sāvatthiyaṃ viharati. Atha kho āyasmā tisso bhagavato pitucchāputto yena bhagavā tenupasaṅkami ; upasaṅkamitvā bhagavantaṃ abhivādetvā ekamantaṃ nisīdi dukkhī dummano assūni pavattayamāno. Atha kho bhagavā āyasmantaṃ tissaṃ etadavoca – ‘‘kiṃ nu kho tvaṃ, tissa, ekamantaṃ nisinno dukkhī dummano assūni pavattayamāno’’ti? ‘‘Tathā hi pana maṃ, bhante, bhikkhū samantā vācāsannitodakena 3 sañjambharimakaṃsū’’ti 4. ‘‘Tathāhi pana tvaṃ, tissa, vattā no ca vacanakkhamo; na kho te taṃ, tissa, patirūpaṃ kulaputtassa saddhā agārasmā anagāriyaṃ pabbajitassa, yaṃ tvaṃ vattā no ca vacanakkhamo. Etaṃ kho te, tissa, patirūpaṃ kulaputtassa saddhā agārasmā anagāriyaṃ pabbajitassa – ‘yaṃ tvaṃ vattā ca assa vacanakkhamo cā’’’ti.
ইদমৰোচ ভগৰা। ইদং ৰত্ৰান সুগতো অথাপরং এতদৰোচ সত্থা –
Idamavoca bhagavā. Idaṃ vatvāna sugato athāparaṃ etadavoca satthā –
‘‘কিং নু কুজ্ঝসি মা কুজ্ঝি, অক্কোধো তিস্স তে ৰরং।
‘‘Kiṃ nu kujjhasi mā kujjhi, akkodho tissa te varaṃ;
কোধমানমক্খৰিনযত্থঞ্হি, তিস্স ব্রহ্মচরিযং ৰুস্সতী’’তি॥ নৰমং।
Kodhamānamakkhavinayatthañhi, tissa brahmacariyaṃ vussatī’’ti. navamaṃ;
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. তিস্সসুত্তৰণ্ণনা • 9. Tissasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৯. তিস্সসুত্তৰণ্ণনা • 9. Tissasuttavaṇṇanā
