| Library / Tipiṭaka / திபிடக • Tipiṭaka / அபதா³னபாளி • Apadānapāḷi |
41. மெத்தெய்யவக்³கோ³
41. Metteyyavaggo
1. திஸ்ஸமெத்தெய்யத்தே²ரஅபதா³னங்
1. Tissametteyyattheraapadānaṃ
1.
1.
‘‘பப்³பா⁴ரகூடங் நிஸ்ஸாய, ஸோபி⁴தோ நாம தாபஸோ;
‘‘Pabbhārakūṭaṃ nissāya, sobhito nāma tāpaso;
பவத்தப²லங் பு⁴ஞ்ஜித்வா, வஸதி பப்³ப³தந்தரே.
Pavattaphalaṃ bhuñjitvā, vasati pabbatantare.
2.
2.
‘‘அக்³கி³ங் தா³ருங் ஆஹரித்வா, உஜ்ஜாலேஸிங் அஹங் ததா³;
‘‘Aggiṃ dāruṃ āharitvā, ujjālesiṃ ahaṃ tadā;
உத்தமத்த²ங் க³வேஸந்தோ, ப்³ரஹ்மலோகூபபத்தியா.
Uttamatthaṃ gavesanto, brahmalokūpapattiyā.
3.
3.
‘‘பது³முத்தரோ லோகவிதூ³, ஆஹுதீனங் படிக்³க³ஹோ;
‘‘Padumuttaro lokavidū, āhutīnaṃ paṭiggaho;
மமுத்³த⁴ரிதுகாமோ ஸோ, ஆக³ச்சி² மம ஸந்திகே.
Mamuddharitukāmo so, āgacchi mama santike.
4.
4.
‘‘கிங் கரோஸி மஹாபுஞ்ஞ, தே³ஹி மே அக்³கி³தா³ருகங்;
‘‘Kiṃ karosi mahāpuñña, dehi me aggidārukaṃ;
5.
5.
‘‘ஸுப⁴த்³த³கோ த்வங் மனுஜே, தே³வதே த்வங் பஜானஸி;
‘‘Subhaddako tvaṃ manuje, devate tvaṃ pajānasi;
துவங் அக்³கி³ங் பரிசர, ஹந்த³ தே அக்³கி³தா³ருகங்.
Tuvaṃ aggiṃ paricara, handa te aggidārukaṃ.
6.
6.
‘‘ததோ கட்ட²ங் க³ஹெத்வான, அக்³கி³ங் உஜ்ஜாலயீ ஜினோ;
‘‘Tato kaṭṭhaṃ gahetvāna, aggiṃ ujjālayī jino;
ந தத்த² கட்ட²ங் பஜ்ஜா²யி, பாடிஹேரங் மஹேஸினோ.
Na tattha kaṭṭhaṃ pajjhāyi, pāṭiheraṃ mahesino.
7.
7.
‘‘ந தே அக்³கி³ பஜ்ஜலதி, ஆஹுதீ தே ந விஜ்ஜதி;
‘‘Na te aggi pajjalati, āhutī te na vijjati;
நிரத்த²கங் வதங் துய்ஹங், அக்³கி³ங் பரிசரஸ்ஸு மே.
Niratthakaṃ vataṃ tuyhaṃ, aggiṃ paricarassu me.
8.
8.
மய்ஹம்பி கத²யஸ்ஸேதங், உபோ⁴ பரிசராமஸே.
Mayhampi kathayassetaṃ, ubho paricarāmase.
9.
9.
‘‘ஹேதுத⁴ம்மனிரோதா⁴ய , கிலேஸஸமணாய ச;
‘‘Hetudhammanirodhāya , kilesasamaṇāya ca;
இஸ்ஸாமச்ச²ரியங் ஹித்வா, தயோ ஏதே மமாஹுதீ.
Issāmacchariyaṃ hitvā, tayo ete mamāhutī.
10.
10.
‘‘கீதி³ஸோ த்வங் மஹாவீர, கத²ங் கொ³த்தோஸி மாரிஸ;
‘‘Kīdiso tvaṃ mahāvīra, kathaṃ gottosi mārisa;
ஆசாரபடிபத்தி தே, பா³ள்ஹங் கோ² மம ருச்சதி.
Ācārapaṭipatti te, bāḷhaṃ kho mama ruccati.
11.
11.
‘‘க²த்தியம்ஹி குலே ஜாதோ, அபி⁴ஞ்ஞாபாரமிங் க³தோ;
‘‘Khattiyamhi kule jāto, abhiññāpāramiṃ gato;
ஸப்³பா³ஸவபரிக்கீ²ணோ, நத்தி² தா³னி புனப்³ப⁴வோ.
Sabbāsavaparikkhīṇo, natthi dāni punabbhavo.
12.
12.
‘‘யதி³ பு³த்³தோ⁴ஸி ஸப்³ப³ஞ்ஞூ, பப⁴ங்கர தமோனுத³;
‘‘Yadi buddhosi sabbaññū, pabhaṅkara tamonuda;
நமஸ்ஸிஸ்ஸாமி தங் தே³வ, து³க்க²ஸ்ஸந்தகரோ துவங்.
Namassissāmi taṃ deva, dukkhassantakaro tuvaṃ.
13.
13.
‘‘பத்த²ரித்வாஜினசம்மங், நிஸீத³னமதா³ஸஹங்;
‘‘Pattharitvājinacammaṃ, nisīdanamadāsahaṃ;
நிஸீத³ நாத² ஸப்³ப³ஞ்ஞு, உபட்டி²ஸ்ஸாமஹங் துவங்.
Nisīda nātha sabbaññu, upaṭṭhissāmahaṃ tuvaṃ.
14.
14.
‘‘நிஸீதி³ ப⁴க³வா தத்த², அஜினம்ஹி ஸுவித்த²தே;
‘‘Nisīdi bhagavā tattha, ajinamhi suvitthate;
நிமந்தயித்வா ஸம்பு³த்³த⁴ங், பப்³ப³தங் அக³மாஸஹங்.
Nimantayitvā sambuddhaṃ, pabbataṃ agamāsahaṃ.
15.
15.
‘‘கா²ரிபா⁴ரஞ்ச பூரெத்வா, திந்து³கப²லமாஹரிங்;
‘‘Khāribhārañca pūretvā, tindukaphalamāhariṃ;
மது⁴னா யோஜயித்வான, ப²லங் பு³த்³த⁴ஸ்ஸதா³ஸஹங்.
Madhunā yojayitvāna, phalaṃ buddhassadāsahaṃ.
16.
16.
‘‘மம நிஜ்ஜா²யமானஸ்ஸ, பரிபு⁴ஞ்ஜி ததா³ ஜினோ;
‘‘Mama nijjhāyamānassa, paribhuñji tadā jino;
தத்த² சித்தங் பஸாதே³ஸிங், பெக்க²ந்தோ லோகனாயகங்.
Tattha cittaṃ pasādesiṃ, pekkhanto lokanāyakaṃ.
17.
17.
‘‘பது³முத்தரோ லோகவிதூ³, ஆஹுதீனங் படிக்³க³ஹோ;
‘‘Padumuttaro lokavidū, āhutīnaṃ paṭiggaho;
மமஸ்ஸமே நிஸீதி³த்வா, இமா கா³தா² அபா⁴ஸத².
Mamassame nisīditvā, imā gāthā abhāsatha.
18.
18.
‘‘‘யோ மங் ப²லேன தப்பேஸி, பஸன்னோ ஸேஹி பாணிபி⁴;
‘‘‘Yo maṃ phalena tappesi, pasanno sehi pāṇibhi;
தமஹங் கித்தயிஸ்ஸாமி, ஸுணாத² மம பா⁴ஸதோ.
Tamahaṃ kittayissāmi, suṇātha mama bhāsato.
19.
19.
‘‘‘பஞ்சவீஸதிக்க²த்துங் ஸோ, தே³வரஜ்ஜங் கரிஸ்ஸதி;
‘‘‘Pañcavīsatikkhattuṃ so, devarajjaṃ karissati;
ஸஹஸ்ஸக்க²த்துங் ராஜா ச, சக்கவத்தீ ப⁴விஸ்ஸதி.
Sahassakkhattuṃ rājā ca, cakkavattī bhavissati.
20.
20.
‘‘‘தஸ்ஸ ஸங்கப்பமஞ்ஞாய, புப்³ப³கம்மஸமங்கி³னோ;
‘‘‘Tassa saṅkappamaññāya, pubbakammasamaṅgino;
அன்னங் பானஞ்ச வத்த²ஞ்ச, ஸயனஞ்ச மஹாரஹங்.
Annaṃ pānañca vatthañca, sayanañca mahārahaṃ.
21.
21.
‘‘‘புஞ்ஞகம்மேன ஸங்யுத்தா, நிப்³ப³த்திஸ்ஸந்தி தாவதே³;
‘‘‘Puññakammena saṃyuttā, nibbattissanti tāvade;
ஸதா³ பமுதி³தோ சாயங், ப⁴விஸ்ஸதி அனாமயோ.
Sadā pamudito cāyaṃ, bhavissati anāmayo.
22.
22.
‘‘‘உபபஜ்ஜதி யங் யோனிங், தே³வத்தங் அத² மானுஸங்;
‘‘‘Upapajjati yaṃ yoniṃ, devattaṃ atha mānusaṃ;
ஸப்³ப³த்த² ஸுகி²தோ ஹுத்வா, மனுஸ்ஸத்தங் க³மிஸ்ஸதி.
Sabbattha sukhito hutvā, manussattaṃ gamissati.
23.
23.
‘‘‘அஜ்ஜா²யகோ மந்தத⁴ரோ, திண்ணங் வேதா³ன பாரகூ³;
‘‘‘Ajjhāyako mantadharo, tiṇṇaṃ vedāna pāragū;
ஸம்பு³த்³த⁴ங் உபக³ந்த்வான, அரஹா ஸோ ப⁴விஸ்ஸதி’.
Sambuddhaṃ upagantvāna, arahā so bhavissati’.
24.
24.
‘‘யதோ ஸராமி அத்தானங், யதோ பத்தொஸ்மி விஞ்ஞுதங்;
‘‘Yato sarāmi attānaṃ, yato pattosmi viññutaṃ;
போ⁴கே³ மே ஊனதா நத்தி², ப²லதா³னஸ்ஸித³ங் ப²லங்.
Bhoge me ūnatā natthi, phaladānassidaṃ phalaṃ.
25.
25.
‘‘வரத⁴ம்மமனுப்பத்தோ, ராக³தோ³ஸே ஸமூஹனிங்;
‘‘Varadhammamanuppatto, rāgadose samūhaniṃ;
ஸப்³பா³ஸவபரிக்கீ²ணோ, நத்தி² தா³னி புனப்³ப⁴வோ.
Sabbāsavaparikkhīṇo, natthi dāni punabbhavo.
26.
26.
‘‘கிலேஸா ஜா²பிதா மய்ஹங், ப⁴வா ஸப்³பே³ ஸமூஹதா;
‘‘Kilesā jhāpitā mayhaṃ, bhavā sabbe samūhatā;
நாகோ³வ ப³ந்த⁴னங் செ²த்வா, விஹராமி அனாஸவோ.
Nāgova bandhanaṃ chetvā, viharāmi anāsavo.
27.
27.
‘‘ஸ்வாக³தங் வத மே ஆஸி, மம பு³த்³த⁴ஸ்ஸ ஸந்திகே;
‘‘Svāgataṃ vata me āsi, mama buddhassa santike;
திஸ்ஸோ விஜ்ஜா அனுப்பத்தா, கதங் பு³த்³த⁴ஸ்ஸ ஸாஸனங்.
Tisso vijjā anuppattā, kataṃ buddhassa sāsanaṃ.
28.
28.
‘‘படிஸம்பி⁴தா³ சதஸ்ஸோ, விமொக்கா²பி ச அட்டி²மே;
‘‘Paṭisambhidā catasso, vimokkhāpi ca aṭṭhime;
ச²ளபி⁴ஞ்ஞா ஸச்சி²கதா, கதங் பு³த்³த⁴ஸ்ஸ ஸாஸனங்’’.
Chaḷabhiññā sacchikatā, kataṃ buddhassa sāsanaṃ’’.
இத்த²ங் ஸுத³ங் ஆயஸ்மா திஸ்ஸமெத்தெய்யோ தே²ரோ இமா கா³தா²யோ அபா⁴ஸித்தா²தி.
Itthaṃ sudaṃ āyasmā tissametteyyo thero imā gāthāyo abhāsitthāti.
திஸ்ஸமெத்தெய்யத்தே²ரஸ்ஸாபதா³னங் பட²மங்.
Tissametteyyattherassāpadānaṃ paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / அபதா³ன-அட்ட²கதா² • Apadāna-aṭṭhakathā / 1. திஸ்ஸமெத்தெய்யத்தே²ரஅபதா³னவண்ணனா • 1. Tissametteyyattheraapadānavaṇṇanā
