| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
១០. តិរច្ឆានកថាសុត្តវណ្ណនា
10. Tiracchānakathāsuttavaṇṇanā
១០៨០. ទុគ្គតិតោ សំសារតោ ច និយ្យាតិ ឯតេនាតិ និយ្យានំ, សគ្គមគ្គោ មោក្ខមគ្គោ ច។ តស្មិំ និយ្យានេ និយុត្តា, តំ ឯត្ថ អត្ថីតិ និយ្យានិកា។ វចីទុច្ចរិតសំកិលេសតោ វា និយ្យាតីតិ ឦ-ការស្ស រស្សត្តំ យ-ការស្ស ក-ការំ កត្វា និយ្យានិកា។ ចេតនាយ សទ្ធិំ សម្ផប្បលាបា វេរមណិ។ តប្បដិបក្ខតោ អនិយ្យានិកា, តស្ស ភាវោ អនិយ្យានិកត្តំ។ តិរច្ឆានភូតន្តិ តិរោករណភូតំ។ កម្មដ្ឋានភាវេតិ អនិច្ចតាបដិសំយុត្តចតុសច្ចកម្មដ្ឋានភាវេ។ សាត្ថកន្តិ ទានសីលាទិនិស្សិតត្តា ហិតបដិសំយុត្តំ។
1080. Duggatito saṃsārato ca niyyāti etenāti niyyānaṃ, saggamaggo mokkhamaggo ca. Tasmiṃ niyyāne niyuttā, taṃ ettha atthīti niyyānikā. Vacīduccaritasaṃkilesato vā niyyātīti ī-kārassa rassattaṃ ya-kārassa ka-kāraṃ katvā niyyānikā. Cetanāya saddhiṃ samphappalāpā veramaṇi. Tappaṭipakkhato aniyyānikā, tassa bhāvo aniyyānikattaṃ. Tiracchānabhūtanti tirokaraṇabhūtaṃ. Kammaṭṭhānabhāveti aniccatāpaṭisaṃyuttacatusaccakammaṭṭhānabhāve. Sātthakanti dānasīlādinissitattā hitapaṭisaṃyuttaṃ.
វិសិខាតិ ឃរសន្និវេសោ។ វិសិខាគហណេន ច គាមាទិគហណេ វិយ តន្និវាសិនោ វិសេសតោ គហិតា ‘‘អាគតោ គាមោ’’តិអាទីសុ វិយ ។ តេនាហ ‘‘សូរា សមត្ថា’’តិ។ កុម្ភដ្ឋានាបទេសេន កុម្ភទាសិយោ វុត្តាតិ អាហ – ‘‘កុម្ភទាសិកថា’’តិ។ អយាថាវតោ ឧប្បត្តិដ្ឋិតិសំហារាទិវសេន លោកោ អក្ខាយតិ ឯតេនាតិ លោកក្ខាយិកា។ ឥតិ ឥមិនា បការេន ភវោ, ឥមិនា អភវោតិ ឯវំ បវត្តាយ ឥតិភវាភវកថាយ សទ្ធិំ។
Visikhāti gharasanniveso. Visikhāgahaṇena ca gāmādigahaṇe viya tannivāsino visesato gahitā ‘‘āgato gāmo’’tiādīsu viya . Tenāha ‘‘sūrā samatthā’’ti. Kumbhaṭṭhānāpadesena kumbhadāsiyo vuttāti āha – ‘‘kumbhadāsikathā’’ti. Ayāthāvato uppattiṭṭhitisaṃhārādivasena loko akkhāyati etenāti lokakkhāyikā. Iti iminā pakārena bhavo, iminā abhavoti evaṃ pavattāya itibhavābhavakathāya saddhiṃ.
សមាធិវគ្គវណ្ណនា និដ្ឋិតា។
Samādhivaggavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១០. តិរច្ឆានកថាសុត្តំ • 10. Tiracchānakathāsuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១០. តិរច្ឆានកថាសុត្តវណ្ណនា • 10. Tiracchānakathāsuttavaṇṇanā
