| Library / Tipiṭaka / திபிடக • Tipiṭaka / அபதா³னபாளி • Apadānapāḷi |
3. தீணுப்பலமாலியத்தே²ரஅபதா³னங்
3. Tīṇuppalamāliyattheraapadānaṃ
13.
13.
‘‘சந்த³பா⁴கா³னதீ³தீரே , அஹோஸிங் வானரோ ததா³;
‘‘Candabhāgānadītīre , ahosiṃ vānaro tadā;
அத்³த³ஸங் விரஜங் பு³த்³த⁴ங், நிஸின்னங் பப்³ப³தந்தரே.
Addasaṃ virajaṃ buddhaṃ, nisinnaṃ pabbatantare.
14.
14.
‘‘ஓபா⁴ஸெந்தங் தி³ஸா ஸப்³பா³, ஸாலராஜங்வ பு²ல்லிதங்;
‘‘Obhāsentaṃ disā sabbā, sālarājaṃva phullitaṃ;
லக்க²ணப்³யஞ்ஜனூபேதங், தி³ஸ்வானத்தமனோ அஹங்.
Lakkhaṇabyañjanūpetaṃ, disvānattamano ahaṃ.
15.
15.
‘‘உத³க்³க³சித்தோ ஸுமனோ, பீதியா ஹட்ட²மானஸோ;
‘‘Udaggacitto sumano, pītiyā haṭṭhamānaso;
தீணி உப்பலபுப்பா²னி, மத்த²கே அபி⁴ரோபயிங்.
Tīṇi uppalapupphāni, matthake abhiropayiṃ.
16.
16.
‘‘பூஜயித்வான புப்பா²னி, பு²ஸ்ஸஸ்ஸாஹங் மஹேஸினோ;
‘‘Pūjayitvāna pupphāni, phussassāhaṃ mahesino;
ஸகா³ரவோ ப⁴வித்வான, பக்காமிங் உத்தராமுகோ².
Sagāravo bhavitvāna, pakkāmiṃ uttarāmukho.
17.
17.
‘‘க³ச்ச²ந்தோ படிகுடிகோ, விப்பஸன்னேன சேதஸா;
‘‘Gacchanto paṭikuṭiko, vippasannena cetasā;
ஸேலந்தரே பதித்வான, பாபுணிங் ஜீவிதக்க²யங்.
Selantare patitvāna, pāpuṇiṃ jīvitakkhayaṃ.
18.
18.
‘‘தேன கம்மேன ஸுகதேன, சேதனாபணிதீ⁴ஹி ச;
‘‘Tena kammena sukatena, cetanāpaṇidhīhi ca;
ஜஹித்வா புரிமங் ஜாதிங், தாவதிங்ஸமக³ச்ச²ஹங்.
Jahitvā purimaṃ jātiṃ, tāvatiṃsamagacchahaṃ.
19.
19.
‘‘ஸதானங் தீணிக்க²த்துஞ்ச, தே³வரஜ்ஜமகாரயிங்;
‘‘Satānaṃ tīṇikkhattuñca, devarajjamakārayiṃ;
ஸதானங் பஞ்சக்க²த்துஞ்ச, சக்கவத்தீ அஹோஸஹங்.
Satānaṃ pañcakkhattuñca, cakkavattī ahosahaṃ.
20.
20.
‘‘த்³வேனவுதே இதோ கப்பே, யங் புப்ப²மபி⁴பூஜயிங்;
‘‘Dvenavute ito kappe, yaṃ pupphamabhipūjayiṃ;
து³க்³க³திங் நாபி⁴ஜானாமி, பு³த்³த⁴பூஜாயித³ங் ப²லங்.
Duggatiṃ nābhijānāmi, buddhapūjāyidaṃ phalaṃ.
21.
21.
‘‘படிஸம்பி⁴தா³ சதஸ்ஸோ…பே॰… கதங் பு³த்³த⁴ஸ்ஸ ஸாஸனங்’’.
‘‘Paṭisambhidā catasso…pe… kataṃ buddhassa sāsanaṃ’’.
இத்த²ங் ஸுத³ங் ஆயஸ்மா தீணுப்பலமாலியோ தே²ரோ இமா கா³தா²யோ அபா⁴ஸித்தா²தி.
Itthaṃ sudaṃ āyasmā tīṇuppalamāliyo thero imā gāthāyo abhāsitthāti.
தீணுப்பலமாலியத்தே²ரஸ்ஸாபதா³னங் ததியங்.
Tīṇuppalamāliyattherassāpadānaṃ tatiyaṃ.
