| Library / Tipiṭaka / तिपिटक • Tipiṭaka / अपदानपाळि • Apadānapāḷi |
७. तिन्दुकदायकत्थेरअपदानं
7. Tindukadāyakattheraapadānaṃ
३५.
35.
‘‘गिरिदुग्गचरो आसिं, मक्कटो थामवेगिको।
‘‘Giriduggacaro āsiṃ, makkaṭo thāmavegiko;
फलिनं तिन्दुकं दिस्वा, बुद्धसेट्ठं अनुस्सरिं॥
Phalinaṃ tindukaṃ disvā, buddhaseṭṭhaṃ anussariṃ.
३६.
36.
‘‘निक्खमित्वा कतिपाहं, विचिनिं लोकनायकं।
‘‘Nikkhamitvā katipāhaṃ, viciniṃ lokanāyakaṃ;
पसन्नचित्तो सुमनो, सिद्धत्थं तिभवन्तगुं॥
Pasannacitto sumano, siddhatthaṃ tibhavantaguṃ.
३७.
37.
‘‘मम सङ्कप्पमञ्ञाय, सत्था लोके अनुत्तरो।
‘‘Mama saṅkappamaññāya, satthā loke anuttaro;
खीणासवसहस्सेहि, आगच्छि मम सन्तिकं॥
Khīṇāsavasahassehi, āgacchi mama santikaṃ.
३८.
38.
‘‘पामोज्जं जनयित्वान, फलहत्थो उपागमिं।
‘‘Pāmojjaṃ janayitvāna, phalahattho upāgamiṃ;
पटिग्गहेसि भगवा, सब्बञ्ञू वदतं वरो॥
Paṭiggahesi bhagavā, sabbaññū vadataṃ varo.
३९.
39.
‘‘चतुन्नवुतितो कप्पे, यं फलं अददिं तदा।
‘‘Catunnavutito kappe, yaṃ phalaṃ adadiṃ tadā;
दुग्गतिं नाभिजानामि, फलदानस्सिदं फलं॥
Duggatiṃ nābhijānāmi, phaladānassidaṃ phalaṃ.
४०.
40.
‘‘सत्तपञ्ञासकप्पम्हि, उपनन्दसनामको।
‘‘Sattapaññāsakappamhi, upanandasanāmako;
सत्तरतनसम्पन्नो, चक्कवत्ती महब्बलो॥
Sattaratanasampanno, cakkavattī mahabbalo.
४१.
41.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा तिन्दुकदायको थेरो इमा गाथायो अभासित्थाति।
Itthaṃ sudaṃ āyasmā tindukadāyako thero imā gāthāyo abhāsitthāti.
तिन्दुकदायकत्थेरस्सापदानं सत्तमं।
Tindukadāyakattherassāpadānaṃ sattamaṃ.
