6. Tiṇasantharadāyakattheraapadānaṃ

22.

‘‘Himavantassāvidūre, mahājātassaro ahu;

Satapattehi sañchanno, nānāsakuṇamālayo.

23.

‘‘Tamhi nhatvā ca pitvā ² ca, avidūre vasāmahaṃ;

Addasaṃ samaṇānaggaṃ, gacchantaṃ anilañjase.

24.

‘‘Mama saṅkappamaññāya, satthā loke anuttaro;

Abbhato oruhitvāna, bhūmiyaṃṭhāsi tāvade.

25.

‘‘Visāṇena ⁴ tiṇaṃ gayha, nisīdanamadāsahaṃ;

Nisīdi bhagavā tattha, tisso lokagganāyako.

26.

‘‘Sakaṃ cittaṃ pasādetvā, avandi lokanāyakaṃ;

Paṭikuṭiko ⁶ apasakkiṃ, nijjhāyanto mahāmuniṃ.

27.

‘‘Tena cittappasādena, nimmānaṃ upapajjahaṃ;

Duggatiṃ nābhijānāmi, santharassa idaṃ phalaṃ.

28.

‘‘Ito dutiyake kappe, miga ⁸ sammatakhattiyo;

Sattaratanasampanno, cakkavattī mahabbalo.

29.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā tiṇasantharadāyako thero imā gāthāyo abhāsitthāti.

Tiṇasantharadāyakattherassāpadānaṃ chaṭṭhaṃ.