| Library / Tipiṭaka / திபிடக • Tipiṭaka / அபதா³னபாளி • Apadānapāḷi |
53. திணதா³யகவக்³கோ³
53. Tiṇadāyakavaggo
1. திணமுட்டி²தா³யகத்தே²ரஅபதா³னங்
1. Tiṇamuṭṭhidāyakattheraapadānaṃ
1.
1.
‘‘ஹிமவந்தஸ்ஸாவிதூ³ரே , லம்ப³கோ நாம பப்³ப³தோ;
‘‘Himavantassāvidūre , lambako nāma pabbato;
தத்தே²வ திஸ்ஸோ 1 ஸம்பு³த்³தோ⁴, அப்³போ⁴காஸம்ஹி சங்கமி.
Tattheva tisso 2 sambuddho, abbhokāsamhi caṅkami.
2.
2.
‘‘மிக³லுத்³தோ³ புரே ஆஸிங், அரஞ்ஞே கானநே அஹங்;
‘‘Migaluddo pure āsiṃ, araññe kānane ahaṃ;
தி³ஸ்வான தங் தே³வதே³வங், திணமுட்டி²மதா³ஸஹங்.
Disvāna taṃ devadevaṃ, tiṇamuṭṭhimadāsahaṃ.
3.
3.
‘‘நிஸீத³னத்த²ங் பு³த்³த⁴ஸ்ஸ, த³த்வா சித்தங் பஸாத³யிங்;
‘‘Nisīdanatthaṃ buddhassa, datvā cittaṃ pasādayiṃ;
ஸம்பு³த்³த⁴ங் அபி⁴வாதெ³த்வா, பக்காமிங் 3 உத்தராமுகோ².
Sambuddhaṃ abhivādetvā, pakkāmiṃ 4 uttarāmukho.
4.
4.
5.
5.
‘‘ஆஸன்னே மே கதங் கம்மங், பு³த்³த⁴ஸெட்டே² அனாஸவே;
‘‘Āsanne me kataṃ kammaṃ, buddhaseṭṭhe anāsave;
ஸுமுத்தோ ஸரவேகோ³வ, தே³வலோகமக³ச்ச²ஹங்.
Sumutto saravegova, devalokamagacchahaṃ.
6.
6.
‘‘யூபோ தத்த² ஸுபோ⁴ ஆஸி, புஞ்ஞகம்மாபி⁴னிம்மிதோ;
‘‘Yūpo tattha subho āsi, puññakammābhinimmito;
ஸஹஸ்ஸகண்டோ³ ஸதபெ⁴ண்டு³, த⁴ஜாலு ஹரிதாமயோ.
Sahassakaṇḍo satabheṇḍu, dhajālu haritāmayo.
7.
7.
‘‘பபா⁴ நித்³தா⁴வதே தஸ்ஸ, ஸதரங்ஸீவ உக்³க³தோ;
‘‘Pabhā niddhāvate tassa, sataraṃsīva uggato;
ஆகிண்ணோ தே³வகஞ்ஞாஹி, ஆமோதி³ங் காமகாமிஹங்.
Ākiṇṇo devakaññāhi, āmodiṃ kāmakāmihaṃ.
8.
8.
‘‘தே³வலோகா சவித்வான, ஸுக்கமூலேன சோதி³தோ;
‘‘Devalokā cavitvāna, sukkamūlena codito;
ஆக³ந்த்வான மனுஸ்ஸத்தங், பத்தொம்ஹி ஆஸவக்க²யங்.
Āgantvāna manussattaṃ, pattomhi āsavakkhayaṃ.
9.
9.
‘‘சதுன்னவுதிதோ கப்பே, நிஸீத³னமதா³ஸஹங்;
‘‘Catunnavutito kappe, nisīdanamadāsahaṃ;
து³க்³க³திங் நாபி⁴ஜானாமி, திணமுட்டே² இத³ங் ப²லங்.
Duggatiṃ nābhijānāmi, tiṇamuṭṭhe idaṃ phalaṃ.
10.
10.
‘‘கிலேஸா ஜா²பிதா மய்ஹங், ப⁴வா ஸப்³பே³ ஸமூஹதா;
‘‘Kilesā jhāpitā mayhaṃ, bhavā sabbe samūhatā;
நாகோ³வ ப³ந்த⁴னங் செ²த்வா, விஹராமி அனாஸவோ.
Nāgova bandhanaṃ chetvā, viharāmi anāsavo.
11.
11.
‘‘ஸ்வாக³தங் வத மே ஆஸி, மம பு³த்³த⁴ஸ்ஸ ஸந்திகே;
‘‘Svāgataṃ vata me āsi, mama buddhassa santike;
திஸ்ஸோ விஜ்ஜா அனுப்பத்தா, கதங் பு³த்³த⁴ஸ்ஸ ஸாஸனங்.
Tisso vijjā anuppattā, kataṃ buddhassa sāsanaṃ.
12.
12.
‘‘படிஸம்பி⁴தா³ சதஸ்ஸோ, விமொக்கா²பி ச அட்டி²மே;
‘‘Paṭisambhidā catasso, vimokkhāpi ca aṭṭhime;
ச²ளபி⁴ஞ்ஞா ஸச்சி²கதா, கதங் பு³த்³த⁴ஸ்ஸ ஸாஸனங்’’.
Chaḷabhiññā sacchikatā, kataṃ buddhassa sāsanaṃ’’.
இத்த²ங் ஸுத³ங் ஆயஸ்மா திணமுட்டி²தா³யகோ தே²ரோ இமா கா³தா²யோ
Itthaṃ sudaṃ āyasmā tiṇamuṭṭhidāyako thero imā gāthāyo
அபா⁴ஸித்தா²தி.
Abhāsitthāti.
திணமுட்டி²தா³யகத்தே²ரஸ்ஸாபதா³னங் பட²மங்.
Tiṇamuṭṭhidāyakattherassāpadānaṃ paṭhamaṃ.
Footnotes:
