| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৪. অনমতগ্গসংযুত্তং
4. Anamataggasaṃyuttaṃ
১. পঠমৰগ্গো
1. Paṭhamavaggo
১. তিণকট্ঠসুত্তৰণ্ণনা
1. Tiṇakaṭṭhasuttavaṇṇanā
১২৪. উপসগ্গো সমাসৰিসযে সসাধনং কিরিযং দস্সেতীতি ৰুত্তং ‘‘ঞাণেন অনুগন্ত্ৰাপী’’তি। ৰস্সসতং ৰস্সসহস্সন্তি নিদস্সনমত্তমেতং, ততো ভিয্যোপি অনুগন্ত্ৰা অনমতগ্গো এৰ সংসারো। অগ্গ-সদ্দো ইধ মরিযাদৰচনো, অনুদ্দেসিকঞ্চেতং ৰচনন্তি আহ ‘‘অপরিচ্ছিন্নপুব্বাপরকোটিকো’’তি। অঞ্ঞথা অন্তিমভৰিকপরিচ্ছিন্নকতৰিমুত্তিপরিপাচনীযধম্মাদীনং ৰসেন অপরিচ্ছিন্নপুব্বাপরকোটি ন সক্কা ৰত্তুং। সংসরণং সংসারো। পচ্ছিমাপি ন পঞ্ঞাযতি অন্ধবালানং ৰসেনাতি অধিপ্পাযো। তেনাহ ভগৰা ‘‘দীঘো বালান সংসারো’’তি (ধ॰ প॰ ৬০)। ৰেমজ্ঝেযেৰ পন সত্তা সংসরন্তি পুব্বাপরকোটীনং অলব্ভনীযত্তা। অত্থো পরিত্তো হোতি যথাভূতাৰবোধাভাৰতো। বুদ্ধসমযেতি সাসনেতি অত্থো। অত্থো মহা যথাভূতাৰবোধিসম্ভৰতো, অত্থস্স ৰিপুলতায তংসদিসা উপমা নত্থীতি পরিত্তংযেৰ উপমং আহরন্তীতি অধিপ্পাযো। ইদানি ৰুত্তমেৰত্থং ‘‘পাল়িযং হী’’তিআদিনা সমত্থেতি। মাতু মাতরোতি মাতু মাতামহিযো। তস্সেৰাতি দুক্খস্সেৰ। তিব্বন্তি দুক্খপরিযাযোতি।
124. Upasaggo samāsavisaye sasādhanaṃ kiriyaṃ dassetīti vuttaṃ ‘‘ñāṇena anugantvāpī’’ti. Vassasataṃ vassasahassanti nidassanamattametaṃ, tato bhiyyopi anugantvā anamataggo eva saṃsāro. Agga-saddo idha mariyādavacano, anuddesikañcetaṃ vacananti āha ‘‘aparicchinnapubbāparakoṭiko’’ti. Aññathā antimabhavikaparicchinnakatavimuttiparipācanīyadhammādīnaṃ vasena aparicchinnapubbāparakoṭi na sakkā vattuṃ. Saṃsaraṇaṃ saṃsāro. Pacchimāpi na paññāyati andhabālānaṃ vasenāti adhippāyo. Tenāha bhagavā ‘‘dīgho bālāna saṃsāro’’ti (dha. pa. 60). Vemajjheyeva pana sattā saṃsaranti pubbāparakoṭīnaṃ alabbhanīyattā. Attho paritto hoti yathābhūtāvabodhābhāvato. Buddhasamayeti sāsaneti attho. Attho mahā yathābhūtāvabodhisambhavato, atthassa vipulatāya taṃsadisā upamā natthīti parittaṃyeva upamaṃ āharantīti adhippāyo. Idāni vuttamevatthaṃ ‘‘pāḷiyaṃ hī’’tiādinā samattheti. Mātu mātaroti mātu mātāmahiyo. Tassevāti dukkhasseva. Tibbanti dukkhapariyāyoti.
তিণকট্ঠসুত্তৰণ্ণনা নিট্ঠিতা।
Tiṇakaṭṭhasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. তিণকট্ঠসুত্তং • 1. Tiṇakaṭṭhasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. তিণকট্ঠসুত্তৰণ্ণনা • 1. Tiṇakaṭṭhasuttavaṇṇanā
