| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
៥០. កិង្កណិបុប្ផវគ្គោ
50. Kiṅkaṇipupphavaggo
១. តិកិង្កណិបុប្ផិយត្ថេរអបទានំ
1. Tikiṅkaṇipupphiyattheraapadānaṃ
១.
1.
‘‘កណិការំវ ជោតន្តំ, និសិន្នំ បព្ពតន្តរេ;
‘‘Kaṇikāraṃva jotantaṃ, nisinnaṃ pabbatantare;
អទ្ទសំ វិរជំ ពុទ្ធំ, វិបស្សិំ លោកនាយកំ។
Addasaṃ virajaṃ buddhaṃ, vipassiṃ lokanāyakaṃ.
២.
2.
‘‘តីណិ កិង្កណិបុប្ផានិ, បគ្គយ្ហ អភិរោបយិំ;
‘‘Tīṇi kiṅkaṇipupphāni, paggayha abhiropayiṃ;
សម្ពុទ្ធមភិបូជេត្វា, គច្ឆាមិ ទក្ខិណាមុខោ។
Sambuddhamabhipūjetvā, gacchāmi dakkhiṇāmukho.
៣.
3.
‘‘តេន កម្មេន សុកតេន, ចេតនាបណិធីហិ ច;
‘‘Tena kammena sukatena, cetanāpaṇidhīhi ca;
ជហិត្វា មានុសំ ទេហំ, តាវតិំសមគច្ឆហំ។
Jahitvā mānusaṃ dehaṃ, tāvatiṃsamagacchahaṃ.
៤.
4.
‘‘ឯកនវុតិតោ កប្បេ, យំ ពុទ្ធមភិបូជយិំ;
‘‘Ekanavutito kappe, yaṃ buddhamabhipūjayiṃ;
ទុគ្គតិំ នាភិជានាមិ, ពុទ្ធបូជាយិទំ ផលំ។
Duggatiṃ nābhijānāmi, buddhapūjāyidaṃ phalaṃ.
៥.
5.
‘‘កិលេសា ឈាបិតា មយ្ហំ, ភវា សព្ពេ សមូហតា;
‘‘Kilesā jhāpitā mayhaṃ, bhavā sabbe samūhatā;
នាគោវ ពន្ធនំ ឆេត្វា, វិហរាមិ អនាសវោ។
Nāgova bandhanaṃ chetvā, viharāmi anāsavo.
៦.
6.
‘‘ស្វាគតំ វត មេ អាសិ, មម ពុទ្ធស្ស សន្តិកេ;
‘‘Svāgataṃ vata me āsi, mama buddhassa santike;
តិស្សោ វិជ្ជា អនុប្បត្តា, កតំ ពុទ្ធស្ស សាសនំ។
Tisso vijjā anuppattā, kataṃ buddhassa sāsanaṃ.
៧.
7.
‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;
‘‘Paṭisambhidā catasso, vimokkhāpi ca aṭṭhime;
ឆឡភិញ្ញា សច្ឆិកតា, កតំ ពុទ្ធស្ស សាសនំ’’។
Chaḷabhiññā sacchikatā, kataṃ buddhassa sāsanaṃ’’.
ឥត្ថំ សុទំ អាយស្មា តិកិង្កណិបុប្ផិយោ ថេរោ ឥមា
Itthaṃ sudaṃ āyasmā tikiṅkaṇipupphiyo thero imā
គាថាយោ អភាសិត្ថាតិ។
Gāthāyo abhāsitthāti.
តិកិង្កណិបុប្ផិយត្ថេរស្សាបទានំ បឋមំ។
Tikiṅkaṇipupphiyattherassāpadānaṃ paṭhamaṃ.
