| Library / Tipiṭaka / तिपिटक • Tipiṭaka / अपदानपाळि • Apadānapāḷi |
५०. किङ्कणिपुप्फवग्गो
50. Kiṅkaṇipupphavaggo
१. तिकिङ्कणिपुप्फियत्थेरअपदानं
1. Tikiṅkaṇipupphiyattheraapadānaṃ
१.
1.
‘‘कणिकारंव जोतन्तं, निसिन्नं पब्बतन्तरे।
‘‘Kaṇikāraṃva jotantaṃ, nisinnaṃ pabbatantare;
अद्दसं विरजं बुद्धं, विपस्सिं लोकनायकं॥
Addasaṃ virajaṃ buddhaṃ, vipassiṃ lokanāyakaṃ.
२.
2.
‘‘तीणि किङ्कणिपुप्फानि, पग्गय्ह अभिरोपयिं।
‘‘Tīṇi kiṅkaṇipupphāni, paggayha abhiropayiṃ;
सम्बुद्धमभिपूजेत्वा, गच्छामि दक्खिणामुखो॥
Sambuddhamabhipūjetvā, gacchāmi dakkhiṇāmukho.
३.
3.
‘‘तेन कम्मेन सुकतेन, चेतनापणिधीहि च।
‘‘Tena kammena sukatena, cetanāpaṇidhīhi ca;
जहित्वा मानुसं देहं, तावतिंसमगच्छहं॥
Jahitvā mānusaṃ dehaṃ, tāvatiṃsamagacchahaṃ.
४.
4.
‘‘एकनवुतितो कप्पे, यं बुद्धमभिपूजयिं।
‘‘Ekanavutito kappe, yaṃ buddhamabhipūjayiṃ;
दुग्गतिं नाभिजानामि, बुद्धपूजायिदं फलं॥
Duggatiṃ nābhijānāmi, buddhapūjāyidaṃ phalaṃ.
५.
5.
‘‘किलेसा झापिता मय्हं, भवा सब्बे समूहता।
‘‘Kilesā jhāpitā mayhaṃ, bhavā sabbe samūhatā;
नागोव बन्धनं छेत्वा, विहरामि अनासवो॥
Nāgova bandhanaṃ chetvā, viharāmi anāsavo.
६.
6.
‘‘स्वागतं वत मे आसि, मम बुद्धस्स सन्तिके।
‘‘Svāgataṃ vata me āsi, mama buddhassa santike;
तिस्सो विज्जा अनुप्पत्ता, कतं बुद्धस्स सासनं॥
Tisso vijjā anuppattā, kataṃ buddhassa sāsanaṃ.
७.
7.
‘‘पटिसम्भिदा चतस्सो, विमोक्खापि च अट्ठिमे।
‘‘Paṭisambhidā catasso, vimokkhāpi ca aṭṭhime;
छळभिञ्ञा सच्छिकता, कतं बुद्धस्स सासनं’’॥
Chaḷabhiññā sacchikatā, kataṃ buddhassa sāsanaṃ’’.
इत्थं सुदं आयस्मा तिकिङ्कणिपुप्फियो थेरो इमा
Itthaṃ sudaṃ āyasmā tikiṅkaṇipupphiyo thero imā
गाथायो अभासित्थाति।
Gāthāyo abhāsitthāti.
तिकिङ्कणिपुप्फियत्थेरस्सापदानं पठमं।
Tikiṅkaṇipupphiyattherassāpadānaṃ paṭhamaṃ.
