| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā |
೩. ತಿಕನಿದ್ದೇಸವಣ್ಣನಾ
3. Tikaniddesavaṇṇanā
೯೧. ಸೇಸಸಂವರಭೇದೇನಾತಿ ಕಾಯಿಕವಾಚಸಿಕವೀತಿಕ್ಕಮತೋ ಸೇಸೇನ ಸಂವರವಿನಾಸೇನ। ಸೋ ಪನ ದ್ವಾರವಸೇನ ವುಚ್ಚಮಾನೋ ಮನೋದ್ವಾರಿಕೋ ಹೋತೀತಿ ಆಹ ‘‘ಮನೋಸಂವರಭೇದೇನಾ’’ತಿ। ಇದಾನಿ ತಂ ಪಕಾರಭೇದೇನ ದಸ್ಸೇನ್ತೋ ‘‘ಸತಿಸಂವರಾದಿಭೇದೇನ ವಾ’’ತಿ ಆಹ, ಮುಟ್ಠಸಚ್ಚಾದಿಪ್ಪವತ್ತಿಯಾತಿ ಅತ್ಥೋ। ಯಂ ಕಿಞ್ಚಿ ಸಭಾವಭೂತಂ ಚರಿತಮ್ಪಿ ‘‘ಸೀಲ’’ನ್ತಿ ವುಚ್ಚತೀತಿ ಅಕುಸಲಸ್ಸಪಿ ಸೀಲಪರಿಯಾಯೋ ವುತ್ತೋ।
91. Sesasaṃvarabhedenāti kāyikavācasikavītikkamato sesena saṃvaravināsena. So pana dvāravasena vuccamāno manodvāriko hotīti āha ‘‘manosaṃvarabhedenā’’ti. Idāni taṃ pakārabhedena dassento ‘‘satisaṃvarādibhedena vā’’ti āha, muṭṭhasaccādippavattiyāti attho. Yaṃ kiñci sabhāvabhūtaṃ caritampi ‘‘sīla’’nti vuccatīti akusalassapi sīlapariyāyo vutto.
೯೪. ಸಮಾನವಿಸಯಾನನ್ತಿ ಪಠಮಫಲಾದಿಕೋ ಸಮಾನೋ ಏವರೂಪೋ ವಿಸಯೋ ಏತೇಸನ್ತಿ ಸಮಾನವಿಸಯಾ, ತೇಸಂ।
94. Samānavisayānanti paṭhamaphalādiko samāno evarūpo visayo etesanti samānavisayā, tesaṃ.
೧೦೭. ತದತ್ಥೋ ತಪ್ಪಯೋಜನೋ ಲೋಕುತ್ತರಸಾಧಕೋತಿ ಅತ್ಥೋ। ತಸ್ಸ ಪರಮತ್ಥಸಾಸನಸ್ಸ। ಮೂಲೇಕದೇಸತ್ತಾತಿ ಮೂಲಭಾವೇನ ಏಕದೇಸತ್ತಾ।
107. Tadattho tappayojano lokuttarasādhakoti attho. Tassa paramatthasāsanassa. Mūlekadesattāti mūlabhāvena ekadesattā.
೧೧೮. ಉನ್ನಳೋ ಉಗ್ಗತತುಚ್ಛಮಾನೋ।
118. Unnaḷo uggatatucchamāno.
೧೨೩. ಸೀಲಸ್ಸ ಅನುಗ್ಗಣ್ಹನಂ ಅಪರಿಸುದ್ಧಿಯಂ ಸೋಧನಂ ಅಪಾರಿಪೂರಿಯಂ ಪೂರಣಞ್ಚಾತಿ ಆಹ ‘‘ಸೋಧೇತಬ್ಬೇ ಚ ವಡ್ಢೇತಬ್ಬೇ ಚಾ’’ತಿ। ಅಧಿಸೀಲಂ ನಿಸ್ಸಾಯಾತಿ ಅಧಿಸೀಲಂ ನಿಸ್ಸಯಂ ಕತ್ವಾ ಉಪ್ಪನ್ನಪಞ್ಞಾಯ।
123. Sīlassa anuggaṇhanaṃ aparisuddhiyaṃ sodhanaṃ apāripūriyaṃ pūraṇañcāti āha ‘‘sodhetabbe ca vaḍḍhetabbe cā’’ti. Adhisīlaṃ nissāyāti adhisīlaṃ nissayaṃ katvā uppannapaññāya.
೧೨೪. ಗೂಥಸದಿಸತ್ತಮೇವ ದಸ್ಸೇತಿ, ನ ಗೂಥಕೂಪಸದಿಸತ್ತನ್ತಿ ಅಧಿಪ್ಪಾಯೋ। ಗೂಥವಸೇನೇವ ಹಿ ಕೂಪಸ್ಸಪಿ ಜಿಗುಚ್ಛನೀಯತಾತಿ। ಅಯಞ್ಚ ಅತ್ಥೋ ಗೂಥರಾಸಿಯೇವ ಗೂಥಕೂಪೋತಿ ಇಮಸ್ಮಿಂ ಪಕ್ಖೇ ನವತ್ತಬ್ಬೋ ಸಿಯಾ।
124. Gūthasadisattameva dasseti, na gūthakūpasadisattanti adhippāyo. Gūthavaseneva hi kūpassapi jigucchanīyatāti. Ayañca attho gūtharāsiyeva gūthakūpoti imasmiṃ pakkhe navattabbo siyā.
೧೩೦. ಸರಭಙ್ಗಸತ್ಥಾರಾದಯೋ ರೂಪಭವಾದಿಕಾಮಾದಿಪರಿಞ್ಞಂ ಕತ್ವಾ ಪಞ್ಞಪೇನ್ತೋ ಲೋಕಿಯಂ ಪರಿಞ್ಞಂ ಸಮ್ಮದೇವ ಪಞ್ಞಪೇನ್ತೀತಿ ಆಹ ‘‘ಯೇಭುಯ್ಯೇನ ನ ಸಕ್ಕೋನ್ತೀ’’ತಿ। ಅಸಮತ್ಥಭಾವಂ ವಾ ಸನ್ಧಾಯ ನೋ ಚ ಪಞ್ಞಾಪೇತುಂ ಸಕ್ಕೋನ್ತೀತಿ ವುತ್ತನ್ತಿ ಯೋಜನಾ।
130. Sarabhaṅgasatthārādayo rūpabhavādikāmādipariññaṃ katvā paññapento lokiyaṃ pariññaṃ sammadeva paññapentīti āha ‘‘yebhuyyena na sakkontī’’ti. Asamatthabhāvaṃ vā sandhāya no ca paññāpetuṃ sakkontīti vuttanti yojanā.
ತಿಕನಿದ್ದೇಸವಣ್ಣನಾ ನಿಟ್ಠಿತಾ।
Tikaniddesavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಪುಗ್ಗಲಪಞ್ಞತ್ತಿಪಾಳಿ • Puggalapaññattipāḷi / ೩. ತಿಕಪುಗ್ಗಲಪಞ್ಞತ್ತಿ • 3. Tikapuggalapaññatti
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೩. ತಿಕನಿದ್ದೇಸವಣ್ಣನಾ • 3. Tikaniddesavaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೩. ತಿಕನಿದ್ದೇಸವಣ್ಣನಾ • 3. Tikaniddesavaṇṇanā
