| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၄-၆. တိကဏ္ဍကီသုတ္တာဒိဝဏ္ဏနာ
4-6. Tikaṇḍakīsuttādivaṇṇanā
၁၄၄-၆. စတုတ္ထေ ပဋိကူလေတိ အမနုညေ အနိဋ္ဌေ။ အပ္ပဋိကူလသညီတိ ဣဋ္ဌာကာရေနေဝ ပဝတ္တစိတ္တော။ ဣဋ္ဌသ္မိံ ဝတ္ထုသ္မိံ အသုဘာယ ဝာ ဖရတိ, အနိစ္စတော ဝာ ဥပသံဟရတိ ဥပနေတိ ပဝတ္တေတိ။ အနိဋ္ဌသ္မိံ ဝတ္ထုသ္မိန္တိ အနိဋ္ဌေ သတ္တသညိတေ အာရမ္မဏေ။ မေတ္တာယ ဝာ ဖရတီတိ မေတ္တံ ဟိတေသိတံ ဥပသံဟရန္တော သဗ္ဗတ္ထကမေဝ ဝာ တတ္ထ ဖရတိ။ ဓာတုတော ဝာ ဥပသံဟရတီတိ ဓမ္မသဘာဝစိန္တနေန ဓာတုတော ပစ္စဝေက္ခဏာယ ဓာတုမနသိကာရံ ဝာ တတ္ထ ပဝတ္တေတိ။ တဒုဘယံ အဘိနိဝဇ္ဇေတ္ဝာတိ သဘာဝတော အာနုဘာဝတော စ ဥပတိဋ္ဌန္တံ အာရမ္မဏေ ပဋိကူလဘာဝံ အပ္ပဋိကူလဘာဝဉ္စာတိ တံ ဥဘယံ ပဟာယ အဂ္ဂဟေတ္ဝာ, သဗ္ဗသ္မိံ ပန တသ္မိံ မဇ္ဈတ္တော ဟုတ္ဝာတိ ဝုတ္တံ ဟောတိ။ မဇ္ဈတ္တော ဟုတ္ဝာ ဝိဟရိတုကာမော ပန ကိံ ကရောတီတိ? ဣဋ္ဌာနိဋ္ဌေသု အာပာထံ ဂတေသု နေဝ သောမနသ္သိတော ဟောတိ, န ဒောမနသ္သိတော ဟောတိ။ ဥပေက္ခကော ဝိဟရေယ္ယာတိ ဣဋ္ဌေ အရဇ္ဇန္တော အနိဋ္ဌေ အဒုသ္သန္တော ယထာ အညေ အသမပေက္ခနေန မောဟံ ဥပ္ပာဒေန္တိ, ဧဝံ အနုပ္ပာဒေန္တော ဆသု အာရမ္မဏေသု ဆဠင္ဂုပေက္ခာယ ဥပေက္ခကော ဝိဟရေယ္ယ။ တေနေဝာဟ ‘‘ဆဠင္ဂုပေက္ခာဝသေန ပဉ္စမော’’တိ။ ဣဋ္ဌာနိဋ္ဌဆဠာရမ္မဏာပာထေ ပရိသုဒ္ဓပကတိဘာဝာဝိဇဟနလက္ခဏာယ ဆသု ဒ္ဝာရေသု ပဝတ္တနတော ‘‘ဆဠင္ဂုပေက္ခာ’’တိ လဒ္ဓနာမာယ တတ္ရမဇ္ဈတ္တုပေက္ခာယ ဝသေန ပဉ္စမော ဝာရော ဝုတ္တောတိ အတ္ထော။ ပဉ္စမံ ဆဋ္ဌဉ္စ ဥတ္တာနမေဝ။
144-6. Catutthe paṭikūleti amanuññe aniṭṭhe. Appaṭikūlasaññīti iṭṭhākāreneva pavattacitto. Iṭṭhasmiṃ vatthusmiṃ asubhāya vā pharati, aniccato vā upasaṃharati upaneti pavatteti. Aniṭṭhasmiṃ vatthusminti aniṭṭhe sattasaññite ārammaṇe. Mettāya vā pharatīti mettaṃ hitesitaṃ upasaṃharanto sabbatthakameva vā tattha pharati. Dhātuto vā upasaṃharatīti dhammasabhāvacintanena dhātuto paccavekkhaṇāya dhātumanasikāraṃ vā tattha pavatteti. Tadubhayaṃ abhinivajjetvāti sabhāvato ānubhāvato ca upatiṭṭhantaṃ ārammaṇe paṭikūlabhāvaṃ appaṭikūlabhāvañcāti taṃ ubhayaṃ pahāya aggahetvā, sabbasmiṃ pana tasmiṃ majjhatto hutvāti vuttaṃ hoti. Majjhatto hutvā viharitukāmo pana kiṃ karotīti? Iṭṭhāniṭṭhesu āpāthaṃ gatesu neva somanassito hoti, na domanassito hoti. Upekkhako vihareyyāti iṭṭhe arajjanto aniṭṭhe adussanto yathā aññe asamapekkhanena mohaṃ uppādenti, evaṃ anuppādento chasu ārammaṇesu chaḷaṅgupekkhāya upekkhako vihareyya. Tenevāha ‘‘chaḷaṅgupekkhāvasena pañcamo’’ti. Iṭṭhāniṭṭhachaḷārammaṇāpāthe parisuddhapakatibhāvāvijahanalakkhaṇāya chasu dvāresu pavattanato ‘‘chaḷaṅgupekkhā’’ti laddhanāmāya tatramajjhattupekkhāya vasena pañcamo vāro vuttoti attho. Pañcamaṃ chaṭṭhañca uttānameva.
တိကဏ္ဍကီသုတ္တာဒိဝဏ္ဏနာ နိဋ္ဌိတာ။
Tikaṇḍakīsuttādivaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya
၄. တိကဏ္ဍကီသုတ္တံ • 4. Tikaṇḍakīsuttaṃ
၅. နိရယသုတ္တံ • 5. Nirayasuttaṃ
၆. မိတ္တသုတ္တံ • 6. Mittasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā)
၄. တိကဏ္ဍကီသုတ္တဝဏ္ဏနာ • 4. Tikaṇḍakīsuttavaṇṇanā
၆. မိတ္တသုတ္တဝဏ္ဏနာ • 6. Mittasuttavaṇṇanā
