| Library / Tipiṭaka / తిపిటక • Tipiṭaka / పఞ్చపకరణ-అట్ఠకథా • Pañcapakaraṇa-aṭṭhakathā |
౪. తికదుకపట్ఠానవణ్ణనా
4. Tikadukapaṭṭhānavaṇṇanā
తికదుకపట్ఠానేపి కుసలం హేతుం ధమ్మం పటిచ్చ కుసలో హేతు ధమ్మో ఉప్పజ్జతి హేతుపచ్చయాతి పఞ్హామత్తుద్ధారవసేనేవ దేసనా కతా. తత్థ యథా హేట్ఠా హేతుదుకేన సద్ధిం కుసలపదం యోజేత్వా సబ్బపచ్చయవసేన సబ్బవారేసు సఙ్ఖేపతో దేసనా కతా, ఏవమిధ కుసలత్తికేన సద్ధిం హేతుపదం యోజేత్వా సబ్బపచ్చయవసేన సబ్బవారేసు సఙ్ఖేపతో దేసనా కతా. యథా చ హేతుపదం, ఏవం నహేతుపదమ్పి కుసలత్తికేన సద్ధిం యోజేత్వా కుసలత్తికహేతుదుకం నిట్ఠాపితం. తతో పరం సుఖాయ వేదనాయ సమ్పయుత్తం హేతుం ధమ్మన్తిఆదినా నయేన వేదనాత్తికహేతుదుకాదీని ఏకవీసతి తికదుకాని దస్సితాని.
Tikadukapaṭṭhānepi kusalaṃ hetuṃ dhammaṃ paṭicca kusalo hetu dhammo uppajjati hetupaccayāti pañhāmattuddhāravaseneva desanā katā. Tattha yathā heṭṭhā hetudukena saddhiṃ kusalapadaṃ yojetvā sabbapaccayavasena sabbavāresu saṅkhepato desanā katā, evamidha kusalattikena saddhiṃ hetupadaṃ yojetvā sabbapaccayavasena sabbavāresu saṅkhepato desanā katā. Yathā ca hetupadaṃ, evaṃ nahetupadampi kusalattikena saddhiṃ yojetvā kusalattikahetudukaṃ niṭṭhāpitaṃ. Tato paraṃ sukhāya vedanāya sampayuttaṃ hetuṃ dhammantiādinā nayena vedanāttikahetudukādīni ekavīsati tikadukāni dassitāni.
ఏవం బావీసతియా తికేహి సద్ధిం హేతుదుకం యోజేత్వా పున తేహియేవ సద్ధిం సహేతుకదుకాదయో సరణదుకపరియోసానా లబ్భమానవసేన సబ్బదుకా యోజితా. ఇధాపి యం యం పదం యోజనం న గచ్ఛతి, తం తం పాళియంయేవ పటిక్ఖిత్తం. ఏవం దుకసతం గహేత్వా ద్వావీసతియా తికేసు పక్ఖిపిత్వా తికదుకపట్ఠానం నామ దేసితం. తత్రాపి యేన యేన నయేన పాళి సఙ్ఖిత్తా, సో సో నయో విత్థారతో వేదితబ్బో.
Evaṃ bāvīsatiyā tikehi saddhiṃ hetudukaṃ yojetvā puna tehiyeva saddhiṃ sahetukadukādayo saraṇadukapariyosānā labbhamānavasena sabbadukā yojitā. Idhāpi yaṃ yaṃ padaṃ yojanaṃ na gacchati, taṃ taṃ pāḷiyaṃyeva paṭikkhittaṃ. Evaṃ dukasataṃ gahetvā dvāvīsatiyā tikesu pakkhipitvā tikadukapaṭṭhānaṃ nāma desitaṃ. Tatrāpi yena yena nayena pāḷi saṅkhittā, so so nayo vitthārato veditabbo.
తికదుకపట్ఠానవణ్ణనా.
Tikadukapaṭṭhānavaṇṇanā.
