| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៧. ថេរបដិសន្ទហនាបដិសន្ទហនបញ្ហោ
7. Therapaṭisandahanāpaṭisandahanapañho
៧. រាជា អាហ ‘‘ភន្តេ នាគសេន, ត្វំ បន បដិសន្ទហិស្សសី’’តិ? ‘‘អលំ, មហារាជ, កិំ តេ តេន បុច្ឆិតេន, ននុ មយា បដិកច្ចេវ អក្ខាតំ ‘សចេ, មហារាជ, សឧបាទានោ ភវិស្សាមិ , បដិសន្ទហិស្សាមិ, សចេ អនុបាទានោ ភវិស្សាមិ, ន បដិសន្ទហិស្សាមី’’’តិ។
7. Rājā āha ‘‘bhante nāgasena, tvaṃ pana paṭisandahissasī’’ti? ‘‘Alaṃ, mahārāja, kiṃ te tena pucchitena, nanu mayā paṭikacceva akkhātaṃ ‘sace, mahārāja, saupādāno bhavissāmi , paṭisandahissāmi, sace anupādāno bhavissāmi, na paṭisandahissāmī’’’ti.
‘‘ឱបម្មំ ករោហី’’តិ។ ‘‘យថា, មហារាជ, កោចិទេវ បុរិសោ រញ្ញោ អធិការំ ករេយ្យ។ រាជា តុដ្ឋោ អធិការំ ទទេយ្យ, សោ តេន អធិការេន បញ្ចហិ កាមគុណេហិ សមប្បិតោ សមង្គិភូតោ បរិចរេយ្យ, សោ ចេ ជនស្ស អារោចេយ្យ ‘ន មេ រាជា កិញ្ចិ បដិករោតី’ តិ។ កិំ នុ ខោ សោ, មហារាជ, បុរិសោ យុត្តការី ភវេយ្យា’’តិ? ‘‘ន ហិ ភន្តេ’’តិ។ ‘‘ឯវមេវ ខោ, មហារាជ , កិំ តេ តេន បុច្ឆិតេន, ននុ មយា បដិកច្ចេវ អក្ខាតំ ‘សចេ សឧបាទានោ ភវិស្សាមិ, បដិសន្ទហិស្សាមិ, សចេ អនុបាទានោ ភវិស្សាមិ, ន បដិសន្ទហិស្សាមី’’’តិ។
‘‘Opammaṃ karohī’’ti. ‘‘Yathā, mahārāja, kocideva puriso rañño adhikāraṃ kareyya. Rājā tuṭṭho adhikāraṃ dadeyya, so tena adhikārena pañcahi kāmaguṇehi samappito samaṅgibhūto paricareyya, so ce janassa āroceyya ‘na me rājā kiñci paṭikarotī’ ti. Kiṃ nu kho so, mahārāja, puriso yuttakārī bhaveyyā’’ti? ‘‘Na hi bhante’’ti. ‘‘Evameva kho, mahārāja , kiṃ te tena pucchitena, nanu mayā paṭikacceva akkhātaṃ ‘sace saupādāno bhavissāmi, paṭisandahissāmi, sace anupādāno bhavissāmi, na paṭisandahissāmī’’’ti.
‘‘កល្លោសិ, ភន្តេ នាគសេនា’’តិ។
‘‘Kallosi, bhante nāgasenā’’ti.
ថេរបដិសន្ទហនាបដិសន្ទហនបញ្ហោ សត្តមោ។
Therapaṭisandahanāpaṭisandahanapañho sattamo.
