| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১০. থেরনামকসুত্তৰণ্ণনা
10. Theranāmakasuttavaṇṇanā
২৪৪. অতীতে খন্ধপঞ্চকেতি অতীতে অত্তভাৰে। ছন্দরাগপ্পহানেনাতি ছন্দরাগস্স অচ্চন্তমেৰ জহনেন। পহীনং নাম হোতি অনপেক্খপরিচ্চাগতো। পটিনিস্সট্ঠং নাম হোতি সব্বসো ছড্ডিতত্তা। তযো ভৰেতি ইমিনা উপাদিণ্ণকধম্মানংযেৰ গহণং। সব্বা খন্ধাযতনধাতুযো চাতি ইমিনা উপাদিণ্ণানম্পি অনুপাদিণ্ণানম্পি দ্ৰিধা পৰত্তলোকিযধম্মানং গহণং অৰিসেসেত্ৰা ৰুত্তত্তা। ৰিদিতং পাকটং কত্ৰা ঠিতং পরিঞ্ঞাভিসমযৰসেন। তেস্ৰেৰাতি তেভূমকধম্মেসু এৰ। অনুপলিত্তং অমথিতং অসংকিলিট্ঠং তণ্হাদিট্ঠিসংকিলেসাভাৰতো। তদেৰ সব্বন্তি হেট্ঠা তীসুপি পদেসু ইধ সব্বগ্গহণেন গহিতং তেভূমকৰট্টং। জহিত্ৰাতি পহানাভিসমযৰসেন। তণ্হা খীযতি এত্থাতি তণ্হক্খযসঙ্খাতে নিব্বানে ৰিমুত্তং। তমহন্তি তং উত্তমপুগ্গলং একৰিহারিং ব্রূমি তণ্হাদুতিযস্স অভাৰতো। এত্থ চ পরিঞ্ঞাপহানাভিসমযকথনেন ইতরম্পি অভিসমযং অত্থতো কথিতমেৰাতি দট্ঠব্বং।
244.Atīte khandhapañcaketi atīte attabhāve. Chandarāgappahānenāti chandarāgassa accantameva jahanena. Pahīnaṃ nāma hoti anapekkhapariccāgato. Paṭinissaṭṭhaṃ nāma hoti sabbaso chaḍḍitattā. Tayobhaveti iminā upādiṇṇakadhammānaṃyeva gahaṇaṃ. Sabbā khandhāyatanadhātuyo cāti iminā upādiṇṇānampi anupādiṇṇānampi dvidhā pavattalokiyadhammānaṃ gahaṇaṃ avisesetvā vuttattā. Viditaṃ pākaṭaṃ katvā ṭhitaṃ pariññābhisamayavasena. Tesvevāti tebhūmakadhammesu eva. Anupalittaṃ amathitaṃ asaṃkiliṭṭhaṃ taṇhādiṭṭhisaṃkilesābhāvato. Tadeva sabbanti heṭṭhā tīsupi padesu idha sabbaggahaṇena gahitaṃ tebhūmakavaṭṭaṃ. Jahitvāti pahānābhisamayavasena. Taṇhā khīyati etthāti taṇhakkhayasaṅkhāte nibbāne vimuttaṃ. Tamahanti taṃ uttamapuggalaṃ ekavihāriṃ brūmi taṇhādutiyassa abhāvato. Ettha ca pariññāpahānābhisamayakathanena itarampi abhisamayaṃ atthato kathitamevāti daṭṭhabbaṃ.
থেরনামকসুত্তৰণ্ণনা নিট্ঠিতা।
Theranāmakasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১০. থেরনামকসুত্তং • 10. Theranāmakasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. থেরনামকসুত্তৰণ্ণনা • 10. Theranāmakasuttavaṇṇanā
