| Library / Tipiṭaka / ತಿಪಿಟಕ • Tipiṭaka / ಕಥಾವತ್ಥುಪಾಳಿ • Kathāvatthupāḷi |
೧೭. ಸತ್ತರಸಮವಗ್ಗೋ
17. Sattarasamavaggo
(೧೭೦) ೫. ಠಪೇತ್ವಾ ಅರಿಯಮಗ್ಗನ್ತಿಕಥಾ
(170) 5. Ṭhapetvā ariyamaggantikathā
೭೮೯. ಠಪೇತ್ವಾ ಅರಿಯಮಗ್ಗಂ ಅವಸೇಸಾ ಸಙ್ಖಾರಾ ದುಕ್ಖಾತಿ? ಆಮನ್ತಾ। ದುಕ್ಖಸಮುದಯೋಪಿ ದುಕ್ಖೋತಿ? ನ ಹೇವಂ ವತ್ತಬ್ಬೇ…ಪೇ॰… ದುಕ್ಖಸಮುದಯೋಪಿ ದುಕ್ಖೋತಿ? ಆಮನ್ತಾ। ತೀಣೇವ ಅರಿಯಸಚ್ಚಾನೀತಿ? ನ ಹೇವಂ ವತ್ತಬ್ಬೇ…ಪೇ॰… ತೀಣೇವ ಅರಿಯಸಚ್ಚಾನೀತಿ? ಆಮನ್ತಾ। ನನು ಚತ್ತಾರಿ ಅರಿಯಸಚ್ಚಾನಿ ವುತ್ತಾನಿ ಭಗವತಾ – ದುಕ್ಖಂ, ದುಕ್ಖಸಮುದಯೋ, ದುಕ್ಖನಿರೋಧೋ, ದುಕ್ಖನಿರೋಧಗಾಮಿನೀ ಪಟಿಪದಾತಿ? ಆಮನ್ತಾ। ಹಞ್ಚಿ ಚತ್ತಾರಿ ಅರಿಯಸಚ್ಚಾನಿ ವುತ್ತಾನಿ ಭಗವತಾ – ದುಕ್ಖಂ, ದುಕ್ಖಸಮುದಯೋ, ದುಕ್ಖನಿರೋಧೋ, ದುಕ್ಖನಿರೋಧಗಾಮಿನೀ ಪಟಿಪದಾ; ನೋ ಚ ವತ ರೇ ವತ್ತಬ್ಬೇ – ‘‘ತೀಣೇವ ಅರಿಯಸಚ್ಚಾನೀ’’ತಿ।
789. Ṭhapetvā ariyamaggaṃ avasesā saṅkhārā dukkhāti? Āmantā. Dukkhasamudayopi dukkhoti? Na hevaṃ vattabbe…pe… dukkhasamudayopi dukkhoti? Āmantā. Tīṇeva ariyasaccānīti? Na hevaṃ vattabbe…pe… tīṇeva ariyasaccānīti? Āmantā. Nanu cattāri ariyasaccāni vuttāni bhagavatā – dukkhaṃ, dukkhasamudayo, dukkhanirodho, dukkhanirodhagāminī paṭipadāti? Āmantā. Hañci cattāri ariyasaccāni vuttāni bhagavatā – dukkhaṃ, dukkhasamudayo, dukkhanirodho, dukkhanirodhagāminī paṭipadā; no ca vata re vattabbe – ‘‘tīṇeva ariyasaccānī’’ti.
ದುಕ್ಖಸಮುದಯೋಪಿ ದುಕ್ಖೋತಿ? ಆಮನ್ತಾ। ಕೇನಟ್ಠೇನಾತಿ? ಅನಿಚ್ಚಟ್ಠೇನ। ಅರಿಯಮಗ್ಗೋ ಅನಿಚ್ಚೋತಿ? ಆಮನ್ತಾ। ಅರಿಯಮಗ್ಗೋ ದುಕ್ಖೋತಿ? ನ ಹೇವಂ ವತ್ತಬ್ಬೇ…ಪೇ॰…।
Dukkhasamudayopi dukkhoti? Āmantā. Kenaṭṭhenāti? Aniccaṭṭhena. Ariyamaggo aniccoti? Āmantā. Ariyamaggo dukkhoti? Na hevaṃ vattabbe…pe….
ಅರಿಯಮಗ್ಗೋ ಅನಿಚ್ಚೋ, ಸೋ ಚ ನ ದುಕ್ಖೋತಿ? ಆಮನ್ತಾ। ದುಕ್ಖಸಮುದಯೋ ಅನಿಚ್ಚೋ, ಸೋ ಚ ನ ದುಕ್ಖೋತಿ? ನ ಹೇವಂ ವತ್ತಬ್ಬೇ…ಪೇ॰… ದುಕ್ಖಸಮುದಯೋ ಅನಿಚ್ಚೋ, ಸೋ ಚ ದುಕ್ಖೋತಿ? ಆಮನ್ತಾ। ಅರಿಯಮಗ್ಗೋ ಅನಿಚ್ಚೋ, ಸೋ ಚ ದುಕ್ಖೋತಿ? ನ ಹೇವಂ ವತ್ತಬ್ಬೇ…ಪೇ॰…।
Ariyamaggo anicco, so ca na dukkhoti? Āmantā. Dukkhasamudayo anicco, so ca na dukkhoti? Na hevaṃ vattabbe…pe… dukkhasamudayo anicco, so ca dukkhoti? Āmantā. Ariyamaggo anicco, so ca dukkhoti? Na hevaṃ vattabbe…pe….
೭೯೦. ನ ವತ್ತಬ್ಬಂ – ‘‘ಠಪೇತ್ವಾ ಅರಿಯಮಗ್ಗಂ ಅವಸೇಸಾ ಸಙ್ಖಾರಾ ದುಕ್ಖಾ’’ತಿ? ಆಮನ್ತಾ। ನನು ಸಾ ದುಕ್ಖನಿರೋಧಗಾಮಿನೀ ಪಟಿಪದಾತಿ? ಆಮನ್ತಾ। ಹಞ್ಚಿ ಸಾ ದುಕ್ಖನಿರೋಧಗಾಮಿನೀ ಪಟಿಪದಾ, ತೇನ ವತ ರೇ ವತ್ತಬ್ಬೇ – ‘‘ಠಪೇತ್ವಾ ಅರಿಯಮಗ್ಗಂ ಅವಸೇಸಾ ಸಙ್ಖಾರಾ ದುಕ್ಖಾ’’ತಿ।
790. Na vattabbaṃ – ‘‘ṭhapetvā ariyamaggaṃ avasesā saṅkhārā dukkhā’’ti? Āmantā. Nanu sā dukkhanirodhagāminī paṭipadāti? Āmantā. Hañci sā dukkhanirodhagāminī paṭipadā, tena vata re vattabbe – ‘‘ṭhapetvā ariyamaggaṃ avasesā saṅkhārā dukkhā’’ti.
ಠಪೇತ್ವಾ ಅರಿಯಮಗ್ಗನ್ತಿಕಥಾ ನಿಟ್ಠಿತಾ।
Ṭhapetvā ariyamaggantikathā niṭṭhitā.
Related texts:
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೫. ಠಪೇತ್ವಾ ಅರಿಯಮಗ್ಗನ್ತಿಕಥಾವಣ್ಣನಾ • 5. Ṭhapetvā ariyamaggantikathāvaṇṇanā
