| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៣. តេជង្គបញ្ហោ
3. Tejaṅgapañho
៣. ‘‘ភន្តេ នាគសេន, ‘តេជស្ស បញ្ច អង្គានិ គហេតព្ពានី’តិ យំ វទេសិ, កតមានិ តានិ បញ្ច អង្គានិ គហេតព្ពានី’’តិ? ‘‘យថា, មហារាជ, តេជោ តិណកដ្ឋសាខាបលាសំ ឌហតិ, ឯវមេវ ខោ, មហារាជ, យោគិនា យោគាវចរេន យេ តេ អព្ភន្តរា វា ពាហិរា វា កិលេសា ឥដ្ឋានិដ្ឋារម្មណានុភវនា, សព្ពេ តេ ញាណគ្គិនា ឌហិតព្ពា។ ឥទំ, មហារាជ, តេជស្ស បឋមំ អង្គំ គហេតព្ពំ។
3. ‘‘Bhante nāgasena, ‘tejassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, tejo tiṇakaṭṭhasākhāpalāsaṃ ḍahati, evameva kho, mahārāja, yoginā yogāvacarena ye te abbhantarā vā bāhirā vā kilesā iṭṭhāniṭṭhārammaṇānubhavanā, sabbe te ñāṇagginā ḍahitabbā. Idaṃ, mahārāja, tejassa paṭhamaṃ aṅgaṃ gahetabbaṃ.
‘‘បុន ចបរំ, មហារាជ, តេជោ និទ្ទយោ អការុណិកោ, ឯវមេវ ខោ, មហារាជ, យោគិនា យោគាវចរេន សព្ពកិលេសេសុ ការុញ្ញានុទ្ទយា ន កាតព្ពា។ ឥទំ, មហារាជ, តេជស្ស ទុតិយំ អង្គំ គហេតព្ពំ។
‘‘Puna caparaṃ, mahārāja, tejo niddayo akāruṇiko, evameva kho, mahārāja, yoginā yogāvacarena sabbakilesesu kāruññānuddayā na kātabbā. Idaṃ, mahārāja, tejassa dutiyaṃ aṅgaṃ gahetabbaṃ.
‘‘បុន ចបរំ, មហារាជ, តេជោ សីតំ បដិហនតិ, ឯវមេវ ខោ, មហារាជ, យោគិនា យោគាវចរេន វីរិយសន្តាបតេជំ អភិជនេត្វា កិលេសា បដិហន្តព្ពា។ ឥទំ, មហារាជ, តេជស្ស តតិយំ អង្គំ គហេតព្ពំ។
‘‘Puna caparaṃ, mahārāja, tejo sītaṃ paṭihanati, evameva kho, mahārāja, yoginā yogāvacarena vīriyasantāpatejaṃ abhijanetvā kilesā paṭihantabbā. Idaṃ, mahārāja, tejassa tatiyaṃ aṅgaṃ gahetabbaṃ.
‘‘បុន ចបរំ, មហារាជ, តេជោ អនុនយប្បដិឃវិប្បមុត្តោ ឧណ្ហមភិជនេតិ, ឯវមេវ ខោ, មហារាជ, យោគិនា យោគាវចរេន អនុនយប្បដិឃវិប្បមុត្តេន តេជោសមេន ចេតសា វិហរិតព្ពំ។ ឥទំ, មហារាជ, តេជស្ស ចតុត្ថំ អង្គំ គហេតព្ពំ។
‘‘Puna caparaṃ, mahārāja, tejo anunayappaṭighavippamutto uṇhamabhijaneti, evameva kho, mahārāja, yoginā yogāvacarena anunayappaṭighavippamuttena tejosamena cetasā viharitabbaṃ. Idaṃ, mahārāja, tejassa catutthaṃ aṅgaṃ gahetabbaṃ.
‘‘បុន ចបរំ, មហារាជ, តេជោ អន្ធការំ វិធមិត្វា 1 អាលោកំ ទស្សយតិ, ឯវមេវ ខោ, មហារាជ, យោគិនា យោគាវចរេន អវិជ្ជន្ធការំ វិធមិត្វា ញាណាលោកំ ទស្សយិតព្ពំ។ ឥទំ, មហារាជ, តេជស្ស បញ្ចមំ អង្គំ គហេតព្ពំ។ ភាសិតម្បេតំ, មហារាជ, ភគវតា ទេវាតិទេវេន សកំ បុត្តំ រាហុលំ ឱវទន្តេន –
‘‘Puna caparaṃ, mahārāja, tejo andhakāraṃ vidhamitvā 2 ālokaṃ dassayati, evameva kho, mahārāja, yoginā yogāvacarena avijjandhakāraṃ vidhamitvā ñāṇālokaṃ dassayitabbaṃ. Idaṃ, mahārāja, tejassa pañcamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena sakaṃ puttaṃ rāhulaṃ ovadantena –
‘តេជោសមំ 3, រាហុល, ភាវនំ ភាវេហិ, តេជោសមំ ហិ តេ, រាហុល, ភាវនំ ភាវយតោ ឧប្បន្នា? មនាបាមនាបា ផស្សា ចិត្តំ ន បរិយាទាយ ឋស្សន្តី’’’តិ។
‘Tejosamaṃ 4, rāhula, bhāvanaṃ bhāvehi, tejosamaṃ hi te, rāhula, bhāvanaṃ bhāvayato uppannā? Manāpāmanāpā phassā cittaṃ na pariyādāya ṭhassantī’’’ti.
តេជង្គបញ្ហោ តតិយោ។
Tejaṅgapañho tatiyo.
Footnotes:
