| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
༣. ཏཏིཡཔཱཊིདེསནཱིཡསིཀྑཱཔདཝཎྞནཱ
3. Tatiyapāṭidesanīyasikkhāpadavaṇṇanā
ལདྡྷསེཀྑསམྨུཏིཀཱནཱིཏི ཉཏྟིདུཏིཡེན ཀམྨེན ལདྡྷསེཀྑསམྨུཏིཀཱནི། ཡཉྷི ཀུལཾ སདྡྷཱཡ ཝཌྜྷཏི, བྷོགེན ཧཱཡཏི, ཨེཝརཱུཔསྶ ཀུལསྶ ཉཏྟིདུཏིཡེན ཀམྨེན སེཀྑསམྨུཏིཾ དེནྟི, ཏཾ སནྡྷཱཡེཏཾ ཝུཏྟཾ།
Laddhasekkhasammutikānīti ñattidutiyena kammena laddhasekkhasammutikāni. Yañhi kulaṃ saddhāya vaḍḍhati, bhogena hāyati, evarūpassa kulassa ñattidutiyena kammena sekkhasammutiṃ denti, taṃ sandhāyetaṃ vuttaṃ.
གྷརཏོ ནཱིཧརིཏྭཱཏི གྷརཏོ ཨཱསནསཱལཾ ཝཱ ཝིཧཱརཾ ཝཱ ཨཱནེཏྭཱ། ཏེནཱཧ ‘‘ཨཱསནསཱལཱདཱིསུ ཝཱ’’ཏི། ཨིམསྶ ‘‘དེནྟཱི’’ཏི ཨིམིནཱ སམྦནྡྷོ། དྭཱརམཱུལེ ཝཱ ཋཔིཏཾ དེནྟཱིཏི དྭཱརམཱུལེ ཋཔིཏཾ པཙྪཱ སམྤཏྟསྶ དེནྟི། བྷིཀྑུཾ པན དིསྭཱ ཨནྟོགེཧཏོ ནཱིཧརིཏྭཱ དིཡྻམཱནཾ ན ཝཊྚཏི། ནིཙྩབྷཏྟཀེཏི ནིཙྩཾ དཱཏབྦབྷཏྟཀེ། སལཱཀབྷཏྟེཏི རུཀྑསཱརམཡཱཡ སལཱཀཱཡ ཝཱ ཝེལུ༹ཝིལཱིཝཏཱལཔཎྞཱདིམཡཱཡ པཊྚིཀཱཡ ཝཱ ‘‘ཨསུཀསྶ ནཱམ སལཱཀབྷཏྟ’’ནྟི ཨེཝཾ ཨཀྑརཱནི ཨུཔནིབནྡྷིཏྭཱ གཱཧཱཔེཏྭཱ དཱཏབྦབྷཏྟེ། པཀྑིཀེཏི ཨེཀསྨིཾ པཀྑེ ཨེཀདིཝསེ དཱཏབྦབྷཏྟེ། ཨུཔོསཐིཀེཏི ཨུཔོསཐེ དཱཏབྦབྷཏྟེ། པཱཊིཔདིཀེཏི པཱཊིཔདདིཝསེ དཱཏབྦབྷཏྟེ།
Gharato nīharitvāti gharato āsanasālaṃ vā vihāraṃ vā ānetvā. Tenāha ‘‘āsanasālādīsu vā’’ti. Imassa ‘‘dentī’’ti iminā sambandho. Dvāramūle vā ṭhapitaṃ dentīti dvāramūle ṭhapitaṃ pacchā sampattassa denti. Bhikkhuṃ pana disvā antogehato nīharitvā diyyamānaṃ na vaṭṭati. Niccabhattaketi niccaṃ dātabbabhattake. Salākabhatteti rukkhasāramayāya salākāya vā veḷuvilīvatālapaṇṇādimayāya paṭṭikāya vā ‘‘asukassa nāma salākabhatta’’nti evaṃ akkharāni upanibandhitvā gāhāpetvā dātabbabhatte. Pakkhiketi ekasmiṃ pakkhe ekadivase dātabbabhatte. Uposathiketi uposathe dātabbabhatte. Pāṭipadiketi pāṭipadadivase dātabbabhatte.
ཏཏིཡཔཱཊིདེསནཱིཡསིཀྑཱཔདཝཎྞནཱ ནིཊྛིཏཱ།
Tatiyapāṭidesanīyasikkhāpadavaṇṇanā niṭṭhitā.
