| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၃. တတိယပာဋိဒေသနီယသိက္ခာပဒဝဏ္ဏနာ
3. Tatiyapāṭidesanīyasikkhāpadavaṇṇanā
လဒ္ဓသေက္ခသမ္မုတိကာနီတိ ဉတ္တိဒုတိယေန ကမ္မေန လဒ္ဓသေက္ခသမ္မုတိကာနိ။ ယဉ္ဟိ ကုလံ သဒ္ဓာယ ဝဍ္ဎတိ, ဘောဂေန ဟာယတိ, ဧဝရူပသ္သ ကုလသ္သ ဉတ္တိဒုတိယေန ကမ္မေန သေက္ခသမ္မုတိံ ဒေန္တိ, တံ သန္ဓာယေတံ ဝုတ္တံ။
Laddhasekkhasammutikānīti ñattidutiyena kammena laddhasekkhasammutikāni. Yañhi kulaṃ saddhāya vaḍḍhati, bhogena hāyati, evarūpassa kulassa ñattidutiyena kammena sekkhasammutiṃ denti, taṃ sandhāyetaṃ vuttaṃ.
ဃရတော နီဟရိတ္ဝာတိ ဃရတော အာသနသာလံ ဝာ ဝိဟာရံ ဝာ အာနေတ္ဝာ။ တေနာဟ ‘‘အာသနသာလာဒီသု ဝာ’’တိ။ ဣမသ္သ ‘‘ဒေန္တီ’’တိ ဣမိနာ သမ္ဗန္ဓော။ ဒ္ဝာရမူလေ ဝာ ဌပိတံ ဒေန္တီတိ ဒ္ဝာရမူလေ ဌပိတံ ပစ္ဆာ သမ္ပတ္တသ္သ ဒေန္တိ။ ဘိက္ခုံ ပန ဒိသ္ဝာ အန္တောဂေဟတော နီဟရိတ္ဝာ ဒိယ္ယမာနံ န ဝဋ္ဋတိ။ နိစ္စဘတ္တကေတိ နိစ္စံ ဒာတဗ္ဗဘတ္တကေ။ သလာကဘတ္တေတိ ရုက္ခသာရမယာယ သလာကာယ ဝာ ဝေဠုဝိလီဝတာလပဏ္ဏာဒိမယာယ ပဋ္ဋိကာယ ဝာ ‘‘အသုကသ္သ နာမ သလာကဘတ္တ’’န္တိ ဧဝံ အက္ခရာနိ ဥပနိဗန္ဓိတ္ဝာ ဂာဟာပေတ္ဝာ ဒာတဗ္ဗဘတ္တေ။ ပက္ခိကေတိ ဧကသ္မိံ ပက္ခေ ဧကဒိဝသေ ဒာတဗ္ဗဘတ္တေ။ ဥပောသထိကေတိ ဥပောသထေ ဒာတဗ္ဗဘတ္တေ။ ပာဋိပဒိကေတိ ပာဋိပဒဒိဝသေ ဒာတဗ္ဗဘတ္တေ။
Gharato nīharitvāti gharato āsanasālaṃ vā vihāraṃ vā ānetvā. Tenāha ‘‘āsanasālādīsu vā’’ti. Imassa ‘‘dentī’’ti iminā sambandho. Dvāramūle vā ṭhapitaṃ dentīti dvāramūle ṭhapitaṃ pacchā sampattassa denti. Bhikkhuṃ pana disvā antogehato nīharitvā diyyamānaṃ na vaṭṭati. Niccabhattaketi niccaṃ dātabbabhattake. Salākabhatteti rukkhasāramayāya salākāya vā veḷuvilīvatālapaṇṇādimayāya paṭṭikāya vā ‘‘asukassa nāma salākabhatta’’nti evaṃ akkharāni upanibandhitvā gāhāpetvā dātabbabhatte. Pakkhiketi ekasmiṃ pakkhe ekadivase dātabbabhatte. Uposathiketi uposathe dātabbabhatte. Pāṭipadiketi pāṭipadadivase dātabbabhatte.
တတိယပာဋိဒေသနီယသိက္ခာပဒဝဏ္ဏနာ နိဋ္ဌိတာ။
Tatiyapāṭidesanīyasikkhāpadavaṇṇanā niṭṭhitā.
