| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
৩. ততিযপাটিদেসনীযসিক্খাপদৰণ্ণনা
3. Tatiyapāṭidesanīyasikkhāpadavaṇṇanā
লদ্ধসেক্খসম্মুতিকানীতি ঞত্তিদুতিযেন কম্মেন লদ্ধসেক্খসম্মুতিকানি। যঞ্হি কুলং সদ্ধায ৰড্ঢতি, ভোগেন হাযতি, এৰরূপস্স কুলস্স ঞত্তিদুতিযেন কম্মেন সেক্খসম্মুতিং দেন্তি, তং সন্ধাযেতং ৰুত্তং।
Laddhasekkhasammutikānīti ñattidutiyena kammena laddhasekkhasammutikāni. Yañhi kulaṃ saddhāya vaḍḍhati, bhogena hāyati, evarūpassa kulassa ñattidutiyena kammena sekkhasammutiṃ denti, taṃ sandhāyetaṃ vuttaṃ.
ঘরতো নীহরিত্ৰাতি ঘরতো আসনসালং ৰা ৰিহারং ৰা আনেত্ৰা। তেনাহ ‘‘আসনসালাদীসু ৰা’’তি। ইমস্স ‘‘দেন্তী’’তি ইমিনা সম্বন্ধো। দ্ৰারমূলে ৰা ঠপিতং দেন্তীতি দ্ৰারমূলে ঠপিতং পচ্ছা সম্পত্তস্স দেন্তি। ভিক্খুং পন দিস্ৰা অন্তোগেহতো নীহরিত্ৰা দিয্যমানং ন ৰট্টতি। নিচ্চভত্তকেতি নিচ্চং দাতব্বভত্তকে। সলাকভত্তেতি রুক্খসারমযায সলাকায ৰা ৰেল়ুৰিলীৰতালপণ্ণাদিমযায পট্টিকায ৰা ‘‘অসুকস্স নাম সলাকভত্ত’’ন্তি এৰং অক্খরানি উপনিবন্ধিত্ৰা গাহাপেত্ৰা দাতব্বভত্তে। পক্খিকেতি একস্মিং পক্খে একদিৰসে দাতব্বভত্তে। উপোসথিকেতি উপোসথে দাতব্বভত্তে। পাটিপদিকেতি পাটিপদদিৰসে দাতব্বভত্তে।
Gharato nīharitvāti gharato āsanasālaṃ vā vihāraṃ vā ānetvā. Tenāha ‘‘āsanasālādīsu vā’’ti. Imassa ‘‘dentī’’ti iminā sambandho. Dvāramūle vā ṭhapitaṃ dentīti dvāramūle ṭhapitaṃ pacchā sampattassa denti. Bhikkhuṃ pana disvā antogehato nīharitvā diyyamānaṃ na vaṭṭati. Niccabhattaketi niccaṃ dātabbabhattake. Salākabhatteti rukkhasāramayāya salākāya vā veḷuvilīvatālapaṇṇādimayāya paṭṭikāya vā ‘‘asukassa nāma salākabhatta’’nti evaṃ akkharāni upanibandhitvā gāhāpetvā dātabbabhatte. Pakkhiketi ekasmiṃ pakkhe ekadivase dātabbabhatte. Uposathiketi uposathe dātabbabhatte. Pāṭipadiketi pāṭipadadivase dātabbabhatte.
ততিযপাটিদেসনীযসিক্খাপদৰণ্ণনা নিট্ঠিতা।
Tatiyapāṭidesanīyasikkhāpadavaṇṇanā niṭṭhitā.
