| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
3. ததியபாராஜிகவண்ணனா
3. Tatiyapārājikavaṇṇanā
யதா² ஞாதபரிஞ்ஞா த⁴ம்மானங் ஸபா⁴வஜானநமேவ ‘‘இத³ங் ரூபங், அயங் வேத³னா’’தி, தீரணபரிஞ்ஞா பன த⁴ம்மஸபா⁴வேன ஸத்³தி⁴ங் அனிச்சாதி³வஸேன பவத்தமானங் ‘‘ரூபங் அனிச்சந்தி வா’’திஆதி³, ஏவமித⁴ ஸத்³தி⁴ங் சேதெத்வா ஏகத்தேனாபி பாணாதிபாதாபா⁴வா ‘‘ஜீவிதா வோரோபெய்யா’’தி வுத்தங். ‘‘மனுஸ்ஸவிக்³க³ஹ’’ந்தி வுத்தத்தா க³ப்³ப⁴ஸெய்யகானங் வஸேன ஸப்³ப³ஸுகு²மஅத்தபா⁴வதோ பட்டா²ய த³ஸ்ஸேதுங் ‘‘கலலதோ பட்டா²யா’’தி ஆஹ. எத்த² ஜீவிதா வோரோபெந்தோ பச்சுப்பன்னதோ வியோஜேதி. தத்த² க²ணபச்சுப்பன்னங் ந ஸக்கா வோரோபேதுங், ஸந்ததிபச்சுப்பன்னங் வா அத்³தா⁴பச்சுப்பன்னங் வா ஸக்கா. கத²ங்? தஸ்மிஞ்ஹி உபக்கமே கதே லத்³தூ⁴பக்கமங் ஜீவிதத³ஸகங் நிருஜ்ஜ²மானங் து³ப்³ப³லஸ்ஸ பரிஹீனவேக³ஸ்ஸ பச்சயோ ஹோதி. ஸந்ததிபச்சுப்பன்னங் யதா² த்³வே தயோ ஜவனவாரே ஜவித்வா நிருஜ்ஜ²தி, அத்³தா⁴பச்சுப்பன்னஞ்ச தத³னுரூபங் கத்வா நிருஜ்ஜ²தி, ததா² பச்சயோ ஹோதி. ததோ ஸந்ததிபச்சுப்பன்னங் வா அத்³தா⁴பச்சுப்பன்னங் வா யதா²பரிச்சி²ன்னகாலங் அபத்வா அந்தராவ நிருஜ்ஜ²தி. ஏவங் தது³ப⁴யம்பி வோரோபேதுங் ஸக்கா. தஸ்மா பச்சுப்பன்னங் வியோஜேதி.
Yathā ñātapariññā dhammānaṃ sabhāvajānanameva ‘‘idaṃ rūpaṃ, ayaṃ vedanā’’ti, tīraṇapariññā pana dhammasabhāvena saddhiṃ aniccādivasena pavattamānaṃ ‘‘rūpaṃ aniccanti vā’’tiādi, evamidha saddhiṃ cetetvā ekattenāpi pāṇātipātābhāvā ‘‘jīvitā voropeyyā’’ti vuttaṃ. ‘‘Manussaviggaha’’nti vuttattā gabbhaseyyakānaṃ vasena sabbasukhumaattabhāvato paṭṭhāya dassetuṃ ‘‘kalalato paṭṭhāyā’’ti āha. Ettha jīvitā voropento paccuppannato viyojeti. Tattha khaṇapaccuppannaṃ na sakkā voropetuṃ, santatipaccuppannaṃ vā addhāpaccuppannaṃ vā sakkā. Kathaṃ? Tasmiñhi upakkame kate laddhūpakkamaṃ jīvitadasakaṃ nirujjhamānaṃ dubbalassa parihīnavegassa paccayo hoti. Santatipaccuppannaṃ yathā dve tayo javanavāre javitvā nirujjhati, addhāpaccuppannañca tadanurūpaṃ katvā nirujjhati, tathā paccayo hoti. Tato santatipaccuppannaṃ vā addhāpaccuppannaṃ vā yathāparicchinnakālaṃ apatvā antarāva nirujjhati. Evaṃ tadubhayampi voropetuṃ sakkā. Tasmā paccuppannaṃ viyojeti.
‘‘இமஸ்ஸ பனத்த²ஸ்ஸா’’தி வோஹாரவஸேன வுத்தமத்த²ங் பரமத்த²வஸேன ஆவிபா⁴வத்த²ங் ‘‘பாணோ வேதி³தப்³போ³’’திஆதி³ வுத்தங். காயவிஞ்ஞத்திஸஹிதாய சேதனாய பயுஜ்ஜதீதி பயோகோ³, கோ ஸோ? ஸரீரே ஸத்தா²தீ³னங் க³மனங் பஹரணந்தி காயவசீவிஞ்ஞத்திஸஹிதாய சேதனாய பரஸரீரே ஸத்த²பாதனங். தூ³ரே டி²தந்தி தூ³ரே வா திட்ட²து, ஸமீபே வா. ஹத்த²தோ முத்தேன பஹாரோ நிஸ்ஸக்³கி³யோ. தத்தா²தி நிஸ்ஸக்³கி³யப்பயோகே³. யோ கோசி மரதூதி எத்த² மஹாஜனஸமூஹே ந ஸக்கா. யஸ்ஸூபரி ஸரோ பததி, தஸ்ஸேவ ஜீவிதமரணங் காதுங், ந யஸ்ஸ கஸ்ஸசி ஜீவிதமரணங். ஆணாபனந்தி வசீவிஞ்ஞத்திஸஹிதாய சேதனாய அதி⁴ப்பேதத்த²ஸாத⁴னங். தேனேவ ‘‘ஸாவேதுகாமோ ந ஸாவேதீ’’தி (பாரா॰ 54) வுத்தங். ஆணத்தினியாமகாதி ஆணத்திகப்பயோக³ஸாதி⁴கா. ஏதேஸு ஹி அவிரஜ்ஜி²தேஸு ஏவ ஆணத்திபயோகோ³ ஹோதி, ந அஞ்ஞதா².
‘‘Imassa panatthassā’’ti vohāravasena vuttamatthaṃ paramatthavasena āvibhāvatthaṃ ‘‘pāṇo veditabbo’’tiādi vuttaṃ. Kāyaviññattisahitāya cetanāya payujjatīti payogo, ko so? Sarīre satthādīnaṃ gamanaṃ paharaṇanti kāyavacīviññattisahitāya cetanāya parasarīre satthapātanaṃ. Dūre ṭhitanti dūre vā tiṭṭhatu, samīpe vā. Hatthato muttena pahāro nissaggiyo. Tatthāti nissaggiyappayoge. Yo koci maratūti ettha mahājanasamūhe na sakkā. Yassūpari saro patati, tasseva jīvitamaraṇaṃ kātuṃ, na yassa kassaci jīvitamaraṇaṃ. Āṇāpananti vacīviññattisahitāya cetanāya adhippetatthasādhanaṃ. Teneva ‘‘sāvetukāmo na sāvetī’’ti (pārā. 54) vuttaṃ. Āṇattiniyāmakāti āṇattikappayogasādhikā. Etesu hi avirajjhitesu eva āṇattipayogo hoti, na aññathā.
ரூபூபஹாரோதி எத்த² –
Rūpūpahāroti ettha –
‘‘மமாலாபே⁴ன ஏஸித்தீ², மரதூ’’தி ஸமீபகோ³;
‘‘Mamālābhena esitthī, maratū’’ti samīpago;
து³ட்ட²சித்தோ ஸசே யாதி, ஹோதி ஸோ இத்தி²மாரகோ.
Duṭṭhacitto sace yāti, hoti so itthimārako.
பி⁴க்க²த்தா²ய ஸசே யாதி, ஜானந்தோபி ந மாரகோ;
Bhikkhatthāya sace yāti, jānantopi na mārako;
அனத்தி²கோ ஹி ஸோ தஸ்ஸா, மரணேன உபெக்க²கோ.
Anatthiko hi so tassā, maraṇena upekkhako.
வியோகே³ன ச மே ஜாயா, ஜனநீ ச ந ஜீவதி;
Viyogena ca me jāyā, jananī ca na jīvati;
இதி ஜானங் வியுஞ்ஜந்தோ, தத³த்தி²கோ ஹோதி மாரகோ.
Iti jānaṃ viyuñjanto, tadatthiko hoti mārako.
பப்³ப³ஜ்ஜாதி³னிமித்தஞ்சே, யாதி ஜானங் ந மாரகோ;
Pabbajjādinimittañce, yāti jānaṃ na mārako;
அனத்தி²கோ ஹி ஸோ தஸ்ஸா, மரணேன உபெக்க²கோ.
Anatthiko hi so tassā, maraṇena upekkhako.
ஹாரகஸத்³த³ஸ்ஸ பே⁴த³தோ அத்த²ங் வித்தா²ரெத்வா உப⁴யம்பி ஏகமேவாதி த³ஸ்ஸேதுங் ‘‘ஸத்த²ஞ்ச தங் ஹாரகஞ்சா’’திஆதி³ வுத்தங். ஏதேன தா²வரப்பயோக³ங் த³ஸ்ஸேதி ஸாஹத்தி²காதீ³ஸு பயோகே³ஸு. ‘‘இதி சித்தமனோ’’தி உத்³த⁴ரித்வாபி இதிஸத்³த³ஸ்ஸ அத்தோ² ந தாவ வுத்தோ. கிஞ்சாபி ந வுத்தோ, அதி⁴காரவஸேன பன ஆக³தங் இதிஸத்³த³ங் யோஜெத்வா இதி சித்தஸங்கப்போதி எத்த² ‘‘மரணஸஞ்ஞீ மரணசேதனோ மரணாதி⁴ப்பாயோ’’தி வுத்தத்தா மரணங்யேவ வக்க²தீதி வேதி³தப்³போ³. வுத்தனயேனாதி ச²ப்பயோக³வஸேன. ஸாஹத்தி²கனிஸ்ஸக்³கி³யப்பயோகே³ஸு ஸன்னிட்டா²பகசேதனாய ஸத்தமாய ஸஹ உப்பன்னகாயவிஞ்ஞத்தியா ஸாஹத்தி²கதா வேதி³தப்³பா³. ஆணத்திகே பன ஸத்தஹிபி சேதனாஹி ஸஹ வசீவிஞ்ஞத்திஸம்ப⁴வதோ ஸத்த ஸத்த ஸத்³தா³ ஏகதோ ஹுத்வா ஏகேகக்க²ரபா⁴வங் க³ந்த்வா யத்தகேஹி அக்க²ரேஹி அத்தனோ அதி⁴ப்பாயங் விஞ்ஞாபெந்தி, தத³வஸானக்க²ரஸமுட்டா²பிகாய ஸத்தமசேதனாய ஸஹஜாதவசீவிஞ்ஞத்தியா ஆணத்திகதா வேதி³தப்³பா³.
Hārakasaddassa bhedato atthaṃ vitthāretvā ubhayampi ekamevāti dassetuṃ ‘‘satthañca taṃ hārakañcā’’tiādi vuttaṃ. Etena thāvarappayogaṃ dasseti sāhatthikādīsu payogesu. ‘‘Iti cittamano’’ti uddharitvāpi itisaddassa attho na tāva vutto. Kiñcāpi na vutto, adhikāravasena pana āgataṃ itisaddaṃ yojetvā iti cittasaṅkappoti ettha ‘‘maraṇasaññī maraṇacetano maraṇādhippāyo’’ti vuttattā maraṇaṃyeva vakkhatīti veditabbo. Vuttanayenāti chappayogavasena. Sāhatthikanissaggiyappayogesu sanniṭṭhāpakacetanāya sattamāya saha uppannakāyaviññattiyā sāhatthikatā veditabbā. Āṇattike pana sattahipi cetanāhi saha vacīviññattisambhavato satta satta saddā ekato hutvā ekekakkharabhāvaṃ gantvā yattakehi akkharehi attano adhippāyaṃ viññāpenti, tadavasānakkharasamuṭṭhāpikāya sattamacetanāya sahajātavacīviññattiyā āṇattikatā veditabbā.
ததியபாராஜிகவண்ணனா நிட்டி²தா.
Tatiyapārājikavaṇṇanā niṭṭhitā.
