| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၈. တတိယဩဝာဒသုတ္တဝဏ္ဏနာ
8. Tatiyaovādasuttavaṇṇanā
၁၅၁. အဋ္ဌမေ တထာ ဟိ ပနာတိ ပုဗ္ဗေ သောဝစသ္သတာယ, ဧတရဟိ စ ဒောဝစသ္သတာယ ကာရဏပဋ္ဌပနေ နိပာတော။ တတ္ရာတိ တေသု ထေရေသု။ ကော နာမာယံ ဘိက္ခူတိ ကော နာမော အယံ ဘိက္ခု? ကိံ တိသ္သတ္ထေရော ကိံ နာဂတ္ထေရောတိ? တတ္ရာတိ တသ္မိံ ဧဝံ သက္ကာရေ ကယိရမာနေ။ တထတ္တာယာတိ တထာဘာဝာယ, အာရညိကာဒိဘာဝာယာတိ အတ္ထော။ သဗ္ရဟ္မစာရိကာမောတိ ‘‘ဣမေ မံ ပရိဝာရေတ္ဝာ စရန္တူ’’တိ ဧဝံ ကာမေတိ ဣစ္ဆတိ ပတ္ထေတီတိ သဗ္ရဟ္မစာရိကာမော။ တထတ္တာယာတိ လာဘသက္ကာရနိဗ္ဗတ္တနတ္ထာယ။ ဗ္ရဟ္မစာရုပဒ္ဒဝေနာတိ ယော သဗ္ရဟ္မစာရီနံ စတူသု ပစ္စယေသု အဓိမတ္တစ္ဆန္ဒရာဂော ဥပဒ္ဒဝောတိ ဝုစ္စတိ, တေန ဥပဒ္ဒုတာ။ အဘိပတ္ထနာတိ အဓိမတ္တပတ္ထနာ။ ဗ္ရဟ္မစာရိအဘိပတ္ထနေနာတိ ဗ္ရဟ္မစာရီနံ အဓိမတ္တပတ္ထနာသင္ခာတေန စတုပစ္စယဘာဝေန။ အဋ္ဌမံ။
151. Aṭṭhame tathā hi panāti pubbe sovacassatāya, etarahi ca dovacassatāya kāraṇapaṭṭhapane nipāto. Tatrāti tesu theresu. Ko nāmāyaṃ bhikkhūti ko nāmo ayaṃ bhikkhu? Kiṃ tissatthero kiṃ nāgattheroti? Tatrāti tasmiṃ evaṃ sakkāre kayiramāne. Tathattāyāti tathābhāvāya, āraññikādibhāvāyāti attho. Sabrahmacārikāmoti ‘‘ime maṃ parivāretvā carantū’’ti evaṃ kāmeti icchati patthetīti sabrahmacārikāmo. Tathattāyāti lābhasakkāranibbattanatthāya. Brahmacārupaddavenāti yo sabrahmacārīnaṃ catūsu paccayesu adhimattacchandarāgo upaddavoti vuccati, tena upaddutā. Abhipatthanāti adhimattapatthanā. Brahmacāriabhipatthanenāti brahmacārīnaṃ adhimattapatthanāsaṅkhātena catupaccayabhāvena. Aṭṭhamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၈. တတိယဩဝာဒသုတ္တံ • 8. Tatiyaovādasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၈. တတိယဩဝာဒသုတ္တဝဏ္ဏနာ • 8. Tatiyaovādasuttavaṇṇanā
