| Library / Tipiṭaka / ติปิฎก • Tipiṭaka / วิมานวตฺถุปาฬิ • Vimānavatthupāḷi |
๘. ตติยนาวาวิมานวตฺถุ
8. Tatiyanāvāvimānavatthu
๖๓.
63.
‘‘สุวณฺณจฺฉทนํ นาวํ, นาริ อารุยฺห ติฎฺฐสิ;
‘‘Suvaṇṇacchadanaṃ nāvaṃ, nāri āruyha tiṭṭhasi;
โอคาหสิ โปกฺขรณิํ, ปทฺมํ ฉินฺทสิ ปาณินาฯ
Ogāhasi pokkharaṇiṃ, padmaṃ chindasi pāṇinā.
๖๔.
64.
‘‘กูฎาคารา นิเวสา เต, วิภตฺตา ภาคโส มิตา;
‘‘Kūṭāgārā nivesā te, vibhattā bhāgaso mitā;
๖๕.
65.
‘‘เกน เตตาทิโส วโณฺณ, เกน เต อิธ มิชฺฌติ;
‘‘Kena tetādiso vaṇṇo, kena te idha mijjhati;
อุปฺปชฺชนฺติ จ เต โภคา, เย เกจิ มนโส ปิยาฯ
Uppajjanti ca te bhogā, ye keci manaso piyā.
๖๖.
66.
‘‘ปุจฺฉามิ ตํ เทวิ มหานุภาเว, มนุสฺสภูตา กิมกาสิ ปุญฺญํ;
‘‘Pucchāmi taṃ devi mahānubhāve, manussabhūtā kimakāsi puññaṃ;
เกนาสิ เอวํ ชลิตานุภาวา, วโณฺณ จ เต สพฺพทิสา ปภาสตี’’ติฯ
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
๖๗.
67.
สา เทวตา อตฺตมนา, สมฺพุเทฺธเนว ปุจฺฉิตา;
Sā devatā attamanā, sambuddheneva pucchitā;
ปญฺหํ ปุฎฺฐา วิยากาสิ, ยสฺส กมฺมสฺสิทํ ผลํฯ
Pañhaṃ puṭṭhā viyākāsi, yassa kammassidaṃ phalaṃ.
๖๘.
68.
‘‘อหํ มนุเสฺสสุ มนุสฺสภูตา, ปุริมาย ชาติยา มนุสฺสโลเก;
‘‘Ahaṃ manussesu manussabhūtā, purimāya jātiyā manussaloke;
ทิสฺวาน ภิกฺขู ตสิเต กิลเนฺต, อุฎฺฐาย ปาตุํ อุทกํ อทาสิํฯ
Disvāna bhikkhū tasite kilante, uṭṭhāya pātuṃ udakaṃ adāsiṃ.
๖๙.
69.
‘‘โย เว กิลนฺตาน ปิปาสิตานํ, อุฎฺฐาย ปาตุํ อุทกํ ททาติ;
‘‘Yo ve kilantāna pipāsitānaṃ, uṭṭhāya pātuṃ udakaṃ dadāti;
สีโตทกา ตสฺส ภวนฺติ นโชฺช, ปหูตมลฺยา พหุปุณฺฑรีกาฯ
Sītodakā tassa bhavanti najjo, pahūtamalyā bahupuṇḍarīkā.
๗๐.
70.
‘‘ตํ อาปคา อนุปริยนฺติ สพฺพทา, สีโตทกา วาลุกสนฺถตา นที;
‘‘Taṃ āpagā anupariyanti sabbadā, sītodakā vālukasanthatā nadī;
อมฺพา จ สาลา ติลกา จ ชมฺพุโย, อุทฺทาลกา ปาฎลิโย จ ผุลฺลาฯ
Ambā ca sālā tilakā ca jambuyo, uddālakā pāṭaliyo ca phullā.
๗๑.
71.
‘‘ตํ ภูมิภาเคหิ อุเปตรูปํ, วิมานเสฎฺฐํ ภุสโสภมานํ;
‘‘Taṃ bhūmibhāgehi upetarūpaṃ, vimānaseṭṭhaṃ bhusasobhamānaṃ;
ตสฺสีธ กมฺมสฺส อยํ วิปาโก, เอตาทิสํ ปุญฺญกตา ลภนฺติฯ
Tassīdha kammassa ayaṃ vipāko, etādisaṃ puññakatā labhanti.
๗๒.
72.
‘‘กูฎาคารา นิเวสา เม, วิภตฺตา ภาคโส มิตา;
‘‘Kūṭāgārā nivesā me, vibhattā bhāgaso mitā;
ททฺทลฺลมานา อาภนฺติ, สมนฺตา จตุโร ทิสาฯ
Daddallamānā ābhanti, samantā caturo disā.
๗๓.
73.
‘‘เตน เมตาทิโส วโณฺณ, เตน เม อิธ มิชฺฌติ;
‘‘Tena metādiso vaṇṇo, tena me idha mijjhati;
อุปฺปชฺชนฺติ จ เม โภคา, เย เกจิ มนโส ปิยาฯ
Uppajjanti ca me bhogā, ye keci manaso piyā.
๗๔.
74.
‘‘อกฺขามิ เต พุทฺธ มหานุภาว, มนุสฺสภูตา ยมกาสิ ปุญฺญํ;
‘‘Akkhāmi te buddha mahānubhāva, manussabhūtā yamakāsi puññaṃ;
เตนมฺหิ เอวํ ชลิตานุภาวา, วโณฺณ จ เม สพฺพทิสา ปภาสติ;
Tenamhi evaṃ jalitānubhāvā, vaṇṇo ca me sabbadisā pabhāsati;
เอตสฺส กมฺมสฺส ผลํ มเมทํ, อตฺถาย พุโทฺธ อุทกํ อปายี’’ติ 3ฯ
Etassa kammassa phalaṃ mamedaṃ, atthāya buddho udakaṃ apāyī’’ti 4.
ตติยนาวาวิมานํ อฎฺฐมํฯ
Tatiyanāvāvimānaṃ aṭṭhamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / วิมานวตฺถุ-อฎฺฐกถา • Vimānavatthu-aṭṭhakathā / ๘. ตติยนาวาวิมานวณฺณนา • 8. Tatiyanāvāvimānavaṇṇanā
