| Library / Tipiṭaka / തിപിടക • Tipiṭaka / സംയുത്തനികായ • Saṃyuttanikāya |
൧൦. തതിയകുക്കുടാരാമസുത്തം
10. Tatiyakukkuṭārāmasuttaṃ
൨൦. പാടലിപുത്തനിദാനം. ‘‘‘ബ്രഹ്മചരിയം, ബ്രഹ്മചരിയ’ന്തി, ആവുസോ ആനന്ദ, വുച്ചതി. കതമം നു ഖോ, ആവുസോ, ബ്രഹ്മചരിയം, കതമോ ബ്രഹ്മചാരീ, കതമം ബ്രഹ്മചരിയപരിയോസാന’’ന്തി? ‘‘സാധു സാധു, ആവുസോ ഭദ്ദ! ഭദ്ദകോ ഖോ തേ, ആവുസോ ഭദ്ദ, ഉമ്മങ്ഗോ, ഭദ്ദകം പടിഭാനം, കല്യാണീ പരിപുച്ഛാ. ഏവഞ്ഹി ത്വം, ആവുസോ ഭദ്ദ, പുച്ഛസി – ‘ബ്രഹ്മചരിയം, ബ്രഹ്മചരിയന്തി, ആവുസോ ആനന്ദ, വുച്ചതി. കതമം നു ഖോ, ആവുസോ, ബ്രഹ്മചരിയം, കതമോ ബ്രഹ്മചാരീ, കതമം ബ്രഹ്മചരിയപരിയോസാന’’’ന്തി? ‘‘ഏവമാവുസോ’’തി. ‘‘അയമേവ ഖോ, ആവുസോ, അരിയോ അട്ഠങ്ഗികോ മഗ്ഗോ ബ്രഹ്മചരിയം, സേയ്യഥിദം – സമ്മാദിട്ഠി…പേ॰… സമ്മാസമാധി. യോ ഖോ, ആവുസോ, ഇമിനാ അരിയേന അട്ഠങ്ഗികേന മഗ്ഗേന സമന്നാഗതോ – അയം വുച്ചതി ബ്രഹ്മചാരീ. യോ ഖോ, ആവുസോ, രാഗക്ഖയോ ദോസക്ഖയോ മോഹക്ഖയോ – ഇദം ബ്രഹ്മചരിയപരിയോസാന’’ന്തി. ദസമം.
20. Pāṭaliputtanidānaṃ. ‘‘‘Brahmacariyaṃ, brahmacariya’nti, āvuso ānanda, vuccati. Katamaṃ nu kho, āvuso, brahmacariyaṃ, katamo brahmacārī, katamaṃ brahmacariyapariyosāna’’nti? ‘‘Sādhu sādhu, āvuso bhadda! Bhaddako kho te, āvuso bhadda, ummaṅgo, bhaddakaṃ paṭibhānaṃ, kalyāṇī paripucchā. Evañhi tvaṃ, āvuso bhadda, pucchasi – ‘brahmacariyaṃ, brahmacariyanti, āvuso ānanda, vuccati. Katamaṃ nu kho, āvuso, brahmacariyaṃ, katamo brahmacārī, katamaṃ brahmacariyapariyosāna’’’nti? ‘‘Evamāvuso’’ti. ‘‘Ayameva kho, āvuso, ariyo aṭṭhaṅgiko maggo brahmacariyaṃ, seyyathidaṃ – sammādiṭṭhi…pe… sammāsamādhi. Yo kho, āvuso, iminā ariyena aṭṭhaṅgikena maggena samannāgato – ayaṃ vuccati brahmacārī. Yo kho, āvuso, rāgakkhayo dosakkhayo mohakkhayo – idaṃ brahmacariyapariyosāna’’nti. Dasamaṃ.
തീണി സുത്തന്താനി ഏകനിദാനാനി.വിഹാരവഗ്ഗോ ദുതിയോ.
Tīṇi suttantāni ekanidānāni.Vihāravaggo dutiyo.
തസ്സുദ്ദാനം –
Tassuddānaṃ –
ദ്വേ വിഹാരാ ച സേക്ഖോ ച, ഉപ്പാദാ അപരേ ദുവേ;
Dve vihārā ca sekkho ca, uppādā apare duve;
പരിസുദ്ധേന ദ്വേ വുത്താ, കുക്കുടാരാമേന തയോതി.
Parisuddhena dve vuttā, kukkuṭārāmena tayoti.
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൮-൧൦. പഠമകുക്കുടാരാമസുത്താദിവണ്ണനാ • 8-10. Paṭhamakukkuṭārāmasuttādivaṇṇanā
