| Library / Tipiṭaka / ਤਿਪਿਟਕ • Tipiṭaka / ਮਹਾવਿਭਙ੍ਗ-ਅਟ੍ਠਕਥਾ • Mahāvibhaṅga-aṭṭhakathā |
੩. ਤਤਿਯਕਥਿਨਸਿਕ੍ਖਾਪਦવਣ੍ਣਨਾ
3. Tatiyakathinasikkhāpadavaṇṇanā
੪੯੭. ਤੇਨ ਸਮਯੇਨਾਤਿ ਤਤਿਯਕਥਿਨਸਿਕ੍ਖਾਪਦਂ। ਤਤ੍ਥ ਉਸ੍ਸਾਪੇਤ੍વਾ ਪੁਨਪ੍ਪੁਨਂ વਿਮਜ੍ਜਤੀਤਿ ‘‘વਲੀਸੁ ਨਟ੍ਠਾਸੁ ਇਦਂ ਮਹਨ੍ਤਂ ਭવਿਸ੍ਸਤੀ’’ਤਿ ਮਞ੍ਞਮਾਨੋ ਉਦਕੇਨ ਸਿਞ੍ਚਿਤ੍વਾ ਪਾਦੇਹਿ ਅਕ੍ਕਮਿਤ੍વਾ ਹਤ੍ਥੇਹਿ ਉਸ੍ਸਾਪੇਤ੍વਾ ਉਕ੍ਖਿਪਿਤ੍વਾ ਪਿਟ੍ਠਿਯਂ ਘਂਸਤਿ, ਤਂ ਆਤਪੇ ਸੁਕ੍ਖਂ ਪਠਮਪ੍ਪਮਾਣਮੇવ ਹੋਤਿ। ਸੋ ਪੁਨਪਿ ਤਥਾ ਕਰੋਤਿ, ਤੇਨ વੁਤ੍ਤਂ – ‘‘ਉਸ੍ਸਾਪੇਤ੍વਾ ਪੁਨਪ੍ਪੁਨਂ વਿਮਜ੍ਜਤੀ’’ਤਿ। ਤਂ ਏવਂ ਕਿਲਮਨ੍ਤਂ ਭਗવਾ ਗਨ੍ਧਕੁਟਿਯਂ ਨਿਸਿਨ੍ਨੋવ ਦਿਸ੍વਾ ਨਿਕ੍ਖਮਿਤ੍વਾ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ વਿਯ ਤਤ੍ਥ ਅਗਮਾਸਿ। ਤੇਨ વੁਤ੍ਤਂ – ‘‘ਅਦ੍ਦਸ ਖੋ ਭਗવਾ’’ਤਿਆਦਿ।
497.Tena samayenāti tatiyakathinasikkhāpadaṃ. Tattha ussāpetvā punappunaṃ vimajjatīti ‘‘valīsu naṭṭhāsu idaṃ mahantaṃ bhavissatī’’ti maññamāno udakena siñcitvā pādehi akkamitvā hatthehi ussāpetvā ukkhipitvā piṭṭhiyaṃ ghaṃsati, taṃ ātape sukkhaṃ paṭhamappamāṇameva hoti. So punapi tathā karoti, tena vuttaṃ – ‘‘ussāpetvā punappunaṃ vimajjatī’’ti. Taṃ evaṃ kilamantaṃ bhagavā gandhakuṭiyaṃ nisinnova disvā nikkhamitvā senāsanacārikaṃ āhiṇḍanto viya tattha agamāsi. Tena vuttaṃ – ‘‘addasa kho bhagavā’’tiādi.
੪੯੯-੫੦੦. ਏਕਾਦਸਮਾਸੇਤਿ ਏਕਂ ਪਚ੍ਛਿਮਕਤ੍ਤਿਕਮਾਸਂ ਠਪੇਤ੍વਾ ਸੇਸੇ ਏਕਾਦਸਮਾਸੇ। ਸਤ੍ਤਮਾਸੇਤਿ ਕਤ੍ਤਿਕਮਾਸਂ ਹੇਮਨ੍ਤਿਕੇ ਚ ਚਤ੍ਤਾਰੋਤਿ ਪਞ੍ਚਮਾਸੇ ਠਪੇਤ੍વਾ ਸੇਸੇ ਸਤ੍ਤਮਾਸੇ। ਕਾਲੇਪਿ ਆਦਿਸ੍ਸ ਦਿਨ੍ਨਨ੍ਤਿ ਸਙ੍ਘਸ੍ਸ વਾ ‘‘ਇਦਂ ਅਕਾਲਚੀવਰ’’ਨ੍ਤਿ ਉਦ੍ਦਿਸਿਤ੍વਾ ਦਿਨ੍ਨਂ, ਏਕਪੁਗ੍ਗਲਸ੍ਸ વਾ ‘‘ਇਦਂ ਤੁਯ੍ਹਂ ਦਮ੍ਮੀ’’ਤਿ ਦਿਨ੍ਨਂ।
499-500.Ekādasamāseti ekaṃ pacchimakattikamāsaṃ ṭhapetvā sese ekādasamāse. Sattamāseti kattikamāsaṃ hemantike ca cattāroti pañcamāse ṭhapetvā sese sattamāse. Kālepi ādissa dinnanti saṅghassa vā ‘‘idaṃ akālacīvara’’nti uddisitvā dinnaṃ, ekapuggalassa vā ‘‘idaṃ tuyhaṃ dammī’’ti dinnaṃ.
ਸਙ੍ਘਤੋ વਾਤਿ ਅਤ੍ਤਨੋ ਪਤ੍ਤਭਾਗવਸੇਨ ਸਙ੍ਘਤੋ વਾ ਉਪ੍ਪਜ੍ਜੇਯ੍ਯ। ਗਣਤੋ વਾਤਿ ਇਦਂ ਸੁਤ੍ਤਨ੍ਤਿਕਗਣਸ੍ਸ ਦੇਮ, ਇਦਂ ਆਭਿਧਮ੍ਮਿਕਗਣਸ੍ਸਾਤਿ ਏવਂ ਗਣਸ੍ਸ ਦੇਨ੍ਤਿ। ਤਤੋ ਅਤ੍ਤਨੋ ਪਤ੍ਤਭਾਗવਸੇਨ ਗਣਤੋ વਾ ਉਪ੍ਪਜ੍ਜੇਯ੍ਯ।
Saṅghato vāti attano pattabhāgavasena saṅghato vā uppajjeyya. Gaṇato vāti idaṃ suttantikagaṇassa dema, idaṃ ābhidhammikagaṇassāti evaṃ gaṇassa denti. Tato attano pattabhāgavasena gaṇato vā uppajjeyya.
ਨੋ ਚਸ੍ਸ ਪਾਰਿਪੂਰੀਤਿ ਨੋ ਚੇ ਪਾਰਿਪੂਰੀ ਭવੇਯ੍ਯ, ਯਤ੍ਤਕੇਨ ਕਯਿਰਮਾਨਂ ਅਧਿਟ੍ਠਾਨਚੀવਰਂ ਪਹੋਤਿ, ਤਞ੍ਚੇ ਚੀવਰਂ ਤਤ੍ਤਕਂ ਨ ਭવੇਯ੍ਯ, ਊਨਕਂ ਭવੇਯ੍ਯਾਤਿ ਅਤ੍ਥੋ।
No cassa pāripūrīti no ce pāripūrī bhaveyya, yattakena kayiramānaṃ adhiṭṭhānacīvaraṃ pahoti, tañce cīvaraṃ tattakaṃ na bhaveyya, ūnakaṃ bhaveyyāti attho.
ਪਚ੍ਚਾਸਾ ਹੋਤਿ ਸਙ੍ਘਤੋ વਾਤਿਆਦੀਸੁ ਅਸੁਕਦਿવਸਂ ਨਾਮ ਸਙ੍ਘੋ ਚੀવਰਾਨਿ ਲਭਿਸ੍ਸਤਿ, ਗਣੋ ਲਭਿਸ੍ਸਤਿ, ਤਤੋ ਮੇ ਚੀવਰਂ ਉਪ੍ਪਜ੍ਜਿਸ੍ਸਤੀਤਿ ਏવਂ ਸਙ੍ਘਤੋ વਾ ਗਣਤੋ વਾ ਪਚ੍ਚਾਸਾ ਹੋਤਿ। ਞਾਤਕੇਹਿ ਮੇ ਚੀવਰਤ੍ਥਾਯ ਪੇਸਿਤਂ, ਮਿਤ੍ਤੇਹਿ ਪੇਸਿਤਂ, ਤੇ ਆਗਤਾ ਚੀવਰੇ ਦਸ੍ਸਨ੍ਤੀਤਿ ਏવਂ ਞਾਤਿਤੋ વਾ ਮਿਤ੍ਤਤੋ વਾ ਪਚ੍ਚਾਸਾ ਹੋਤਿ। ਪਂਸੁਕੂਲਂ વਾਤਿ ਏਤ੍ਥ ਪਨ ਪਂਸੁਕੂਲਂ વਾ ਲਚ੍ਛਾਮੀਤਿ ਏવਂ ਪਚ੍ਚਾਸਾ ਹੋਤੀਤਿ ਯੋਜੇਤਬ੍ਬਂ। ਅਤ੍ਤਨੋ વਾ ਧਨੇਨਾਤਿ ਅਤ੍ਤਨੋ ਕਪ੍ਪਾਸਸੁਤ੍ਤਾਦਿਨਾ ਧਨੇਨ, ਅਸੁਕਦਿવਸਂ ਨਾਮ ਲਚ੍ਛਾਮੀਤਿ ਏવਂ વਾ ਪਚ੍ਚਾਸਾ ਹੋਤੀਤਿ ਅਤ੍ਥੋ।
Paccāsā hoti saṅghato vātiādīsu asukadivasaṃ nāma saṅgho cīvarāni labhissati, gaṇo labhissati, tato me cīvaraṃ uppajjissatīti evaṃ saṅghato vā gaṇato vā paccāsā hoti. Ñātakehi me cīvaratthāya pesitaṃ, mittehi pesitaṃ, te āgatā cīvare dassantīti evaṃ ñātito vā mittato vā paccāsā hoti. Paṃsukūlaṃ vāti ettha pana paṃsukūlaṃ vā lacchāmīti evaṃ paccāsā hotīti yojetabbaṃ. Attano vā dhanenāti attano kappāsasuttādinā dhanena, asukadivasaṃ nāma lacchāmīti evaṃ vā paccāsā hotīti attho.
ਤਤੋ ਚੇ ਉਤ੍ਤਰਿ ਨਿਕ੍ਖਿਪੇਯ੍ਯ ਸਤਿਯਾਪਿ ਪਚ੍ਚਾਸਾਯਾਤਿ ਮਾਸਪਰਮਤੋ ਚੇ ਉਤ੍ਤਰਿ ਨਿਕ੍ਖਿਪੇਯ੍ਯ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਨ੍ਤਿ ਅਤ੍ਥੋ। ਏવਂ ਪਨ ਅવਤ੍વਾ ਯਸ੍ਮਾ ਅਨ੍ਤਰਾ ਉਪ੍ਪਜ੍ਜਮਾਨੇ ਪਚ੍ਚਾਸਾਚੀવਰੇ ਮੂਲਚੀવਰਸ੍ਸ ਉਪ੍ਪਨ੍ਨਦਿવਸਤੋ ਯਾવ વੀਸਤਿਮੋ ਦਿવਸੋ ਤਾવ ਉਪ੍ਪਨ੍ਨਂ ਪਚ੍ਚਾਸਾਚੀવਰਂ ਮੂਲਚੀવਰਂ ਅਤ੍ਤਨੋ ਗਤਿਕਂ ਕਰੋਤਿ, ਤਤੋ ਉਦ੍ਧਂ ਮੂਲਚੀવਰਂ ਪਚ੍ਚਾਸਾਚੀવਰਂ ਅਤ੍ਤਨੋ ਗਤਿਕਂ ਕਰੋਤਿ। ਤਸ੍ਮਾ ਤਂ વਿਸੇਸਂ ਦਸ੍ਸੇਤੁਂ ‘‘ਤਦਹੁਪ੍ਪਨ੍ਨੇ ਮੂਲਚੀવਰੇ’’ਤਿਆਦਿਨਾ ਨਯੇਨ ਪਦਭਾਜਨਂ વੁਤ੍ਤਂ, ਤਂ ਉਤ੍ਤਾਨਤ੍ਥਮੇવ।
Tato ce uttari nikkhipeyya satiyāpi paccāsāyāti māsaparamato ce uttari nikkhipeyya, nissaggiyaṃ pācittiyanti attho. Evaṃ pana avatvā yasmā antarā uppajjamāne paccāsācīvare mūlacīvarassa uppannadivasato yāva vīsatimo divaso tāva uppannaṃ paccāsācīvaraṃ mūlacīvaraṃ attano gatikaṃ karoti, tato uddhaṃ mūlacīvaraṃ paccāsācīvaraṃ attano gatikaṃ karoti. Tasmā taṃ visesaṃ dassetuṃ ‘‘tadahuppanne mūlacīvare’’tiādinā nayena padabhājanaṃ vuttaṃ, taṃ uttānatthameva.
વਿਸਭਾਗੇ ਉਪ੍ਪਨ੍ਨੇ ਮੂਲਚੀવਰੇਤਿ ਯਦਿ ਮੂਲਚੀવਰਂ ਸਣ੍ਹਂ, ਪਚ੍ਚਾਸਾਚੀવਰਂ ਥੂਲਂ, ਨ ਸਕ੍ਕਾ ਯੋਜੇਤੁਂ। ਰਤ੍ਤਿਯੋ ਚ ਸੇਸਾ ਹੋਨ੍ਤਿ, ਨ ਤਾવ ਮਾਸੋ ਪੂਰਤਿ , ਨ ਅਕਾਮਾ ਨਿਗ੍ਗਹੇਨ ਚੀવਰਂ ਕਾਰੇਤਬ੍ਬਂ। ਅਞ੍ਞਂ ਪਚ੍ਚਾਸਾਚੀવਰਂ ਲਭਿਤ੍વਾਯੇવ ਕਾਲਬ੍ਭਨ੍ਤਰੇ ਕਾਰੇਤਬ੍ਬਂ। ਪਚ੍ਚਾਸਾਚੀવਰਮ੍ਪਿ ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਤਬ੍ਬਂ। ਅਥ ਮੂਲਚੀવਰਂ ਥੂਲਂ ਹੋਤਿ, ਪਚ੍ਚਾਸਾਚੀવਰਂ ਸਣ੍ਹਂ, ਮੂਲਚੀવਰਂ ਪਰਿਕ੍ਖਾਰਚੋਲ਼ਂ ਅਧਿਟ੍ਠਹਿਤ੍વਾ ਪਚ੍ਚਾਸਾਚੀવਰਮੇવ ਮੂਲਚੀવਰਂ ਕਤ੍વਾ ਠਪੇਤਬ੍ਬਂ। ਤਂ ਪੁਨ ਮਾਸਪਰਿਹਾਰਂ ਲਭਤਿ, ਏਤੇਨੁਪਾਯੇਨ ਯਾવ ਇਚ੍ਛਤਿ ਤਾવ ਅਞ੍ਞਮਞ੍ਞਂ ਮੂਲਚੀવਰਂ ਕਤ੍વਾ ਠਪੇਤੁਂ વਟ੍ਟਤੀਤਿ। ਸੇਸਂ ਉਤ੍ਤਾਨਮੇવ।
Visabhāge uppanne mūlacīvareti yadi mūlacīvaraṃ saṇhaṃ, paccāsācīvaraṃ thūlaṃ, na sakkā yojetuṃ. Rattiyo ca sesā honti, na tāva māso pūrati , na akāmā niggahena cīvaraṃ kāretabbaṃ. Aññaṃ paccāsācīvaraṃ labhitvāyeva kālabbhantare kāretabbaṃ. Paccāsācīvarampi parikkhāracoḷaṃ adhiṭṭhātabbaṃ. Atha mūlacīvaraṃ thūlaṃ hoti, paccāsācīvaraṃ saṇhaṃ, mūlacīvaraṃ parikkhāracoḷaṃ adhiṭṭhahitvā paccāsācīvarameva mūlacīvaraṃ katvā ṭhapetabbaṃ. Taṃ puna māsaparihāraṃ labhati, etenupāyena yāva icchati tāva aññamaññaṃ mūlacīvaraṃ katvā ṭhapetuṃ vaṭṭatīti. Sesaṃ uttānameva.
ਸਮੁਟ੍ਠਾਨਾਦੀਨਿ ਪਠਮਕਥਿਨਸਦਿਸਾਨੇવਾਤਿ।
Samuṭṭhānādīni paṭhamakathinasadisānevāti.
ਤਤਿਯਕਥਿਨਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Tatiyakathinasikkhāpadavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / વਿਨਯਪਿਟਕ • Vinayapiṭaka / ਮਹਾવਿਭਙ੍ਗ • Mahāvibhaṅga / ੩. ਤਤਿਯਕਥਿਨਸਿਕ੍ਖਾਪਦਂ • 3. Tatiyakathinasikkhāpadaṃ
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ੩. ਤਤਿਯਕਥਿਨਸਿਕ੍ਖਾਪਦવਣ੍ਣਨਾ • 3. Tatiyakathinasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ੩. ਤਤਿਯਕਥਿਨਸਿਕ੍ਖਾਪਦવਣ੍ਣਨਾ • 3. Tatiyakathinasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ੩. ਤਤਿਯਕਥਿਨਸਿਕ੍ਖਾਪਦવਣ੍ਣਨਾ • 3. Tatiyakathinasikkhāpadavaṇṇanā
