| Library / Tipiṭaka / တိပိဋက • Tipiṭaka / ဓမ္မသင္ဂဏီ-မူလဋီကာ • Dhammasaṅgaṇī-mūlaṭīkā |
တတိယစတုတ္ထမဂ္ဂဝဏ္ဏနာ
Tatiyacatutthamaggavaṇṇanā
၃၆၂. မဂ္ဂင္ဂာနိ န ပူရေန္တိ အကိစ္စကတ္တာ သမ္မာဒိဋ္ဌိယာတိ အဓိပ္ပာယော။ မာရေန္တော ဂစ္ဆတီတိ ဟိ မဂ္ဂော, န စေတာယ မာရေတဗ္ဗံ အတ္ထီတိ။ မာနသ္သ ဒိဋ္ဌိသဒိသာ ပဝတ္တိ အဟမသ္မီတိ ပဝတ္တမာနသ္သ ဒိဋ္ဌိဋ္ဌာနေ ဌာနံ။ အာလောကသ္သေဝ ပဝတ္တိကာလော ဝိယာတိ စိရပ္ပဝတ္တိံ သန္ဓာယာဟ။ ဧကဒေသသာမညေန ဟိ ယထာဓိပ္ပေတေန ဥပမာ ဟောတီတိ။ ခာရေ ဝာတိ ကဋ္ဌာဒီနံ ခာရစ္ဆာရိကာယံ။ သမ္မဒ္ဒိတ္ဝာတိ ကိလေဒေတ္ဝာ။ ဆန္ဒောတိ တဏ္ဟာ။ အနုသယောတိ တဏ္ဟာ မာနာနုသယော စ။ ဧတသ္မိဉ္စ သုတ္တေ အသမူဟတသ္သ ဂန္ဓသ္သ သမုဂ္ဃာဋနံ ဝိယ အသမူဟတမာနာဒိသမုဂ္ဃာတံ ဒသ္သေန္တေန အညမညေ ကိလေသေ ပဇဟတီတိ ဒသ္သိတန္တိ အာနီတံ, န ယထာဝုတ္တနယေန ဥပမာယ ဝုတ္တတ္တာတိ ဒဋ္ဌဗ္ဗံ။ နိရန္တရံ ပဝတ္တမာနေ စိတ္တေ တသ္သ သံကိလေသဝောဒာနကရာ သာဝဇ္ဇာနဝဇ္ဇာ စေတသိကာ ဥပ္ပဇ္ဇမာနာ တသ္သင္ဂဘူတာ အဝယဝာ ဝိယ ဟောန္တီတိ ‘‘စိတ္တင္ဂဝသေနာ’’တိ ဝုတ္တံ။
362. Maggaṅgāni na pūrenti akiccakattā sammādiṭṭhiyāti adhippāyo. Mārento gacchatīti hi maggo, na cetāya māretabbaṃ atthīti. Mānassa diṭṭhisadisā pavatti ahamasmīti pavattamānassa diṭṭhiṭṭhāne ṭhānaṃ. Ālokasseva pavattikālo viyāti cirappavattiṃ sandhāyāha. Ekadesasāmaññena hi yathādhippetena upamā hotīti. Khāre vāti kaṭṭhādīnaṃ khāracchārikāyaṃ. Sammadditvāti kiledetvā. Chandoti taṇhā. Anusayoti taṇhā mānānusayo ca. Etasmiñca sutte asamūhatassa gandhassa samugghāṭanaṃ viya asamūhatamānādisamugghātaṃ dassentena aññamaññe kilese pajahatīti dassitanti ānītaṃ, na yathāvuttanayena upamāya vuttattāti daṭṭhabbaṃ. Nirantaraṃ pavattamāne citte tassa saṃkilesavodānakarā sāvajjānavajjā cetasikā uppajjamānā tassaṅgabhūtā avayavā viya hontīti ‘‘cittaṅgavasenā’’ti vuttaṃ.
လောကုတ္တရကုသလဝဏ္ဏနာ နိဋ္ဌိတာ။
Lokuttarakusalavaṇṇanā niṭṭhitā.
ကုသလကထာဝဏ္ဏနာ နိဋ္ဌိတာ။
Kusalakathāvaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ဓမ္မသင္ဂဏီပာဠိ • Dhammasaṅgaṇīpāḷi / လောကုတ္တရကုသလံ • Lokuttarakusalaṃ
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ဓမ္မသင္ဂဏိ-အဋ္ဌကထာ • Dhammasaṅgaṇi-aṭṭhakathā / တတိယစတုတ္ထမဂ္ဂာ • Tatiyacatutthamaggā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ဓမ္မသင္ဂဏီ-အနုဋီကာ • Dhammasaṅgaṇī-anuṭīkā / စတုမဂ္ဂနယသဟသ္သဝဏ္ဏနာ • Catumagganayasahassavaṇṇanā
