| Library / Tipiṭaka / තිපිටක • Tipiṭaka / මහාවග්ගපාළි • Mahāvaggapāḷi |
233. තස්සුද්දානං
233. Tassuddānaṃ
රාජගහකො නෙගමො, දිස්වා වෙසාලියං ගණිං;
Rājagahako negamo, disvā vesāliyaṃ gaṇiṃ;
පුන රාජගහං ගන්ත්වා, රඤ්ඤො තං පටිවෙදයි.
Puna rājagahaṃ gantvā, rañño taṃ paṭivedayi.
පුත්තො සාලවතිකාය, අභයස්ස හි අත්රජො;
Putto sālavatikāya, abhayassa hi atrajo;
ජීවතීති කුමාරෙන, සඞ්ඛාතො ජීවකො ඉති.
Jīvatīti kumārena, saṅkhāto jīvako iti.
සො හි තක්කසීලං ගන්ත්වා, උග්ගහෙත්වා මහාභිසො;
So hi takkasīlaṃ gantvā, uggahetvā mahābhiso;
සත්තවස්සිකආබාධං, නත්ථුකම්මෙන නාසයි.
Sattavassikaābādhaṃ, natthukammena nāsayi.
රඤ්ඤො භගන්දලාබාධං, ආලෙපෙන අපාකඩ්ඪි;
Rañño bhagandalābādhaṃ, ālepena apākaḍḍhi;
මමඤ්ච ඉත්ථාගාරඤ්ච, බුද්ධසඞ්ඝං චුපට්ඨහි.
Mamañca itthāgārañca, buddhasaṅghaṃ cupaṭṭhahi.
රාජගහකො ච සෙට්ඨි, අන්තගණ්ඨි තිකිච්ඡිතං;
Rājagahako ca seṭṭhi, antagaṇṭhi tikicchitaṃ;
පජ්ජොතස්ස මහාරොගං, ඝතපානෙන නාසයි.
Pajjotassa mahārogaṃ, ghatapānena nāsayi.
අධිකාරඤ්ච සිවෙය්යං, අභිසන්නං සිනෙහති;
Adhikārañca siveyyaṃ, abhisannaṃ sinehati;
තීහි උප්පලහත්ථෙහි, සමත්තිංසවිරෙචනං.
Tīhi uppalahatthehi, samattiṃsavirecanaṃ.
පකතත්තං වරං යාචි, සිවෙය්යඤ්ච පටිග්ගහි;
Pakatattaṃ varaṃ yāci, siveyyañca paṭiggahi;
චීවරඤ්ච ගිහිදානං, අනුඤ්ඤාසි තථාගතො.
Cīvarañca gihidānaṃ, anuññāsi tathāgato.
රාජගහෙ ජනපදෙ බහුං, උප්පජ්ජි චීවරං;
Rājagahe janapade bahuṃ, uppajji cīvaraṃ;
පාවාරො කොසියඤ්චෙව, කොජවො අඩ්ඪකාසිකං.
Pāvāro kosiyañceva, kojavo aḍḍhakāsikaṃ.
උච්චාවචා ච සන්තුට්ඨි, නාගමෙසාගමෙසුං ච;
Uccāvacā ca santuṭṭhi, nāgamesāgamesuṃ ca;
පඨමං පච්ඡා සදිසා, කතිකා ච පටිහරුං.
Paṭhamaṃ pacchā sadisā, katikā ca paṭiharuṃ.
භණ්ඩාගාරං අගුත්තඤ්ච, වුට්ඨාපෙන්ති තථෙව ච;
Bhaṇḍāgāraṃ aguttañca, vuṭṭhāpenti tatheva ca;
උස්සන්නං කොලාහලඤ්ච, කථං භාජෙ කථං දදෙ.
Ussannaṃ kolāhalañca, kathaṃ bhāje kathaṃ dade.
සකාතිරෙකභාගෙන, පටිවීසො කථං දදෙ;
Sakātirekabhāgena, paṭivīso kathaṃ dade;
ආරොපෙන්තා භාජනඤ්ච, පාතියා ච ඡමාය ච;
Āropentā bhājanañca, pātiyā ca chamāya ca;
උපචිකාමජ්ඣෙ ජීරන්ති, එකතො පත්ථින්නෙන ච.
Upacikāmajjhe jīranti, ekato patthinnena ca.
ඵරුසාච්ඡින්නච්ඡිබන්ධා , අද්දසාසි උබ්භණ්ඩිතෙ;
Pharusācchinnacchibandhā , addasāsi ubbhaṇḍite;
වීමංසිත්වා සක්යමුනි, අනුඤ්ඤාසි තිචීවරං.
Vīmaṃsitvā sakyamuni, anuññāsi ticīvaraṃ.
අඤ්ඤෙන අතිරෙකෙන, උප්පජ්ජි ඡිද්දමෙව ච;
Aññena atirekena, uppajji chiddameva ca;
චාතුද්දීපො වරං යාචි, දාතුං වස්සිකසාටිකං.
Cātuddīpo varaṃ yāci, dātuṃ vassikasāṭikaṃ.
ආගන්තුගමිගිලානං, උපට්ඨාකඤ්ච භෙසජ්ජං;
Āgantugamigilānaṃ, upaṭṭhākañca bhesajjaṃ;
ධුවං උදකසාටිඤ්ච, පණීතං අතිඛුද්දකං.
Dhuvaṃ udakasāṭiñca, paṇītaṃ atikhuddakaṃ.
ථුල්ලකච්ඡුමුඛං ඛොමං, පරිපුණ්ණං අධිට්ඨානං;
Thullakacchumukhaṃ khomaṃ, paripuṇṇaṃ adhiṭṭhānaṃ;
පච්ඡිමං කතො ගරුකො, විකණ්ණො සුත්තමොකිරි.
Pacchimaṃ kato garuko, vikaṇṇo suttamokiri.
ලුජ්ජන්ති නප්පහොන්ති, ච අන්වාධිකං බහූනි ච;
Lujjanti nappahonti, ca anvādhikaṃ bahūni ca;
අන්ධවනෙ අස්සතියා, එකො වස්සං උතුම්හි ච.
Andhavane assatiyā, eko vassaṃ utumhi ca.
ද්වෙ භාතුකා රාජගහෙ, උපනන්දො පුන ද්විසු;
Dve bhātukā rājagahe, upanando puna dvisu;
නග්ගා කුසා වාකචීරං, ඵලකො කෙසකම්බලං;
Naggā kusā vākacīraṃ, phalako kesakambalaṃ;
වාළඋලූකපක්ඛඤ්ච, අජිනං අක්කනාළකං.
Vāḷaulūkapakkhañca, ajinaṃ akkanāḷakaṃ.
පොත්ථකං නීලපීතඤ්ච, ලොහිතං මඤ්ජිට්ඨෙන ච;
Potthakaṃ nīlapītañca, lohitaṃ mañjiṭṭhena ca;
කණ්හා මහාරඞ්ගනාම, අච්ඡින්නදසිකා තථා.
Kaṇhā mahāraṅganāma, acchinnadasikā tathā.
දීඝපුප්ඵඵණදසා , කඤ්චුතිරීටවෙඨනං;
Dīghapupphaphaṇadasā , kañcutirīṭaveṭhanaṃ;
අනුප්පන්නෙ පක්කමති, සඞ්ඝො භිජ්ජති තාවදෙ.
Anuppanne pakkamati, saṅgho bhijjati tāvade.
පක්ඛෙ දදන්ති සඞ්ඝස්ස, ආයස්මා රෙවතො පහි;
Pakkhe dadanti saṅghassa, āyasmā revato pahi;
විස්සාසගාහාධිට්ඨාති, අට්ඨ චීවරමාතිකාති.
Vissāsagāhādhiṭṭhāti, aṭṭha cīvaramātikāti.
ඉමම්හි ඛන්ධකෙ වත්ථූ ඡන්නවුති.
Imamhi khandhake vatthū channavuti.
චීවරක්ඛන්ධකො නිට්ඨිතො.
Cīvarakkhandhako niṭṭhito.
Footnotes:
