| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
২০১. তস্সুদ্দানং
201. Tassuddānaṃ
তিংস পাৰেয্যকা ভিক্খূ, সাকেতুক্কণ্ঠিতা ৰসুং।
Tiṃsa pāveyyakā bhikkhū, sāketukkaṇṭhitā vasuṃ;
ৰস্সংৰুট্ঠোকপুণ্ণেহি, অগমুং জিনদস্সনং॥
Vassaṃvuṭṭhokapuṇṇehi, agamuṃ jinadassanaṃ.
ইদং ৰত্থু কথিনস্স, কপ্পিস্সন্তি চ পঞ্চকা।
Idaṃ vatthu kathinassa, kappissanti ca pañcakā;
অনামন্তা অসমাচারা, তথেৰ গণভোজনং॥
Anāmantā asamācārā, tatheva gaṇabhojanaṃ.
যাৰদত্থঞ্চ উপ্পাদো, অত্থতানং ভৰিস্সতি।
Yāvadatthañca uppādo, atthatānaṃ bhavissati;
ঞত্তি এৰত্থতঞ্চেৰ, এৰঞ্চেৰ অনত্থতং॥
Ñatti evatthatañceva, evañceva anatthataṃ.
উল্লিখি ধোৰনা চেৰ, ৰিচারণঞ্চ ছেদনং।
Ullikhi dhovanā ceva, vicāraṇañca chedanaṃ;
বন্ধনো ৰট্টি কণ্ডুস, দল়্হীকম্মানুৰাতিকা॥
Bandhano vaṭṭi kaṇḍusa, daḷhīkammānuvātikā.
পরিভণ্ডং ওৰদ্ধেয্যং, মদ্দনা নিমিত্তং কথা।
Paribhaṇḍaṃ ovaddheyyaṃ, maddanā nimittaṃ kathā;
কুক্কু সন্নিধি নিস্সগ্গি, ন কপ্পঞ্ঞত্র তে তযো॥
Kukku sannidhi nissaggi, na kappaññatra te tayo.
অঞ্ঞত্র পঞ্চাতিরেকে, সঞ্ছিন্নেন সমণ্ডলী।
Aññatra pañcātireke, sañchinnena samaṇḍalī;
নাঞ্ঞত্র পুগ্গলা সম্মা, নিস্সীমট্ঠোনুমোদতি॥
Nāññatra puggalā sammā, nissīmaṭṭhonumodati.
কথিনানত্থতং হোতি, এৰং বুদ্ধেন দেসিতং।
Kathinānatthataṃ hoti, evaṃ buddhena desitaṃ;
অহতাকপ্পপিলোতি, পংসু পাপণিকায চ॥
Ahatākappapiloti, paṃsu pāpaṇikāya ca.
অনিমিত্তাপরিকথা, অকুক্কু চ অসন্নিধি।
Animittāparikathā, akukku ca asannidhi;
অনিস্সগ্গি কপ্পকতে, তথা তিচীৰরেন চ॥
Anissaggi kappakate, tathā ticīvarena ca.
পঞ্চকে ৰাতিরেকে ৰা, ছিন্নে সমণ্ডলীকতে।
Pañcake vātireke vā, chinne samaṇḍalīkate;
পুগ্গলস্সত্থারা সম্মা, সীমট্ঠো অনুমোদতি॥
Puggalassatthārā sammā, sīmaṭṭho anumodati.
এৰং কথিনত্থরণং, উব্ভারস্সট্ঠমাতিকা।
Evaṃ kathinattharaṇaṃ, ubbhārassaṭṭhamātikā;
পক্কমনন্তি নিট্ঠানং, সন্নিট্ঠানঞ্চ নাসনং॥
Pakkamananti niṭṭhānaṃ, sanniṭṭhānañca nāsanaṃ.
সৰনং আসাৰচ্ছেদি, সীমা সহুব্ভারট্ঠমী।
Savanaṃ āsāvacchedi, sīmā sahubbhāraṭṭhamī;
কতচীৰরমাদায, ‘‘ন পচ্চেস্স’’ন্তি গচ্ছতি॥
Katacīvaramādāya, ‘‘na paccessa’’nti gacchati.
তস্স তং কথিনুদ্ধারা,এ হোতি পক্কমনন্তিকো।
Tassa taṃ kathinuddhārā,e hoti pakkamanantiko;
আদায চীৰরং যাতি, নিস্সীমে ইদং চিন্তযি॥
Ādāya cīvaraṃ yāti, nissīme idaṃ cintayi.
‘‘কারেস্সং ন পচ্চেস্স’’ন্তি, নিট্ঠানে কথিনুদ্ধারো।
‘‘Kāressaṃ na paccessa’’nti, niṭṭhāne kathinuddhāro;
আদায নিস্সীমং নেৰ, ‘‘ন পচ্চেস্স’’ন্তি মানসো॥
Ādāya nissīmaṃ neva, ‘‘na paccessa’’nti mānaso.
তস্স তং কথিনুদ্ধারো, সন্নিট্ঠানন্তিকো ভৰে।
Tassa taṃ kathinuddhāro, sanniṭṭhānantiko bhave;
আদায চীৰরং যাতি, নিস্সীমে ইদং চিন্তযি॥
Ādāya cīvaraṃ yāti, nissīme idaṃ cintayi.
‘‘কারেস্সং ন পচ্চেস্স’’ন্তি, কযিরং তস্স নস্সতি।
‘‘Kāressaṃ na paccessa’’nti, kayiraṃ tassa nassati;
তস্স তং কথিনুদ্ধারো, ভৰতি নাসনন্তিকো॥
Tassa taṃ kathinuddhāro, bhavati nāsanantiko.
আদায যাতি ‘‘পচ্চেস্সং’’, বহি কারেতি চীৰরং।
Ādāya yāti ‘‘paccessaṃ’’, bahi kāreti cīvaraṃ;
কতচীৰরো সুণাতি, উব্ভতং কথিনং তহিং॥
Katacīvaro suṇāti, ubbhataṃ kathinaṃ tahiṃ.
তস্স তং কথিনুদ্ধারো, ভৰতি সৰনন্তিকো।
Tassa taṃ kathinuddhāro, bhavati savanantiko;
আদায যাতি ‘‘পচ্চেস্সং’’, বহি কারেতি চীৰরং॥
Ādāya yāti ‘‘paccessaṃ’’, bahi kāreti cīvaraṃ.
কতচীৰরো বহিদ্ধা, নামেতি কথিনুদ্ধারং।
Katacīvaro bahiddhā, nāmeti kathinuddhāraṃ;
তস্স তং কথিনুদ্ধারো, সীমাতিক্কন্তিকো ভৰে॥
Tassa taṃ kathinuddhāro, sīmātikkantiko bhave.
আদায যাতি ‘‘পচ্চেস্সং’’, বহি কারেতি চীৰরং।
Ādāya yāti ‘‘paccessaṃ’’, bahi kāreti cīvaraṃ;
কতচীৰরো পচ্চেস্সং, সম্ভোতি কথিনুদ্ধারং॥
Katacīvaro paccessaṃ, sambhoti kathinuddhāraṃ.
তস্স তং কথিনুদ্ধারো, সহ ভিক্খূহি জাযতি।
Tassa taṃ kathinuddhāro, saha bhikkhūhi jāyati;
আদায চ সমাদায, সত্ত-সত্তৰিধা গতি॥
Ādāya ca samādāya, satta-sattavidhā gati.
আদায নিস্সীমগতং, কারেস্সং ইতি জাযতি॥
Ādāya nissīmagataṃ, kāressaṃ iti jāyati.
নিট্ঠানং সন্নিট্ঠানঞ্চ, নাসনঞ্চ ইমে তযো।
Niṭṭhānaṃ sanniṭṭhānañca, nāsanañca ime tayo;
আদায ‘‘ন পচ্চেস্স’’ন্তি, বহিসীমে করোমিতি॥
Ādāya ‘‘na paccessa’’nti, bahisīme karomiti.
নিট্ঠানং সন্নিট্ঠানম্পি, নাসনম্পি ইদং তযো।
Niṭṭhānaṃ sanniṭṭhānampi, nāsanampi idaṃ tayo;
অনধিট্ঠিতেন নেৰস্স, হেট্ঠা তীণি নযাৰিধি॥
Anadhiṭṭhitena nevassa, heṭṭhā tīṇi nayāvidhi.
আদায যাতি পচ্চেস্সং, বহিসীমে করোমিতি।
Ādāya yāti paccessaṃ, bahisīme karomiti;
‘‘ন পচ্চেস্স’’ন্তি কারেতি, নিট্ঠানে কথিনুদ্ধারো॥
‘‘Na paccessa’’nti kāreti, niṭṭhāne kathinuddhāro.
সন্নিট্ঠানং নাসনঞ্চ, সৰনসীমাতিক্কমা।
Sanniṭṭhānaṃ nāsanañca, savanasīmātikkamā;
সহ ভিক্খূহি জাযেথ, এৰং পন্নরসং গতি॥
Saha bhikkhūhi jāyetha, evaṃ pannarasaṃ gati.
সমাদায ৰিপ্পকতা, সমাদায পুনা তথা।
Samādāya vippakatā, samādāya punā tathā;
ইমে তে চতুরো ৰারা, সব্বে পন্নরসৰিধি॥
Ime te caturo vārā, sabbe pannarasavidhi.
অনাসায চ আসায, করণীযো চ তে তযো।
Anāsāya ca āsāya, karaṇīyo ca te tayo;
নযতো তং ৰিজানেয্য, তযো দ্ৰাদস দ্ৰাদস॥
Nayato taṃ vijāneyya, tayo dvādasa dvādasa.
পলিবোধাপলিবোধা, উদ্দানং নযতো কতন্তি॥
Palibodhāpalibodhā, uddānaṃ nayato katanti.
ইমম্হি খন্ধকে ৰত্থূ দোল়সকপেয্যালমুখানি একসতং অট্ঠারস।
Imamhi khandhake vatthū doḷasakapeyyālamukhāni ekasataṃ aṭṭhārasa.
কথিনক্খন্ধকো নিট্ঠিতো।
Kathinakkhandhako niṭṭhito.
Footnotes:
