| Library / Tipiṭaka / ཏིཔིཊཀ • Tipiṭaka / པཱཙིཏྱཱདིཡོཛནཱཔཱལི༹ • Pācityādiyojanāpāḷi |
༦. ཏསྶཔཱཔིཡསིཀཱཀཐཱ
6. Tassapāpiyasikākathā
༢༠༧. ཨསུཙཱིཏི ཨེཏྠ ནཏྠི སུཙཱིནི ཀཱཡཝཙཱིཀམྨཱནི ཨེཏསྶཱཏི ཨསུཙཱིཏི ཝཙནཏྠཾ དསྶེནྟོ ཨཱཧ ‘‘ཨསུཙཱིཧི ཀཱཡཝཙཱིཀམྨེཧི སམནྣཱགཏོ’’ཏི ། ཨེསེཝ ནཡོ ཨལཛྫཱིཏི ཨེཏྠཱཔི། སཱནུཝཱདོཏི ཨེཏྠ ཨནུཝཱདཨུཔཝཱདསདྡཱནཾ པརིཡཱཡཏྟཱ ཝུཏྟཾ ‘‘སཨུཔཝཱདོ’’ཏི། ཨིཏི པཉྩཱཏི ཨིམཱནི པཉྩ ཨངྒཱནི། ཨེཏྠཱཏི ཏསྶཔཱཔིཡསིཀཀམྨེ། ཨིདནྟི ཀམྨཾ ཝུཙྩཏཱིཏི སམྦནྡྷོ། ཧཱིཏི ཝིཏྠཱརོ། ཡོ པུགྒལོ པཱཔིཡོཏི ཡོཛནཱ། པཱཔུསྶནྣཏཱཡཱཏི ལཱམཀུསྶནྣཏཱཡ། ཨིམིནཱ ཨཡཉྩ པཱཔོ ཨཡཉྩ པཱཔོ, ཨཡམིམེསཾ ཝིསེསེན པཱཔོཏི པཱཔིཡོཏི ཙ པཱཔཱནཾ ཨཏིསཡེན པཱཔོཏི པཱཔིཡོཏི ཙ ཝཙནཏྠོ དསྶིཏོ། ཏསྶཱཏི པུགྒལསྶ། ཨིམིནཱ ཏསྶ པཱཔིཡསྶ ཀཏྟབྦཾ ཏསྶཔཱཔིཡསིཀཾ, ཏམེཝ ཀམྨཾ ཏསྶཔཱཔིཡསིཀཀམྨནྟི ཝཙནཏྠཾ དསྶེཏི། ཀེསུཙི པོཏྠཀེསུ ཡཀཱརེ དྭེབྷཱཝོ ཨཏྠི, སོ ཨཡུཏྟོཡེཝ། ‘‘ཡེབྷུཡྻསིཀཱ’’ཏི ཨེཏྠ ཡཀཱརེ དྭེབྷཱཝསྶ དསྶནཏོ ཨེཏྠཱཔི དྭེབྷཱཝོ ཡུཏྟོ བྷཝེཡྻཱཏི ལིཁནྟཱིཏི དཊྛབྦཾ།
207.Asucīti ettha natthi sucīni kāyavacīkammāni etassāti asucīti vacanatthaṃ dassento āha ‘‘asucīhi kāyavacīkammehi samannāgato’’ti . Eseva nayo alajjīti etthāpi. Sānuvādoti ettha anuvādaupavādasaddānaṃ pariyāyattā vuttaṃ ‘‘saupavādo’’ti. Iti pañcāti imāni pañca aṅgāni. Etthāti tassapāpiyasikakamme. Idanti kammaṃ vuccatīti sambandho. Hīti vitthāro. Yo puggalo pāpiyoti yojanā. Pāpussannatāyāti lāmakussannatāya. Iminā ayañca pāpo ayañca pāpo, ayamimesaṃ visesena pāpoti pāpiyoti ca pāpānaṃ atisayena pāpoti pāpiyoti ca vacanattho dassito. Tassāti puggalassa. Iminā tassa pāpiyassa kattabbaṃ tassapāpiyasikaṃ, tameva kammaṃ tassapāpiyasikakammanti vacanatthaṃ dasseti. Kesuci potthakesu yakāre dvebhāvo atthi, so ayuttoyeva. ‘‘Yebhuyyasikā’’ti ettha yakāre dvebhāvassa dassanato etthāpi dvebhāvo yutto bhaveyyāti likhantīti daṭṭhabbaṃ.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / ཙཱུལ༹ཝགྒཔཱལི༹ • Cūḷavaggapāḷi / ༦. ཏསྶཔཱཔིཡསིཀཱ • 6. Tassapāpiyasikā
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / ཏསྶཔཱཔིཡསིཀཱཀཐཱ • Tassapāpiyasikākathā
