| Library / Tipiṭaka / तिपिटक • Tipiṭaka / अपदानपाळि • Apadānapāḷi |
१०. तरणियत्थेरअपदानं
10. Taraṇiyattheraapadānaṃ
३९.
39.
‘‘सुवण्णवण्णो सम्बुद्धो, विपस्सी दक्खिणारहो।
‘‘Suvaṇṇavaṇṇo sambuddho, vipassī dakkhiṇāraho;
नदीतीरे ठितो सत्था, भिक्खुसङ्घपुरक्खतो॥
Nadītīre ṭhito satthā, bhikkhusaṅghapurakkhato.
४०.
40.
‘‘नावा न विज्जते तत्थ, सन्तारणी महण्णवे।
‘‘Nāvā na vijjate tattha, santāraṇī mahaṇṇave;
नदिया अभिनिक्खम्म, तारेसिं लोकनायकं॥
Nadiyā abhinikkhamma, tāresiṃ lokanāyakaṃ.
४१.
41.
‘‘एकनवुतितो कप्पे, यं तारेसिं नरुत्तमं।
‘‘Ekanavutito kappe, yaṃ tāresiṃ naruttamaṃ;
दुग्गतिं नाभिजानामि, तरणाय इदं फलं॥
Duggatiṃ nābhijānāmi, taraṇāya idaṃ phalaṃ.
४२.
42.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा तरणियो थेरो इमा गाथायो अभासित्थाति।
Itthaṃ sudaṃ āyasmā taraṇiyo thero imā gāthāyo abhāsitthāti.
तरणियत्थेरस्सापदानं दसमं।
Taraṇiyattherassāpadānaṃ dasamaṃ.
पदुमुक्खिपवग्गो सत्तवीसतिमो।
Padumukkhipavaggo sattavīsatimo.
तस्सुद्दानं –
Tassuddānaṃ –
उक्खिपी तेलचन्दी च, दीपदो च बिळालिदो।
Ukkhipī telacandī ca, dīpado ca biḷālido;
मच्छो जवो सळलदो, रक्खसो तरणो दस।
Maccho javo saḷalado, rakkhaso taraṇo dasa;
गाथायो चेत्थ सङ्खाता, तालीसं चेकमेव चाति॥
Gāthāyo cettha saṅkhātā, tālīsaṃ cekameva cāti.
