| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
១១. តណ្ហាសុត្តំ
11. Taṇhāsuttaṃ
១០៦. ‘‘តិស្សោ ឥមា, ភិក្ខវេ, តណ្ហា បហាតព្ពា, តយោ ច មានា។ កតមា តិស្សោ តណ្ហា បហាតព្ពា? កាមតណ្ហា, ភវតណ្ហា, វិភវតណ្ហា – ឥមា តិស្សោ តណ្ហា បហាតព្ពា។ កតមេ តយោ មានា បហាតព្ពា? មានោ, ឱមានោ, អតិមានោ – ឥមេ តយោ មានា បហាតព្ពា។ យតោ ខោ, ភិក្ខវេ, ភិក្ខុនោ ឥមា តិស្សោ តណ្ហា បហីនា ហោន្តិ, ឥមេ ច តយោ មានា; អយំ វុច្ចតិ, ភិក្ខវេ, ភិក្ខុ អច្ឆេច្ឆិ តណ្ហំ, វិវត្តយិ សំយោជនំ, សម្មា មានាភិសមយា អន្តមកាសិ ទុក្ខស្សា’’តិ។ ឯកាទសមំ។
106. ‘‘Tisso imā, bhikkhave, taṇhā pahātabbā, tayo ca mānā. Katamā tisso taṇhā pahātabbā? Kāmataṇhā, bhavataṇhā, vibhavataṇhā – imā tisso taṇhā pahātabbā. Katame tayo mānā pahātabbā? Māno, omāno, atimāno – ime tayo mānā pahātabbā. Yato kho, bhikkhave, bhikkhuno imā tisso taṇhā pahīnā honti, ime ca tayo mānā; ayaṃ vuccati, bhikkhave, bhikkhu acchecchi taṇhaṃ, vivattayi saṃyojanaṃ, sammā mānābhisamayā antamakāsi dukkhassā’’ti. Ekādasamaṃ.
តស្សុទ្ទានំ –
Tassuddānaṃ –
បាតុភាវោ អានិសំសោ, អនិច្ចទុក្ខអនត្តតោ;
Pātubhāvo ānisaṃso, aniccadukkhaanattato;
និព្ពានំ អនវត្ថិ, ឧក្ខិត្តាសិ អតម្មយោ;
Nibbānaṃ anavatthi, ukkhittāsi atammayo;
ភវា តណ្ហាយេកា ទសាតិ។
Bhavā taṇhāyekā dasāti.
ទុតិយបណ្ណាសកំ សមត្តំ។
Dutiyapaṇṇāsakaṃ samattaṃ.
Footnotes:
Related texts:
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១-១១. បាតុភាវសុត្តាទិវណ្ណនា • 1-11. Pātubhāvasuttādivaṇṇanā
