| Library / Tipiṭaka / තිපිටක • Tipiṭaka / අපදානපාළි • Apadānapāḷi |
20. තමාලපුප්ඵියවග්ගො
20. Tamālapupphiyavaggo
1. තමාලපුප්ඵියත්ථෙරඅපදානං
1. Tamālapupphiyattheraapadānaṃ
1.
1.
‘‘චුල්ලාසීතිසහස්සානි , ථම්භා සොවණ්ණයා අහූ;
‘‘Cullāsītisahassāni , thambhā sovaṇṇayā ahū;
දෙවලට්ඨිපටිභාගං, විමානං මෙ සුනිම්මිතං.
Devalaṭṭhipaṭibhāgaṃ, vimānaṃ me sunimmitaṃ.
2.
2.
‘‘තමාලපුප්ඵං පග්ගය්හ, විප්පසන්නෙන චෙතසා;
‘‘Tamālapupphaṃ paggayha, vippasannena cetasā;
බුද්ධස්ස අභිරොපයිං, සිඛිනො ලොකබන්ධුනො.
Buddhassa abhiropayiṃ, sikhino lokabandhuno.
3.
3.
‘‘එකත්තිංසෙ ඉතො කප්පෙ, යං කම්මමකරිං තදා;
‘‘Ekattiṃse ito kappe, yaṃ kammamakariṃ tadā;
දුග්ගතිං නාභිජානාමි, බුද්ධපූජායිදං ඵලං.
Duggatiṃ nābhijānāmi, buddhapūjāyidaṃ phalaṃ.
4.
4.
‘‘ඉතො වීසතිමෙ කප්පෙ, චන්දතිත්තොති එකකො;
‘‘Ito vīsatime kappe, candatittoti ekako;
සත්තරතනසම්පන්නො, චක්කවත්තී මහබ්බලො.
Sattaratanasampanno, cakkavattī mahabbalo.
5.
5.
‘‘පටිසම්භිදා චතස්සො, විමොක්ඛාපි ච අට්ඨිමෙ;
‘‘Paṭisambhidā catasso, vimokkhāpi ca aṭṭhime;
ඡළභිඤ්ඤා සච්ඡිකතා, කතං බුද්ධස්ස සාසනං’’.
Chaḷabhiññā sacchikatā, kataṃ buddhassa sāsanaṃ’’.
ඉත්ථං සුදං ආයස්මා තමාලපුප්ඵියො ථෙරො ඉමා ගාථායො අභාසිත්ථාති.
Itthaṃ sudaṃ āyasmā tamālapupphiyo thero imā gāthāyo abhāsitthāti.
තමාලපුප්ඵියත්ථෙරස්සාපදානං පඨමං.
Tamālapupphiyattherassāpadānaṃ paṭhamaṃ.
