| Library / Tipiṭaka / ತಿಪಿಟಕ • Tipiṭaka / ಅಪದಾನಪಾಳಿ • Apadānapāḷi |
೨೦. ತಮಾಲಪುಪ್ಫಿಯವಗ್ಗೋ
20. Tamālapupphiyavaggo
೧. ತಮಾಲಪುಪ್ಫಿಯತ್ಥೇರಅಪದಾನಂ
1. Tamālapupphiyattheraapadānaṃ
೧.
1.
‘‘ಚುಲ್ಲಾಸೀತಿಸಹಸ್ಸಾನಿ , ಥಮ್ಭಾ ಸೋವಣ್ಣಯಾ ಅಹೂ।
‘‘Cullāsītisahassāni , thambhā sovaṇṇayā ahū;
ದೇವಲಟ್ಠಿಪಟಿಭಾಗಂ, ವಿಮಾನಂ ಮೇ ಸುನಿಮ್ಮಿತಂ॥
Devalaṭṭhipaṭibhāgaṃ, vimānaṃ me sunimmitaṃ.
೨.
2.
‘‘ತಮಾಲಪುಪ್ಫಂ ಪಗ್ಗಯ್ಹ, ವಿಪ್ಪಸನ್ನೇನ ಚೇತಸಾ।
‘‘Tamālapupphaṃ paggayha, vippasannena cetasā;
ಬುದ್ಧಸ್ಸ ಅಭಿರೋಪಯಿಂ, ಸಿಖಿನೋ ಲೋಕಬನ್ಧುನೋ॥
Buddhassa abhiropayiṃ, sikhino lokabandhuno.
೩.
3.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ।
‘‘Ekattiṃse ito kappe, yaṃ kammamakariṃ tadā;
ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ॥
Duggatiṃ nābhijānāmi, buddhapūjāyidaṃ phalaṃ.
೪.
4.
‘‘ಇತೋ ವೀಸತಿಮೇ ಕಪ್ಪೇ, ಚನ್ದತಿತ್ತೋತಿ ಏಕಕೋ।
‘‘Ito vīsatime kappe, candatittoti ekako;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ॥
Sattaratanasampanno, cakkavattī mahabbalo.
೫.
5.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ।
‘‘Paṭisambhidā catasso, vimokkhāpi ca aṭṭhime;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’॥
Chaḷabhiññā sacchikatā, kataṃ buddhassa sāsanaṃ’’.
ಇತ್ಥಂ ಸುದಂ ಆಯಸ್ಮಾ ತಮಾಲಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ।
Itthaṃ sudaṃ āyasmā tamālapupphiyo thero imā gāthāyo abhāsitthāti.
ತಮಾಲಪುಪ್ಫಿಯತ್ಥೇರಸ್ಸಾಪದಾನಂ ಪಠಮಂ।
Tamālapupphiyattherassāpadānaṃ paṭhamaṃ.
