| Library / Tipiṭaka / तिपिटक • Tipiṭaka / अपदानपाळि • Apadānapāḷi |
२०. तमालपुप्फियवग्गो
20. Tamālapupphiyavaggo
१. तमालपुप्फियत्थेरअपदानं
1. Tamālapupphiyattheraapadānaṃ
१.
1.
‘‘चुल्लासीतिसहस्सानि , थम्भा सोवण्णया अहू।
‘‘Cullāsītisahassāni , thambhā sovaṇṇayā ahū;
देवलट्ठिपटिभागं, विमानं मे सुनिम्मितं॥
Devalaṭṭhipaṭibhāgaṃ, vimānaṃ me sunimmitaṃ.
२.
2.
‘‘तमालपुप्फं पग्गय्ह, विप्पसन्नेन चेतसा।
‘‘Tamālapupphaṃ paggayha, vippasannena cetasā;
बुद्धस्स अभिरोपयिं, सिखिनो लोकबन्धुनो॥
Buddhassa abhiropayiṃ, sikhino lokabandhuno.
३.
3.
‘‘एकत्तिंसे इतो कप्पे, यं कम्ममकरिं तदा।
‘‘Ekattiṃse ito kappe, yaṃ kammamakariṃ tadā;
दुग्गतिं नाभिजानामि, बुद्धपूजायिदं फलं॥
Duggatiṃ nābhijānāmi, buddhapūjāyidaṃ phalaṃ.
४.
4.
‘‘इतो वीसतिमे कप्पे, चन्दतित्तोति एकको।
‘‘Ito vīsatime kappe, candatittoti ekako;
सत्तरतनसम्पन्नो, चक्कवत्ती महब्बलो॥
Sattaratanasampanno, cakkavattī mahabbalo.
५.
5.
‘‘पटिसम्भिदा चतस्सो, विमोक्खापि च अट्ठिमे।
‘‘Paṭisambhidā catasso, vimokkhāpi ca aṭṭhime;
छळभिञ्ञा सच्छिकता, कतं बुद्धस्स सासनं’’॥
Chaḷabhiññā sacchikatā, kataṃ buddhassa sāsanaṃ’’.
इत्थं सुदं आयस्मा तमालपुप्फियो थेरो इमा गाथायो अभासित्थाति।
Itthaṃ sudaṃ āyasmā tamālapupphiyo thero imā gāthāyo abhāsitthāti.
तमालपुप्फियत्थेरस्सापदानं पठमं।
Tamālapupphiyattherassāpadānaṃ paṭhamaṃ.
