| Library / Tipiṭaka / திபிடக • Tipiṭaka / அபதா³னபாளி • Apadānapāḷi |
20. தமாலபுப்பி²யவக்³கோ³
20. Tamālapupphiyavaggo
1. தமாலபுப்பி²யத்தே²ரஅபதா³னங்
1. Tamālapupphiyattheraapadānaṃ
1.
1.
‘‘சுல்லாஸீதிஸஹஸ்ஸானி , த²ம்பா⁴ ஸோவண்ணயா அஹூ;
‘‘Cullāsītisahassāni , thambhā sovaṇṇayā ahū;
தே³வலட்டி²படிபா⁴க³ங், விமானங் மே ஸுனிம்மிதங்.
Devalaṭṭhipaṭibhāgaṃ, vimānaṃ me sunimmitaṃ.
2.
2.
‘‘தமாலபுப்ப²ங் பக்³க³ய்ஹ, விப்பஸன்னேன சேதஸா;
‘‘Tamālapupphaṃ paggayha, vippasannena cetasā;
பு³த்³த⁴ஸ்ஸ அபி⁴ரோபயிங், ஸிகி²னோ லோகப³ந்து⁴னோ.
Buddhassa abhiropayiṃ, sikhino lokabandhuno.
3.
3.
‘‘ஏகத்திங்ஸே இதோ கப்பே, யங் கம்மமகரிங் ததா³;
‘‘Ekattiṃse ito kappe, yaṃ kammamakariṃ tadā;
து³க்³க³திங் நாபி⁴ஜானாமி, பு³த்³த⁴பூஜாயித³ங் ப²லங்.
Duggatiṃ nābhijānāmi, buddhapūjāyidaṃ phalaṃ.
4.
4.
‘‘இதோ வீஸதிமே கப்பே, சந்த³தித்தோதி ஏககோ;
‘‘Ito vīsatime kappe, candatittoti ekako;
ஸத்தரதனஸம்பன்னோ, சக்கவத்தீ மஹப்³ப³லோ.
Sattaratanasampanno, cakkavattī mahabbalo.
5.
5.
‘‘படிஸம்பி⁴தா³ சதஸ்ஸோ, விமொக்கா²பி ச அட்டி²மே;
‘‘Paṭisambhidā catasso, vimokkhāpi ca aṭṭhime;
ச²ளபி⁴ஞ்ஞா ஸச்சி²கதா, கதங் பு³த்³த⁴ஸ்ஸ ஸாஸனங்’’.
Chaḷabhiññā sacchikatā, kataṃ buddhassa sāsanaṃ’’.
இத்த²ங் ஸுத³ங் ஆயஸ்மா தமாலபுப்பி²யோ தே²ரோ இமா கா³தா²யோ அபா⁴ஸித்தா²தி.
Itthaṃ sudaṃ āyasmā tamālapupphiyo thero imā gāthāyo abhāsitthāti.
தமாலபுப்பி²யத்தே²ரஸ்ஸாபதா³னங் பட²மங்.
Tamālapupphiyattherassāpadānaṃ paṭhamaṃ.
