| Library / Tipiṭaka / တိပိဋက • Tipiṭaka / ကင္ခာဝိတရဏီ-ပုရာဏ-ဋီကာ • Kaṅkhāvitaraṇī-purāṇa-ṭīkā |
၅. တလသတ္တိကသိက္ခာပဒဝဏ္ဏနာ
5. Talasattikasikkhāpadavaṇṇanā
တလမေဝ တလသတ္တိကံ။ ‘‘ပောထနသမတ္ထဋ္ဌေန သတ္တိက’’န္တိ ဧကေ။ ယသ္မာ ပဟရိတုကာမတာယ ပဟရတော ပုရိမေန ပာစိတ္တိယံ, ကေဝလံ ဥစ္စာရေတုကာမတာယ ဥဂ္ဂိရဏမတ္တေ ကတေ ဣမိနာ ပာစိတ္တိယံ။ ဣမိနာ ပန ဝိရဇ္ဈိတ္ဝာ ပဟာရော ဒိန္နော, တသ္မာ နပဟရိတုကာမတာယ ဒိန္နတ္တာ ဒုက္ကဋံ။ ကိမိဒံ ဒုက္ကဋံ ပဟာရပစ္စယာ, ဥဒာဟု ဥဂ္ဂိရဏပစ္စယာတိ? ပဟာရပစ္စယာ ဧဝ ဒုက္ကဋံ, ပုရိမံ ဥဂ္ဂိရဏပစ္စယာ ပာစိတ္တိယန္တိ သဒုက္ကဋံ ပာစိတ္တိယံ ယုဇ္ဇတိ။ ပုရိမဉ္ဟိ ဥဂ္ဂိရဏံ, ပစ္ဆာ ပဟာရော။ န စ ပစ္ဆိမံ ပဟာရံ နိသ္သာယ ပုရိမံ ဥဂ္ဂိရဏံ အနာပတ္တိဝတ္ထုကံ ဘဝိတုမရဟတီတိ နော တက္ကောတိ (ဝဇိရ. ဋီ. ပာစိတ္တိယ ၄၅၆) အာစရိယော။
Talameva talasattikaṃ. ‘‘Pothanasamatthaṭṭhena sattika’’nti eke. Yasmā paharitukāmatāya paharato purimena pācittiyaṃ, kevalaṃ uccāretukāmatāya uggiraṇamatte kate iminā pācittiyaṃ. Iminā pana virajjhitvā pahāro dinno, tasmā napaharitukāmatāya dinnattā dukkaṭaṃ. Kimidaṃ dukkaṭaṃ pahārapaccayā, udāhu uggiraṇapaccayāti? Pahārapaccayā eva dukkaṭaṃ, purimaṃ uggiraṇapaccayā pācittiyanti sadukkaṭaṃ pācittiyaṃ yujjati. Purimañhi uggiraṇaṃ, pacchā pahāro. Na ca pacchimaṃ pahāraṃ nissāya purimaṃ uggiraṇaṃ anāpattivatthukaṃ bhavitumarahatīti no takkoti (vajira. ṭī. pācittiya 456) ācariyo.
တလသတ္တိကသိက္ခာပဒဝဏ္ဏနာ နိဋ္ဌိတာ။
Talasattikasikkhāpadavaṇṇanā niṭṭhitā.
