| Library / Tipiṭaka / తిపిటక • Tipiṭaka / అఙ్గుత్తరనికాయ (అట్ఠకథా) • Aṅguttaranikāya (aṭṭhakathā) |
౭. సువిదూరసుత్తవణ్ణనా
7. Suvidūrasuttavaṇṇanā
౪౭. సత్తమే సువిదూరవిదూరానీతి కేనచి పరియాయేన అనాసన్నాని హుత్వా సువిదూరానేవ విదూరాని. నభఞ్చ, భిక్ఖవే, పథవీ చాతి ఆకాసఞ్చ మహాపథవీ చ. తత్థ కిఞ్చాపి పథవితో ఆకాసం నామ న దూరే, ద్వఙ్గులమత్తేపి హోతి. అఞ్ఞమఞ్ఞం అలగ్గనట్ఠేన పన ‘‘సువిదూరవిదూరే’’తి వుత్తం. వేరోచనోతి సూరియో. సతఞ్చ, భిక్ఖవే, ధమ్మోతి చతుసతిపట్ఠానాదిభేదో సత్తతింసబోధిపక్ఖియధమ్మో. అసతఞ్చ ధమ్మోతి ద్వాసట్ఠిదిట్ఠిగతభేదో అస్సద్ధమ్మో.
47. Sattame suvidūravidūrānīti kenaci pariyāyena anāsannāni hutvā suvidūrāneva vidūrāni. Nabhañca, bhikkhave, pathavī cāti ākāsañca mahāpathavī ca. Tattha kiñcāpi pathavito ākāsaṃ nāma na dūre, dvaṅgulamattepi hoti. Aññamaññaṃ alagganaṭṭhena pana ‘‘suvidūravidūre’’ti vuttaṃ. Verocanoti sūriyo. Satañca, bhikkhave, dhammoti catusatipaṭṭhānādibhedo sattatiṃsabodhipakkhiyadhammo. Asatañca dhammoti dvāsaṭṭhidiṭṭhigatabhedo assaddhammo.
పభఙ్కరోతి ఆలోకకరో. అబ్యాయికో హోతీతి అవిగచ్ఛనసభావో హోతి. సతం సమాగమోతి పణ్డితానం మిత్తసన్థవవసేన సమాగమో. యావాపి తిట్ఠేయ్యాతి యత్తకం అద్ధానం తిట్ఠేయ్య. తథేవ హోతీతి తాదిసోవ హోతి, పకతిం న జహతి. ఖిప్పం హి వేతీతి సీఘం విగచ్ఛతి.
Pabhaṅkaroti ālokakaro. Abyāyiko hotīti avigacchanasabhāvo hoti. Sataṃ samāgamoti paṇḍitānaṃ mittasanthavavasena samāgamo. Yāvāpitiṭṭheyyāti yattakaṃ addhānaṃ tiṭṭheyya. Tatheva hotīti tādisova hoti, pakatiṃ na jahati. Khippaṃ hi vetīti sīghaṃ vigacchati.
Related texts:
తిపిటక (మూల) • Tipiṭaka (Mūla) / సుత్తపిటక • Suttapiṭaka / అఙ్గుత్తరనికాయ • Aṅguttaranikāya / ౭. సువిదూరసుత్తం • 7. Suvidūrasuttaṃ
టీకా • Tīkā / సుత్తపిటక (టీకా) • Suttapiṭaka (ṭīkā) / అఙ్గుత్తరనికాయ (టీకా) • Aṅguttaranikāya (ṭīkā) / ౭. సువిదూరసుత్తవణ్ణనా • 7. Suvidūrasuttavaṇṇanā
