| Library / Tipiṭaka / திபிடக • Tipiṭaka / பேடகோபதே³ஸபாளி • Peṭakopadesapāḷi |
8. ஸுத்தவேப⁴ங்கி³யங்
8. Suttavebhaṅgiyaṃ
118. புப்³பா³ கோடி ந பஞ்ஞாயதி அவிஜ்ஜாய ச ப⁴வதண்ஹாய ச. தத்த² அவிஜ்ஜானீவரணானங் தண்ஹாஸங்யோஜனானங் ஸத்தானங் புப்³ப³கோடி ந பஞ்ஞாயதி. தத்த² யே ஸத்தா தண்ஹாஸங்யோஜனா, தே அஜ்ஜோ²ஸானப³ஹுலா மந்த³விபஸ்ஸகா. யே பன உஸ்ஸன்னதி³ட்டி²கா ஸத்தா, தே விபஸ்ஸனாப³ஹுலா மந்த³ஜ்ஜோ²ஸானா.
118. Pubbā koṭi na paññāyati avijjāya ca bhavataṇhāya ca. Tattha avijjānīvaraṇānaṃ taṇhāsaṃyojanānaṃ sattānaṃ pubbakoṭi na paññāyati. Tattha ye sattā taṇhāsaṃyojanā, te ajjhosānabahulā mandavipassakā. Ye pana ussannadiṭṭhikā sattā, te vipassanābahulā mandajjhosānā.
தத்த² தண்ஹாசரிதா ஸத்தா ஸத்தஸஞ்ஞாபி⁴னிவிட்டா² அனுப்பாத³வயத³ஸ்ஸினோ. தே பஞ்சஸு க²ந்தே⁴ஸு அத்தானங் ஸமனுபஸ்ஸந்தி ‘‘ரூபவந்தங் வா அத்தானங், அத்தனி வா ரூபங், ரூபஸ்மிங் வா அத்தான’’ந்தி. ஏவங் பஞ்சக்க²ந்தா⁴. அஞ்ஞேஹி க²ந்தே⁴ஹி அத்தானங் ஸமனுபஸ்ஸந்தி தஸ்ஸ உஸ்ஸன்னதி³ட்டி²கா ஸத்தா விபஸ்ஸமானா க²ந்தே⁴ உஜுங் அத்ததோ ஸமனுபஸ்ஸந்தி. தே ரூபங் அத்தகோ ஸமனுபஸ்ஸந்தி. யங் ரூபங், ஸோ அத்தா. யோ அஹங், தங் ரூபங். ஸோ ரூபவினாஸங் பஸ்ஸதி, அயங் உச்சே²த³வாதீ³ . இதி பஞ்சன்னங் க²ந்தா⁴னங் பட²மாபி⁴னிபாதா ஸக்காயதி³ட்டி²யோ பஞ்ச உச்சே²த³ங் ப⁴ஜந்தி ‘‘தங் ஜீவங் தங் ஸரீர’’ந்தி. ஏகமேகம்ஹி க²ந்தே⁴ தீஹி பதே³ஹி பச்சி²மகேஹி ஸஸ்ஸதங் ப⁴ஜதி ‘‘அஞ்ஞங் ஜீவங் அஞ்ஞங் ஸரீர’’ந்தி. இதோ ப³ஹித்³தா⁴தே பப்³ப³ஜிதா தண்ஹாசரிதா காமஸுக²ல்லிகானுயோக³மனுயுத்தா விஹரந்தி. தேன யே ச நிஸ்ஸந்தே³ன தி³ட்டி²சரிதா அத்தகிலமதா²னுயோக³மனுயுத்தா விஹரந்தி. தேன யேவ தி³ட்டி²ஸுகே²ன எத்தாவதா பா³ஹிரகோ பயோகோ³.
Tattha taṇhācaritā sattā sattasaññābhiniviṭṭhā anuppādavayadassino. Te pañcasu khandhesu attānaṃ samanupassanti ‘‘rūpavantaṃ vā attānaṃ, attani vā rūpaṃ, rūpasmiṃ vā attāna’’nti. Evaṃ pañcakkhandhā. Aññehi khandhehi attānaṃ samanupassanti tassa ussannadiṭṭhikā sattā vipassamānā khandhe ujuṃ attato samanupassanti. Te rūpaṃ attako samanupassanti. Yaṃ rūpaṃ, so attā. Yo ahaṃ, taṃ rūpaṃ. So rūpavināsaṃ passati, ayaṃ ucchedavādī . Iti pañcannaṃ khandhānaṃ paṭhamābhinipātā sakkāyadiṭṭhiyo pañca ucchedaṃ bhajanti ‘‘taṃ jīvaṃ taṃ sarīra’’nti. Ekamekamhi khandhe tīhi padehi pacchimakehi sassataṃ bhajati ‘‘aññaṃ jīvaṃ aññaṃ sarīra’’nti. Ito bahiddhāte pabbajitā taṇhācaritā kāmasukhallikānuyogamanuyuttā viharanti. Tena ye ca nissandena diṭṭhicaritā attakilamathānuyogamanuyuttā viharanti. Tena yeva diṭṭhisukhena ettāvatā bāhirako payogo.
தத்த² தி³ட்டி²சரிதா ஸத்தா யே அரியத⁴ம்மவினயங் ஓதரந்தி, தே த⁴ம்மானுஸாரினோ ஹொந்தி. யே தண்ஹாசரிதா ஸத்தா அரியங் த⁴ம்மவினயங் ஓதரந்தி, தே ஸத்³தா⁴னுஸாரினோ ஹொந்தி.
Tattha diṭṭhicaritā sattā ye ariyadhammavinayaṃ otaranti, te dhammānusārino honti. Ye taṇhācaritā sattā ariyaṃ dhammavinayaṃ otaranti, te saddhānusārino honti.
தத்த² யே தி³ட்டி²சரிதா ஸத்தா, தே காமேஸு தோ³ஸதி³ட்டீ², ந ச யே காமேஸு அனுஸயா ஸமூஹதா, தே அத்தகிலமதா²னுயோக³மனுயுத்தா விஹரந்தி. தேஸங் ஸத்தா² த⁴ம்மங் தே³ஸேதி. அஞ்ஞோ வா ஸாவகோ காமேஹி நத்தி² அத்தோ²தி தே ச புப்³பே³யேவ காமேஹி அனத்தி²கா இதி காமே அப்பகஸிரேன படினிஸ்ஸஜ்ஜந்தி. தே சேதஸிகேன து³க்கே²ன அனஜ்ஜோ²ஸிதா. தேன வுச்சதி ‘‘ஸுகா² படிபதா³’’தி . யே பன தண்ஹாசரிதா ஸத்தா, தே காமேஸு அஜ்ஜோ²ஸிதா, தேஸங் ஸத்தா² வா த⁴ம்மங் தே³ஸேதி. அஞ்ஞதரோ வா பி⁴க்கு² காமேஹி நத்தி² அத்தோ²தி, தே பியரூபங் து³க்கே²ன படினிஸ்ஸஜ்ஜந்தி. தேன வுச்சதி ‘‘து³க்கா² படிபதா³’’தி. இதி இமே ஸப்³ப³ஸத்தா த்³வீஸு படிபதா³ஸு ஸமோஸரணங் க³ச்ச²ந்தி து³க்கா²யஞ்ச ஸுகா²யஞ்ச.
Tattha ye diṭṭhicaritā sattā, te kāmesu dosadiṭṭhī, na ca ye kāmesu anusayā samūhatā, te attakilamathānuyogamanuyuttā viharanti. Tesaṃ satthā dhammaṃ deseti. Añño vā sāvako kāmehi natthi atthoti te ca pubbeyeva kāmehi anatthikā iti kāme appakasirena paṭinissajjanti. Te cetasikena dukkhena anajjhositā. Tena vuccati ‘‘sukhā paṭipadā’’ti . Ye pana taṇhācaritā sattā, te kāmesu ajjhositā, tesaṃ satthā vā dhammaṃ deseti. Aññataro vā bhikkhu kāmehi natthi atthoti, te piyarūpaṃ dukkhena paṭinissajjanti. Tena vuccati ‘‘dukkhā paṭipadā’’ti. Iti ime sabbasattā dvīsu paṭipadāsu samosaraṇaṃ gacchanti dukkhāyañca sukhāyañca.
தத்த² யே தி³ட்டி²சரிதா ஸத்தா, தே த்³விதா⁴ முதி³ந்த்³ரியா ச திக்கி²ந்த்³ரியா ச. தத்த² யே தி³ட்டி²சரிதா ஸத்தா திக்கி²ந்த்³ரியா ஸுகே²ன படினிஸ்ஸஜ்ஜந்தி, கி²ப்பஞ்ச அபி⁴ஸமெந்தி, தேன வுச்சதி ‘‘கி²ப்பாபி⁴ஞ்ஞா ஸுகா² படிபதா³’’தி. தத்த² யே தி³ட்டி²சரிதா ஸத்தா முதி³ந்த்³ரியா பட²மங் திக்கி²ந்த்³ரியங் உபாதா³ய த³ந்த⁴தரங் அபி⁴ஸமெந்தி, தே ஸுகே²ன படினிஸ்ஸஜ்ஜந்தி, த³ந்த⁴ஞ்ச அபி⁴ஸமெந்தி. தேன வுச்சதி ‘‘ஸுகா² படிபதா³ த³ந்தா⁴பி⁴ஞ்ஞா’’தி. தத்த² தண்ஹாசரிதா ஸத்தா த்³விதா⁴ திக்கி²ந்த்³ரியா ச முதி³ந்த்³ரியா ச. தத்த² யே தண்ஹாசரிதா ஸத்தா திக்கி²ந்த்³ரியா து³க்கே²ன படினிஸ்ஸஜ்ஜந்தி, கி²ப்பஞ்ச அபி⁴ஸமெந்தி. தேன வுச்சதி ‘‘து³க்கா² படிபதா³ கி²ப்பாபி⁴ஞ்ஞா’’தி. தத்த² யே தண்ஹாசரிதா ஸத்தா முதி³ந்த்³ரியா பட²மங் திக்கி²ந்த்³ரியங் உபாதா³ய த³ந்த⁴தரங் அபி⁴ஸமெந்தி, தே து³க்கே²ன படினிஸ்ஸஜ்ஜந்தி, த³ந்த⁴ஞ்ச அபி⁴ஸமெந்தி. தேன வுச்சதி ‘‘து³க்கா² படிபதா³ த³ந்தா⁴பி⁴ஞ்ஞா’’தி. இமா சதஸ்ஸோ படிபதா³யோ அபஞ்சமா அச²ட்டா². யே ஹி கேசி நிப்³பு³தா நிப்³பா³யிஸ்ஸந்தி வா இமாஹி சதூஹி படிபதா³ஹி அனஞ்ஞாஹி அயங் படிபதா³சதுக்கேன கிலேஸே நித்³தி³ஸதி. யா சதுக்கமக்³கே³ன அரியத⁴ம்மேஸு நித்³தி³ஸிதப்³பா³, அயங் வுச்சதி ஸீஹவிக்கீளிதோ நாம நயோ.
Tattha ye diṭṭhicaritā sattā, te dvidhā mudindriyā ca tikkhindriyā ca. Tattha ye diṭṭhicaritā sattā tikkhindriyā sukhena paṭinissajjanti, khippañca abhisamenti, tena vuccati ‘‘khippābhiññā sukhā paṭipadā’’ti. Tattha ye diṭṭhicaritā sattā mudindriyā paṭhamaṃ tikkhindriyaṃ upādāya dandhataraṃ abhisamenti, te sukhena paṭinissajjanti, dandhañca abhisamenti. Tena vuccati ‘‘sukhā paṭipadā dandhābhiññā’’ti. Tattha taṇhācaritā sattā dvidhā tikkhindriyā ca mudindriyā ca. Tattha ye taṇhācaritā sattā tikkhindriyā dukkhena paṭinissajjanti, khippañca abhisamenti. Tena vuccati ‘‘dukkhā paṭipadā khippābhiññā’’ti. Tattha ye taṇhācaritā sattā mudindriyā paṭhamaṃ tikkhindriyaṃ upādāya dandhataraṃ abhisamenti, te dukkhena paṭinissajjanti, dandhañca abhisamenti. Tena vuccati ‘‘dukkhā paṭipadā dandhābhiññā’’ti. Imā catasso paṭipadāyo apañcamā achaṭṭhā. Ye hi keci nibbutā nibbāyissanti vā imāhi catūhi paṭipadāhi anaññāhi ayaṃ paṭipadācatukkena kilese niddisati. Yā catukkamaggena ariyadhammesu niddisitabbā, ayaṃ vuccati sīhavikkīḷito nāma nayo.
119. தத்ரிமே சத்தாரோ ஆஹாரா. சத்தாரோ விபல்லாஸா உபாதா³னா யோகா³ க³ந்தா² ஆஸவா ஓகா⁴ ஸல்லா விஞ்ஞாணட்டி²தியோ அக³திக³மனாதி, ஏவங் இமானி ஸப்³பா³னி த³ஸ பதா³னி. அயங் ஸுத்தஸ்ஸ ஸங்ஸந்த³னா.
119. Tatrime cattāro āhārā. Cattāro vipallāsā upādānā yogā ganthā āsavā oghā sallā viññāṇaṭṭhitiyo agatigamanāti, evaṃ imāni sabbāni dasa padāni. Ayaṃ suttassa saṃsandanā.
சத்தாரோ ஆஹாரா. தத்த² யோ ச கப³ளீகாரோ ஆஹாரோ யோ ச ப²ஸ்ஸோ ஆஹாரோ, இமே தண்ஹாசரிதேன பஹாதப்³பா³. தத்த² யோ ச மனோஸஞ்சேதனாஹாரோ யோ ச விஞ்ஞாணாஹாரோ, இமே தி³ட்டி²சரிதேன பஹாதப்³பா³.
Cattāro āhārā. Tattha yo ca kabaḷīkāro āhāro yo ca phasso āhāro, ime taṇhācaritena pahātabbā. Tattha yo ca manosañcetanāhāro yo ca viññāṇāhāro, ime diṭṭhicaritena pahātabbā.
பட²மோ ஆஹாரோ பட²மோ விபல்லாஸோ, து³தியோ ஆஹாரோ து³தியோ விபல்லாஸோ, ததியோ ஆஹாரோ ததியோ விபல்லாஸோ, சதுத்தோ² ஆஹாரோ சதுத்தோ² விபல்லாஸோ. இமே சத்தாரோ விபல்லாஸா அபஞ்சமா அச²ட்டா². இத³ஞ்ச பமாணா சத்தாரோ ஆஹாரா.
Paṭhamo āhāro paṭhamo vipallāso, dutiyo āhāro dutiyo vipallāso, tatiyo āhāro tatiyo vipallāso, catuttho āhāro catuttho vipallāso. Ime cattāro vipallāsā apañcamā achaṭṭhā. Idañca pamāṇā cattāro āhārā.
தத்த² பட²மே விபல்லாஸே டி²தோ காமே உபாதி³யதி, இத³ங் காமுபாதா³னங். து³தியே விபல்லாஸே டி²தோ அனாக³தங் ப⁴வங் உபாதி³யதி, இத³ங் ஸீலப்³ப³துபாதா³னங். ததியே விபல்லாஸே டி²தோ விபரீதோ தி³ட்டி²ங் உபாதி³யதி, இத³ங் தி³ட்டு²பாதா³னங். சதுத்தே² விபல்லாஸே டி²தோ க²ந்தே⁴ அத்ததோ உபாதி³யதி, இத³ங் அத்தவாது³பாதா³னங்.
Tattha paṭhame vipallāse ṭhito kāme upādiyati, idaṃ kāmupādānaṃ. Dutiye vipallāse ṭhito anāgataṃ bhavaṃ upādiyati, idaṃ sīlabbatupādānaṃ. Tatiye vipallāse ṭhito viparīto diṭṭhiṃ upādiyati, idaṃ diṭṭhupādānaṃ. Catutthe vipallāse ṭhito khandhe attato upādiyati, idaṃ attavādupādānaṃ.
தத்த² காமுபாதா³னே டி²தோ காமே அபி⁴ஜ்ஜா²யதி க³ந்த²தி, அயங் அபி⁴ஜ்ஜா²காயக³ந்தோ². ஸீலப்³ப³துபாதா³னே டி²தோ ப்³யாபாத³ங் க³ந்த²தி, அயங் ப்³யாபாத³காயக³ந்தோ². தி³ட்டு²பாதா³னே டி²தோ பராமாஸங் க³ந்த²தி, அயங் பராமாஸகாயக³ந்தோ². அத்தவாது³பாதா³னே டி²தோ பபஞ்சந்தோ க³ந்த²தி, அயங் இத³ங்ஸச்சாபி⁴னிவேஸோ காயக³ந்தோ².
Tattha kāmupādāne ṭhito kāme abhijjhāyati ganthati, ayaṃ abhijjhākāyagantho. Sīlabbatupādāne ṭhito byāpādaṃ ganthati, ayaṃ byāpādakāyagantho. Diṭṭhupādāne ṭhito parāmāsaṃ ganthati, ayaṃ parāmāsakāyagantho. Attavādupādāne ṭhito papañcanto ganthati, ayaṃ idaṃsaccābhiniveso kāyagantho.
தஸ்ஸ க³ந்தி²தா கிலேஸா ஆஸவந்தி. கிஞ்சி பன வுச்சதி விப்படிஸாரோ. யே விப்படிஸாரா 1 தே அனுஸயா. தத்த² அபி⁴ஜ்ஜா²காயக³ந்தே²ன காமாஸவோ, ப்³யாபாத³காயக³ந்தே²ன ப⁴வாஸவோ, பராமாஸகாயக³ந்தே²ன தி³ட்டா²ஸவோ, இத³ங் ஸச்சாபி⁴னிவேஸகாயக³ந்தே²ன அவிஜ்ஜாஸவோ.
Tassa ganthitā kilesā āsavanti. Kiñci pana vuccati vippaṭisāro. Ye vippaṭisārā 2 te anusayā. Tattha abhijjhākāyaganthena kāmāsavo, byāpādakāyaganthena bhavāsavo, parāmāsakāyaganthena diṭṭhāsavo, idaṃ saccābhinivesakāyaganthena avijjāsavo.
தே சத்தாரோ ஆஸவா வேபுல்லபா⁴வங் க³தா ஓகா⁴ ஹொந்தி, தேன வுச்சந்தி ‘‘ஓகா⁴’’தி. தத்த² காமாஸவோ காமோகோ⁴, ப⁴வாஸவோ ப⁴வோகோ⁴, அவிஜ்ஜாஸவோ அவிஜ்ஜோகோ⁴, தி³ட்டா²ஸவோ தி³ட்டோ²கோ⁴.
Te cattāro āsavā vepullabhāvaṃ gatā oghā honti, tena vuccanti ‘‘oghā’’ti. Tattha kāmāsavo kāmogho, bhavāsavo bhavogho, avijjāsavo avijjogho, diṭṭhāsavo diṭṭhogho.
தே சத்தாரோ ஓகா⁴ ஆஸயமனுபவிட்டா² அனுஸயஸஹக³தா வுச்சந்தி. ஸல்லாதி ஹத³யமாஹச்ச திட்ட²ந்தா. தத்த² காமோகோ⁴ ராக³ஸல்லங், ப⁴வோகோ⁴ தோ³ஸஸல்லங், அவிஜ்ஜோகோ⁴ மோஹஸல்லங், தி³ட்டோ²கோ⁴ தி³ட்டி²ஸல்லங்.
Te cattāro oghā āsayamanupaviṭṭhā anusayasahagatā vuccanti. Sallāti hadayamāhacca tiṭṭhantā. Tattha kāmogho rāgasallaṃ, bhavogho dosasallaṃ, avijjogho mohasallaṃ, diṭṭhogho diṭṭhisallaṃ.
இமேஹி சதூஹி ஸல்லேஹி பரியாதி³ன்னங் விஞ்ஞாணங் சதூஸு த⁴ம்மேஸு திட்ட²தி ரூபே வேத³னாய ஸஞ்ஞாய ஸங்கா²ரேஸு. இமா சதஸ்ஸோ விஞ்ஞாணட்டி²தியோ. தத்த² ராக³ஸல்லேன நந்தூ³பஸேசனங் ரூபூபக³ங் விஞ்ஞாணங் திட்ட²தி. தோ³ஸஸல்லேன வேத³னூபக³ங் மோஹஸல்லேன ஸஞ்ஞூபக³ங் தி³ட்டி²ஸல்லேன நந்தூ³பஸேசனங் ஸங்கா²ரூபக³ங் விஞ்ஞாணங் திட்ட²தி.
Imehi catūhi sallehi pariyādinnaṃ viññāṇaṃ catūsu dhammesu tiṭṭhati rūpe vedanāya saññāya saṅkhāresu. Imā catasso viññāṇaṭṭhitiyo. Tattha rāgasallena nandūpasecanaṃ rūpūpagaṃ viññāṇaṃ tiṭṭhati. Dosasallena vedanūpagaṃ mohasallena saññūpagaṃ diṭṭhisallena nandūpasecanaṃ saṅkhārūpagaṃ viññāṇaṃ tiṭṭhati.
சதூஹி விஞ்ஞாணட்டி²தீஹி சதுப்³பி³த⁴ங் அக³திங் க³ச்ச²ந்தி ச²ந்தா³ தோ³ஸா ப⁴யா மோஹா. ராகே³ன ச²ந்தா³ அக³திங் க³ச்ச²தி, தோ³ஸேன தோ³ஸா அக³திங் க³ச்ச²தி, மோஹேன மோஹா அக³திங் க³ச்ச²தி, தி³ட்டி²யா ப⁴யா அக³திங் க³ச்ச²தி. இதி இத³ஞ்ச கம்மங் இமே ச கிலேஸா. அயங் ஸங்ஸாரஸ்ஸ ஹேது.
Catūhi viññāṇaṭṭhitīhi catubbidhaṃ agatiṃ gacchanti chandā dosā bhayā mohā. Rāgena chandā agatiṃ gacchati, dosena dosā agatiṃ gacchati, mohena mohā agatiṃ gacchati, diṭṭhiyā bhayā agatiṃ gacchati. Iti idañca kammaṃ ime ca kilesā. Ayaṃ saṃsārassa hetu.
120. தத்தி²மா சதஸ்ஸோ தி³ஸா கப³ளீகாராஹாரோ ‘‘அஸுபே⁴ ஸுப⁴’’ந்தி விபல்லாஸோ காமுபாதா³னங் காமயோகோ³ அபி⁴ஜ்ஜா²காயக³ந்தோ² காமாஸவோ காமோகோ⁴ ராக³ஸல்லங் ரூபூபகா³ விஞ்ஞாணட்டி²தி ச²ந்தா³ அக³திக³மனங். அயங் பட²மா தி³ஸா.
120. Tatthimā catasso disā kabaḷīkārāhāro ‘‘asubhe subha’’nti vipallāso kāmupādānaṃ kāmayogo abhijjhākāyagantho kāmāsavo kāmogho rāgasallaṃ rūpūpagā viññāṇaṭṭhiti chandā agatigamanaṃ. Ayaṃ paṭhamā disā.
ப²ஸ்ஸோ ஆஹாரோ ‘‘து³க்கே² ஸுக²’’ந்தி விபல்லாஸோ ஸீலப்³ப³துபாதா³னங் ப⁴வயோகொ³ப்³யாபாதோ³ காயக³ந்தோ² ப⁴வாஸவோ ப⁴வோகோ⁴ தோ³ஸஸல்லங் வேத³னூபகா³ விஞ்ஞாணட்டி²தி தோ³ஸா அக³திக³மனங், அயங் து³தியா தி³ஸா.
Phasso āhāro ‘‘dukkhe sukha’’nti vipallāso sīlabbatupādānaṃ bhavayogobyāpādo kāyagantho bhavāsavo bhavogho dosasallaṃ vedanūpagā viññāṇaṭṭhiti dosā agatigamanaṃ, ayaṃ dutiyā disā.
மனோஸஞ்சேதனாஹாரோ ‘‘அனத்தனி அத்தா’’தி விபல்லாஸோ தி³ட்டு²பாதா³னங் தி³ட்டி²யோகோ³ பராமாஸகாயக³ந்தோ² தி³ட்டா²ஸவோ தி³ட்டோ²கோ⁴ தி³ட்டி²ஸல்லங் ஸஞ்ஞூபகா³ விஞ்ஞாணட்டி²தி ப⁴யா அக³திக³மனங். அயங் ததியா தி³ஸா.
Manosañcetanāhāro ‘‘anattani attā’’ti vipallāso diṭṭhupādānaṃ diṭṭhiyogo parāmāsakāyagantho diṭṭhāsavo diṭṭhogho diṭṭhisallaṃ saññūpagā viññāṇaṭṭhiti bhayā agatigamanaṃ. Ayaṃ tatiyā disā.
விஞ்ஞாணாஹாரோ ‘‘அனிச்சே நிச்ச’’ந்தி விபல்லாஸோ அத்தவாது³பாதா³னங் அவிஜ்ஜாயோகோ³ இத³ங்ஸச்சாபி⁴னிவேஸோ காயக³ந்தோ² அவிஜ்ஜாஸவோ அவிஜ்ஜோகோ⁴ மோஹஸல்லங் ஸங்கா²ரூபகா³ விஞ்ஞாணட்டி²தி மோஹா அக³திக³மனங், அயங் சதுத்தீ² தி³ஸா. இதி இமேஸங் த³ஸன்னங் ஸுத்தானங் பட²மேன பதே³ன பட²மாய தி³ஸாய ஆலோகனங். அயங் வுச்சதி தி³ஸாலோகனா.
Viññāṇāhāro ‘‘anicce nicca’’nti vipallāso attavādupādānaṃ avijjāyogo idaṃsaccābhiniveso kāyagantho avijjāsavo avijjogho mohasallaṃ saṅkhārūpagā viññāṇaṭṭhiti mohā agatigamanaṃ, ayaṃ catutthī disā. Iti imesaṃ dasannaṃ suttānaṃ paṭhamena padena paṭhamāya disāya ālokanaṃ. Ayaṃ vuccati disālokanā.
சதூஹி விபல்லாஸேஹி அகுஸலபக்கே² தி³ஸாவிலோகனா கிலேஸங் ஸங்யோஜெத்வா அயங் அகுஸலபக்கே² தி³ஸாவிலோகனாய பூ⁴மி பஞ்சன்னங் த³ஸன்னங் ஸுத்தானங் யானி பட²மானி பதா³னி இமேஸங் த⁴ம்மானங் கோ அத்தோ²? ஏகோ அத்தோ², ப்³யஞ்ஜனமேவ நானங். ஏவங் து³தியா ஏவங் ததியா ஏவங் சதுத்தீ². அயங் பட²மா ஸங்ஸந்த³னா.
Catūhi vipallāsehi akusalapakkhe disāvilokanā kilesaṃ saṃyojetvā ayaṃ akusalapakkhe disāvilokanāya bhūmi pañcannaṃ dasannaṃ suttānaṃ yāni paṭhamāni padāni imesaṃ dhammānaṃ ko attho? Eko attho, byañjanameva nānaṃ. Evaṃ dutiyā evaṃ tatiyā evaṃ catutthī. Ayaṃ paṭhamā saṃsandanā.
இமினா பெய்யாலேன ஸப்³பே³ கிலேஸா சதூஸு பதே³ஸு பக்கி²பிதப்³பா³. ததோ குஸலபக்கே² சதஸ்ஸோ படிபதா³ சத்தாரி ஜா²னானி சத்தாரோ ஸதிபட்டா²னா சத்தாரோ விஹாரா தி³ப்³போ³ ப்³ரஹ்மா அரியோ ஆனேஞ்ஜோ சத்தாரோ ஸம்மப்பதா⁴னா சத்தாரோ அச்ச²ரியா அப்³பு⁴தத⁴ம்மா சத்தாரோ அதி⁴ட்டா²னா சத்தாரோ ஸமாத⁴யோ ச²ந்த³ஸமாதி⁴ வீரியஸமாதி⁴ சித்தஸமாதி⁴ வீமங்ஸாஸமாதி⁴. சத்தாரோ த⁴ம்மா ஸுக²பா⁴கி³யா நாஞ்ஞத்ர பொ³ஜ்ஜ²ங்கா³ நாஞ்ஞத்ர தபஸா நாஞ்ஞதிந்த்³ரியஸங்வரா நாஞ்ஞத்ர ஸப்³ப³னிஸ்ஸக்³கா³ சத்தாரி அப்பமாணானி.
Iminā peyyālena sabbe kilesā catūsu padesu pakkhipitabbā. Tato kusalapakkhe catasso paṭipadā cattāri jhānāni cattāro satipaṭṭhānā cattāro vihārā dibbo brahmā ariyo āneñjo cattāro sammappadhānā cattāro acchariyā abbhutadhammā cattāro adhiṭṭhānā cattāro samādhayo chandasamādhi vīriyasamādhi cittasamādhi vīmaṃsāsamādhi. Cattāro dhammā sukhabhāgiyā nāññatra bojjhaṅgā nāññatra tapasā nāññatindriyasaṃvarā nāññatra sabbanissaggā cattāri appamāṇāni.
தத்த² து³க்கா² படிபதா³ த³ந்தா⁴பி⁴ஞ்ஞா பா⁴வியமானா ப³ஹுலீகரியமானா பட²மங் ஜா²னங் பரிபூரேதி, பட²மங் ஜா²னங் பரிபுண்ணங் பட²மங் ஸதிபட்டா²னங் பரிபூரேதி , பட²மங் ஸதிபட்டா²னங் பரிபுண்ணங் பட²மங் விஹாரங் பரிபூரேதி, பட²மோ விஹாரோ பரிபுண்ணோ பட²மங் ஸம்மப்பதா⁴னங் பரிபூரேதி, பட²மங் ஸம்மப்பதா⁴னங் பரிபுண்ணங் பட²மங் அச்ச²ரியங் அப்³பு⁴தத⁴ம்மங் பரிபூரேதி, பட²மோ அச்ச²ரியோ அப்³பு⁴தோ த⁴ம்மோ பரிபுண்ணோ பட²மங் அதி⁴ட்டா²னங் பரிபூரேதி, பட²மங் அதி⁴ட்டா²னங் பரிபுண்ணங் ச²ந்த³ஸமாதி⁴ங் பரிபூரேதி, ச²ந்த³ஸமாதி⁴ பரிபுண்ணோ இந்த்³ரியஸங்வரங் பரிபூரேதி, இந்த்³ரியஸங்வரோ பரிபுண்ணோ பட²மங் மெத்தாஅப்பமாணங் பரிபூரேதி. ஏவங் யாவ ஸப்³ப³னிஸ்ஸக்³கோ³ சதுத்த²ங் அப்பமாணங் பரிபூரேதி.
Tattha dukkhā paṭipadā dandhābhiññā bhāviyamānā bahulīkariyamānā paṭhamaṃ jhānaṃ paripūreti, paṭhamaṃ jhānaṃ paripuṇṇaṃ paṭhamaṃ satipaṭṭhānaṃ paripūreti , paṭhamaṃ satipaṭṭhānaṃ paripuṇṇaṃ paṭhamaṃ vihāraṃ paripūreti, paṭhamo vihāro paripuṇṇo paṭhamaṃ sammappadhānaṃ paripūreti, paṭhamaṃ sammappadhānaṃ paripuṇṇaṃ paṭhamaṃ acchariyaṃ abbhutadhammaṃ paripūreti, paṭhamo acchariyo abbhuto dhammo paripuṇṇo paṭhamaṃ adhiṭṭhānaṃ paripūreti, paṭhamaṃ adhiṭṭhānaṃ paripuṇṇaṃ chandasamādhiṃ paripūreti, chandasamādhi paripuṇṇo indriyasaṃvaraṃ paripūreti, indriyasaṃvaro paripuṇṇo paṭhamaṃ mettāappamāṇaṃ paripūreti. Evaṃ yāva sabbanissaggo catutthaṃ appamāṇaṃ paripūreti.
தத்த² பட²மா ச படிபதா³ பட²மஞ்ச ஜா²னங் பட²மஞ்ச ஸதிபட்டா²னங் பட²மோ ச விஹாரோ பட²மஞ்ச ஸம்மப்பதா⁴னங் பட²மோ ச அச்ச²ரியோ அப்³பு⁴தோ த⁴ம்மோ ஸச்சாதி⁴ட்டா²னஞ்ச ச²ந்த³ஸமாதி⁴ ச இந்த்³ரியஸங்வரோ ச மெத்தா ச அப்பமாணங். அயங் பட²மா தி³ஸா.
Tattha paṭhamā ca paṭipadā paṭhamañca jhānaṃ paṭhamañca satipaṭṭhānaṃ paṭhamo ca vihāro paṭhamañca sammappadhānaṃ paṭhamo ca acchariyo abbhuto dhammo saccādhiṭṭhānañca chandasamādhi ca indriyasaṃvaro ca mettā ca appamāṇaṃ. Ayaṃ paṭhamā disā.
து³க்கா² ச 3 படிபதா³ கி²ப்பாபி⁴ஞ்ஞா து³தியங் ஜா²னங் து³தியஞ்ச ஸதிபட்டா²னங் து³தியோ ச விஹாரோ து³தியஞ்ச ஸம்மப்பதா⁴னங் து³தியோ ச அச்ச²ரியோ அப்³பு⁴தோ த⁴ம்மோ சாகா³தி⁴ட்டா²னங் சித்தஸமாதி⁴ சத்தாரோ இத்³தி⁴பாதா³ கருணா ச அப்பமாணங், அயங் து³தியா தி³ஸா.
Dukkhā ca 4 paṭipadā khippābhiññā dutiyaṃ jhānaṃ dutiyañca satipaṭṭhānaṃ dutiyo ca vihāro dutiyañca sammappadhānaṃ dutiyo ca acchariyo abbhuto dhammo cāgādhiṭṭhānaṃ cittasamādhi cattāro iddhipādā karuṇā ca appamāṇaṃ, ayaṃ dutiyā disā.
ஸுகா² ச 5 படிபதா³ த³ந்தா⁴பி⁴ஞ்ஞா ததியஞ்ச ஜா²னங் ததியஞ்ச ஸதிபட்டா²னங் ததியோ ச விஹாரோ ததியஞ்ச ஸம்மப்பதா⁴னங் ததியோ ச அச்ச²ரியோ அப்³பு⁴தோ த⁴ம்மோ பஞ்ஞாதி⁴ட்டா²னஞ்ச வீரியஸமாதி⁴ ச பொ³ஜ்ஜ²ங்கா³ ச முதி³தா ச அப்பமாணங். அயங் ததியா தி³ஸா.
Sukhā ca 6 paṭipadā dandhābhiññā tatiyañca jhānaṃ tatiyañca satipaṭṭhānaṃ tatiyo ca vihāro tatiyañca sammappadhānaṃ tatiyo ca acchariyo abbhuto dhammo paññādhiṭṭhānañca vīriyasamādhi ca bojjhaṅgā ca muditā ca appamāṇaṃ. Ayaṃ tatiyā disā.
ஸுகா² ச 7 படிபதா³ கி²ப்பாபி⁴ஞ்ஞா சதுத்த²ங் ஜா²னங் சதுத்த²ஞ்ச ஸதிபட்டா²னங் சதுத்தோ² ச விஹாரோ சதுத்த²ஞ்ச ஸம்மப்பதா⁴னங் சதுத்தோ² ச அச்ச²ரியோ அப்³பு⁴தோ த⁴ம்மோ உபஸமாதி⁴ட்டா²னஞ்ச வீமங்ஸாஸமாதி⁴ ச ஸப்³ப³னிஸ்ஸக்³கோ³ ச உபெக்கா² அப்பமாணஞ்ச. அயங் சதுத்தீ² தி³ஸா. இமாஸங் சதஸ்ஸன்னங் தி³ஸானங் ஆலோகனா. அயங் வுச்சதி தி³ஸாலோகனோ நாம நயோ.
Sukhā ca 8 paṭipadā khippābhiññā catutthaṃ jhānaṃ catutthañca satipaṭṭhānaṃ catuttho ca vihāro catutthañca sammappadhānaṃ catuttho ca acchariyo abbhuto dhammo upasamādhiṭṭhānañca vīmaṃsāsamādhi ca sabbanissaggo ca upekkhā appamāṇañca. Ayaṃ catutthī disā. Imāsaṃ catassannaṃ disānaṃ ālokanā. Ayaṃ vuccati disālokano nāma nayo.
தத்தா²யங் யோஜனா. சத்தாரோ ச ஆஹாரா சதஸ்ஸோ ச படிபதா³, சத்தாரோ ச விபல்லாஸா சத்தாரோ ச ஸதிபட்டா²னா, சத்தாரி ச உபாதா³னானி சத்தாரி ச ஜா²னானி சத்தாரோ ச யோகா³ விஹாரா ச, க³ந்தா² ச ஸம்மப்பதா⁴னா ச, ஆஸவா ச அச்ச²ரியா அப்³பு⁴தத⁴ம்மா ச, ஓகா⁴ ச அதி⁴ட்டா²னானி ச, ஸல்லா ச ஸமாத⁴யோ, விஞ்ஞாணட்டி²தியோ சத்தாரோ ச ஸுக²பா⁴கி³யா த⁴ம்மா, சத்தாரி ச அக³திக³மனானி சத்தாரி ச அப்பமாணானி இதி குஸலாகுஸலானங் படிபக்க²வஸேன யோஜனா, அயங் வுச்சதி தி³ஸாலோகனோ நயோ.
Tatthāyaṃ yojanā. Cattāro ca āhārā catasso ca paṭipadā, cattāro ca vipallāsā cattāro ca satipaṭṭhānā, cattāri ca upādānāni cattāri ca jhānāni cattāro ca yogā vihārā ca, ganthā ca sammappadhānā ca, āsavā ca acchariyā abbhutadhammā ca, oghā ca adhiṭṭhānāni ca, sallā ca samādhayo, viññāṇaṭṭhitiyo cattāro ca sukhabhāgiyā dhammā, cattāri ca agatigamanāni cattāri ca appamāṇāni iti kusalākusalānaṃ paṭipakkhavasena yojanā, ayaṃ vuccati disālokano nayo.
தஸ்ஸ சத்தாரி ஸாமஞ்ஞப²லானி பரியோஸானங், யோ ச த⁴ம்மோ குஸலாகுஸலனித்³தே³ஸே பட²மோ தி³ஸானித்³தே³ஸோ, இமஸ்ஸ ஸோதாபத்திப²லங் பரியோஸானங் து³தியங் ஸகதா³கா³மிப²லங், ததியங் அனாகா³மிப²லங், சதுத்த²ங் அரஹத்தப²லங்.
Tassa cattāri sāmaññaphalāni pariyosānaṃ, yo ca dhammo kusalākusalaniddese paṭhamo disāniddeso, imassa sotāpattiphalaṃ pariyosānaṃ dutiyaṃ sakadāgāmiphalaṃ, tatiyaṃ anāgāmiphalaṃ, catutthaṃ arahattaphalaṃ.
தத்த² கதமோ திபுக்க²லோ நயோ? யே ச து³க்கா²ய படிபதா³ய த³ந்தா⁴பி⁴ஞ்ஞாய கி²ப்பாபி⁴ஞ்ஞாய ச நிய்யந்தி த்³வே புக்³க³லா, யே ச ஸுகா²ய படிபதா³ய த³ந்தா⁴பி⁴ஞ்ஞாய கி²ப்பாபி⁴ஞ்ஞாய ச நிய்யந்தி த்³வே புக்³க³லா.
Tattha katamo tipukkhalo nayo? Ye ca dukkhāya paṭipadāya dandhābhiññāya khippābhiññāya ca niyyanti dve puggalā, ye ca sukhāya paṭipadāya dandhābhiññāya khippābhiññāya ca niyyanti dve puggalā.
இமேஸங் சதுன்னங் புக்³க³லானங் யோ புக்³க³லோ ஸுகா²ய படிபதா³ய த³ந்தா⁴பி⁴ஞ்ஞாய நிய்யாதி, யோ ச புக்³க³லோ து³க்கா²ய படிபதா³ய கி²ப்பாபி⁴ஞ்ஞாய நிய்யாதி. இமே த்³வே புக்³க³லா ப⁴வந்தி. தத்த² யோ ஸுகா²ய படிபதா³ய கி²ப்பாபி⁴ஞ்ஞாய நிய்யாதி , அயங் உக்³க⁴டிதஞ்ஞூ. யோ பச்சி²மோ புக்³க³லோ ஸாதா⁴ரணோ, அயங் விபஞ்சிதஞ்ஞூ. யோ புக்³க³லோ த³ந்தா⁴பி⁴ஞ்ஞாய து³க்கா²ய படிபதா³ய நிய்யாதி, அயங் நெய்யோ. இமே சத்தாரோ ப⁴வித்வா தீணி ஹொந்தி, தத்த² உக்³க⁴டிதஞ்ஞுஸ்ஸ ஸமத²புப்³ப³ங்க³மா விபஸ்ஸனா, நெய்யஸ்ஸ விபஸ்ஸனாபுப்³ப³ங்க³மோ ஸமதோ², விபஞ்சிதஞ்ஞுஸ்ஸ ஸமத²விபஸ்ஸனா யுக³னத்³தா⁴. உக்³க⁴டிதஞ்ஞுஸ்ஸ முது³கா தே³ஸனா, நெய்யஸ்ஸ திக்கா² தே³ஸனா, விபஞ்சிதஞ்ஞுஸ்ஸ திக்க²முது³கா தே³ஸனா.
Imesaṃ catunnaṃ puggalānaṃ yo puggalo sukhāya paṭipadāya dandhābhiññāya niyyāti, yo ca puggalo dukkhāya paṭipadāya khippābhiññāya niyyāti. Ime dve puggalā bhavanti. Tattha yo sukhāya paṭipadāya khippābhiññāya niyyāti , ayaṃ ugghaṭitaññū. Yo pacchimo puggalo sādhāraṇo, ayaṃ vipañcitaññū. Yo puggalo dandhābhiññāya dukkhāya paṭipadāya niyyāti, ayaṃ neyyo. Ime cattāro bhavitvā tīṇi honti, tattha ugghaṭitaññussa samathapubbaṅgamā vipassanā, neyyassa vipassanāpubbaṅgamo samatho, vipañcitaññussa samathavipassanā yuganaddhā. Ugghaṭitaññussa mudukā desanā, neyyassa tikkhā desanā, vipañcitaññussa tikkhamudukā desanā.
உக்³க⁴டிதஞ்ஞுஸ்ஸ அதி⁴பஞ்ஞாஸிக்கா², நெய்யஸ்ஸ அதி⁴சித்தஸிக்கா², விபஞ்சிதஞ்ஞுஸ்ஸ அதி⁴ஸீலஸிக்கா². இதி இமேஸங் புக்³க³லானங் சதூஹி படிபதா³ஹி நிய்யானங்.
Ugghaṭitaññussa adhipaññāsikkhā, neyyassa adhicittasikkhā, vipañcitaññussa adhisīlasikkhā. Iti imesaṃ puggalānaṃ catūhi paṭipadāhi niyyānaṃ.
தத்த² அயங் ஸங்கிலேஸோ, தீணி அகுஸலமூலானி தயோ ப²ஸ்ஸா திஸ்ஸோ வேத³னா தயோ உபவிசாரா தயோ ஸங்கிலேஸா தயோ விதக்கா தயோ பரிளாஹா தீணி ஸங்க²தலக்க²ணானி திஸ்ஸோ து³க்க²தாதி.
Tattha ayaṃ saṃkileso, tīṇi akusalamūlāni tayo phassā tisso vedanā tayo upavicārā tayo saṃkilesā tayo vitakkā tayo pariḷāhā tīṇi saṅkhatalakkhaṇāni tisso dukkhatāti.
தீணி அகுஸலமூலானீதி லோபோ⁴ அகுஸலமூலங், தோ³ஸோ அகுஸலமூலங், மோஹோ அகுஸலமூலங். தயோ ப²ஸ்ஸாதி ஸுக²வேத³னீயோ ப²ஸ்ஸோ, து³க்க²வேத³னீயோ ப²ஸ்ஸோ, அது³க்க²மஸுக²வேத³னீயோ ப²ஸ்ஸோ. திஸ்ஸோ வேத³னாதி ஸுகா² வேத³னா து³க்கா² வேத³னா அது³க்க²மஸுகா² வேத³னா. தயோ உபவிசாராதி ஸோமனஸ்ஸோபவிசாரோ தோ³மனஸ்ஸோபவிசாரோ உபெக்கோ²பவிசாரோ. தயோ ஸங்கிலேஸாதி ராகோ³ தோ³ஸோ மோஹோ. தயோ விதக்காதி காமவிதக்கோ ப்³யாபாத³விதக்கோ விஹிங்ஸாவிதக்கோ. தயோ பரிளாஹாதி ராக³ஜோ தோ³ஸஜோ மோஹஜோ. தீணி ஸங்க²தலக்க²ணானீதி உப்பாதோ³ டி²தி வயோ. திஸ்ஸோ து³க்க²தாதி து³க்க²து³க்க²தா விபரிணாமது³க்க²தா ஸங்க²தது³க்க²தா.
Tīṇi akusalamūlānīti lobho akusalamūlaṃ, doso akusalamūlaṃ, moho akusalamūlaṃ. Tayo phassāti sukhavedanīyo phasso, dukkhavedanīyo phasso, adukkhamasukhavedanīyo phasso. Tisso vedanāti sukhā vedanā dukkhā vedanā adukkhamasukhā vedanā. Tayo upavicārāti somanassopavicāro domanassopavicāro upekkhopavicāro. Tayo saṃkilesāti rāgo doso moho. Tayo vitakkāti kāmavitakko byāpādavitakko vihiṃsāvitakko. Tayo pariḷāhāti rāgajo dosajo mohajo. Tīṇi saṅkhatalakkhaṇānīti uppādo ṭhiti vayo. Tisso dukkhatāti dukkhadukkhatā vipariṇāmadukkhatā saṅkhatadukkhatā.
தத்த² லோபோ⁴ அகுஸலமூலங் குதோ ஸமுட்டி²தங்? திவித⁴ங் ஆரம்மணங் மனாபிகங் அமனாபிகங் உபெக்கா²டா²னியஞ்ச. தத்த² மனாபிகேன ஆரம்மணேன லோபோ⁴ அகுஸலமூலங் ஸமுட்ட²ஹதி. இதி மனாபிகா ஆரம்மணா ஸுக²வேத³னீயோ ப²ஸ்ஸோ, ஸுக²வேத³னீயங் ப²ஸ்ஸங் படிச்ச உப்பஜ்ஜதே ஸுக²வேத³னா, ஸுக²வேத³னங் படிச்ச உப்பஜ்ஜதே ஸோமனஸ்ஸூபவிசாரோ, ஸோமனஸ்ஸூபவிசாரங் படிச்ச உப்பஜ்ஜதே ராகோ³, ராக³ங் படிச்ச உப்பஜ்ஜதே காமவிதக்கோ, காமவிதக்கங் படிச்ச உப்பஜ்ஜதே ராக³ஜோ பரிளாஹோ ராக³ஜங் பரிளாஹங் படிச்ச உப்பஜ்ஜதே உப்பாதோ³ ஸங்க²தலக்க²ணோ, உப்பாத³ங் ஸங்க²தலக்க²ணங் படிச்ச உப்பஜ்ஜதே விபரிணாமது³க்க²தா.
Tattha lobho akusalamūlaṃ kuto samuṭṭhitaṃ? Tividhaṃ ārammaṇaṃ manāpikaṃ amanāpikaṃ upekkhāṭhāniyañca. Tattha manāpikena ārammaṇena lobho akusalamūlaṃ samuṭṭhahati. Iti manāpikā ārammaṇā sukhavedanīyo phasso, sukhavedanīyaṃ phassaṃ paṭicca uppajjate sukhavedanā, sukhavedanaṃ paṭicca uppajjate somanassūpavicāro, somanassūpavicāraṃ paṭicca uppajjate rāgo, rāgaṃ paṭicca uppajjate kāmavitakko, kāmavitakkaṃ paṭicca uppajjate rāgajo pariḷāho rāgajaṃ pariḷāhaṃ paṭicca uppajjate uppādo saṅkhatalakkhaṇo, uppādaṃ saṅkhatalakkhaṇaṃ paṭicca uppajjate vipariṇāmadukkhatā.
தோ³ஸோ அகுஸலமூலங் குதோ ஸமுட்டி²தங்? அமனாபிகேன ஆரம்மணேன தோ³ஸோ அகுஸலமூலங் ஸமுட்டி²தங். இதி அமனாபிகா ஆரம்மணா து³க்க²வேத³னீயோ ப²ஸ்ஸோ, து³க்க²வேத³னீயங் ப²ஸ்ஸங் படிச்ச உப்பஜ்ஜதே து³க்க²வேத³னா, து³க்க²வேத³னங் படிச்ச உப்பஜ்ஜதே தோ³மனஸ்ஸூபவிசாரோ, தோ³மனஸ்ஸூபவிசாரங் படிச்ச உப்பஜ்ஜதே தோ³ஸோ, தோ³ஸங் படிச்ச உப்பஜ்ஜதே ப்³யாபாத³விதக்கோ, ப்³யாபாத³விதக்கங் படிச்ச உப்பஜ்ஜதே தோ³ஸஜோ பரிளாஹோ, தோ³ஸஜங் பரிளாஹங் படிச்ச உப்பஜ்ஜதே டி²தஸ்ஸ அஞ்ஞத²த்தங் ஸங்க²தலக்க²ணங், டி²தஸ்ஸ அஞ்ஞத²த்தங் ஸங்க²தலக்க²ணங் படிச்ச உப்பஜ்ஜதே து³க்க²து³க்க²தா வேத³னா.
Doso akusalamūlaṃ kuto samuṭṭhitaṃ? Amanāpikena ārammaṇena doso akusalamūlaṃ samuṭṭhitaṃ. Iti amanāpikā ārammaṇā dukkhavedanīyo phasso, dukkhavedanīyaṃ phassaṃ paṭicca uppajjate dukkhavedanā, dukkhavedanaṃ paṭicca uppajjate domanassūpavicāro, domanassūpavicāraṃ paṭicca uppajjate doso, dosaṃ paṭicca uppajjate byāpādavitakko, byāpādavitakkaṃ paṭicca uppajjate dosajo pariḷāho, dosajaṃ pariḷāhaṃ paṭicca uppajjate ṭhitassa aññathattaṃ saṅkhatalakkhaṇaṃ, ṭhitassa aññathattaṃ saṅkhatalakkhaṇaṃ paṭicca uppajjate dukkhadukkhatā vedanā.
மோஹோ அகுஸலமூலங் குதோ ஸமுட்டி²தங்? உபெக்கா²டா²னியேன ஆரம்மணேன மோஹோ அகுஸலமூலங் ஸமுட்டி²தங். இதி உபெக்கா²டா²னியா ஆரம்மணா அது³க்க²மஸுக²வேத³னீயோ ப²ஸ்ஸோ, அது³க்க²மஸுக²வேத³னீயங் ப²ஸ்ஸங் படிச்ச உப்பஜ்ஜதே அது³க்க²மஸுகா² வேத³னா, அது³க்க²மஸுக²வேத³னங் படிச்ச உப்பஜ்ஜதே உபெக்கூ²பவிசாரோ, உபெக்கூ²பவிசாரங் படிச்ச உப்பஜ்ஜதே மோஹோ, மோஹங் படிச்ச உப்பஜ்ஜதே விஹிங்ஸாவிதக்கோ, விஹிங்ஸாவிதக்கங் படிச்ச உப்பஜ்ஜதே மோஹஜோ பரிளாஹோ, மோஹஜங் பரிளாஹங் படிச்ச உப்பஜ்ஜதே வயோ ஸங்க²தலக்க²ணங், வயங் ஸங்க²தலக்க²ணங் படிச்ச உப்பஜ்ஜதே ஸங்க²தது³க்க²தா, இதி அயங் திண்ணங் கிலேஸானங் நித்³தே³ஸோ, அயங் வுச்சதே குஸலபக்கே² திபுக்க²லோ நயோ.
Moho akusalamūlaṃ kuto samuṭṭhitaṃ? Upekkhāṭhāniyena ārammaṇena moho akusalamūlaṃ samuṭṭhitaṃ. Iti upekkhāṭhāniyā ārammaṇā adukkhamasukhavedanīyo phasso, adukkhamasukhavedanīyaṃ phassaṃ paṭicca uppajjate adukkhamasukhā vedanā, adukkhamasukhavedanaṃ paṭicca uppajjate upekkhūpavicāro, upekkhūpavicāraṃ paṭicca uppajjate moho, mohaṃ paṭicca uppajjate vihiṃsāvitakko, vihiṃsāvitakkaṃ paṭicca uppajjate mohajo pariḷāho, mohajaṃ pariḷāhaṃ paṭicca uppajjate vayo saṅkhatalakkhaṇaṃ, vayaṃ saṅkhatalakkhaṇaṃ paṭicca uppajjate saṅkhatadukkhatā, iti ayaṃ tiṇṇaṃ kilesānaṃ niddeso, ayaṃ vuccate kusalapakkhe tipukkhalo nayo.
இதி தீணி அகுஸலமூலானி ந சதுத்தா²னி ந பஞ்சமானி, தயோ ப²ஸ்ஸாதி திஸ்ஸோ வேத³னா யாவ ஸங்க²தது³க்க²தாதி, யோ கோசி அகுஸலபக்கோ², ஸப்³போ³ ஸோ தீஸு அகுஸலமூலேஸு ஸமோஸரதி.
Iti tīṇi akusalamūlāni na catutthāni na pañcamāni, tayo phassāti tisso vedanā yāva saṅkhatadukkhatāti, yo koci akusalapakkho, sabbo so tīsu akusalamūlesu samosarati.
தத்த² கதமோ குஸலபக்கோ²? தீணி குஸலமூலானி, திஸ்ஸோ பஞ்ஞா ஸுதமயீ பஞ்ஞா சிந்தாமயீ பஞ்ஞா பா⁴வனாமயீ பஞ்ஞா. தயோ ஸமாதீ⁴ ஸவிதக்கஸவிசாரோ…பே॰… திஸ்ஸோ ஸிக்கா² அதி⁴ஸீலஸிக்கா²…பே॰… ஸிக்கா². தீணி நிமித்தானி ஸமத²னிமித்தங் பக்³க³ஹனிமித்தங் உபெக்கா²னிமித்தங். தயோ விதக்கா நெக்க²ம்மவிதக்கோ…பே॰… அவிஹிங்ஸாவிதக்கோ. தீணி இந்த்³ரியானி அனஞ்ஞாதஞ்ஞஸ்ஸாமீதிந்த்³ரியந்தி வித்தா²ரோ. தயோ உபவிசாரா நெக்க²ம்மூபவிசாரோ அப்³யாபாதூ³பவிசாரோ அவிஹிங்ஸூபவிசாரோ. திஸ்ஸோ ஏஸனா காமேஸனா ப⁴வேஸனா ப்³ரஹ்மசரியேஸனா. தயோ க²ந்தா⁴ ஸீலக்க²ந்தோ⁴ ஸமாதி⁴க்க²ந்தோ⁴ பஞ்ஞாக்க²ந்தோ⁴.
Tattha katamo kusalapakkho? Tīṇi kusalamūlāni, tisso paññā sutamayī paññā cintāmayī paññā bhāvanāmayī paññā. Tayo samādhī savitakkasavicāro…pe… tisso sikkhā adhisīlasikkhā…pe… sikkhā. Tīṇi nimittāni samathanimittaṃ paggahanimittaṃ upekkhānimittaṃ. Tayo vitakkā nekkhammavitakko…pe… avihiṃsāvitakko. Tīṇi indriyāni anaññātaññassāmītindriyanti vitthāro. Tayo upavicārā nekkhammūpavicāro abyāpādūpavicāro avihiṃsūpavicāro. Tisso esanā kāmesanā bhavesanā brahmacariyesanā. Tayo khandhā sīlakkhandho samādhikkhandho paññākkhandho.
தத்த² யங் அலோபோ⁴ குஸலமூலங், தங் ஸுதமயிபஞ்ஞங் பரிபூரேதி, ஸுதமயீ பஞ்ஞா பரிபுண்ணா ஸவிதக்கங் ஸவிசாரங் ஸமாதி⁴ங் பரிபூரேதி, ஸவிதக்கோ ஸவிசாரோ ஸமாதி⁴ பரிபுண்ணோ அதி⁴சித்தஸிக்க²ங் பரிபூரேதி, அதி⁴சித்தஸிக்கா² பரிபுண்ணா ஸமத²னிமித்தங் பரிபூரேதி, ஸமத²னிமித்தங் பரிபுண்ணங் நெக்க²ம்மவிதக்கங் பரிபூரேதி, நெக்க²ம்மவிதக்கோ பரிபுண்ணோ அனஞ்ஞாதஞ்ஞஸ்ஸாமீதிந்த்³ரியங் பரிபூரேதி, அனஞ்ஞாதஞ்ஞஸ்ஸாமீதிந்த்³ரியங் பரிபுண்ணங் நெக்க²ம்மூபவிசாரங் பரிபூரேதி, நெக்க²ம்மூபவிசாரோ பரிபுண்ணோ காமேஸனங் பஜஹதி, காமேஸனப்பஹானங் ஸமாதி⁴க்க²ந்த⁴ங் பரிபூரேதி.
Tattha yaṃ alobho kusalamūlaṃ, taṃ sutamayipaññaṃ paripūreti, sutamayī paññā paripuṇṇā savitakkaṃ savicāraṃ samādhiṃ paripūreti, savitakko savicāro samādhi paripuṇṇo adhicittasikkhaṃ paripūreti, adhicittasikkhā paripuṇṇā samathanimittaṃ paripūreti, samathanimittaṃ paripuṇṇaṃ nekkhammavitakkaṃ paripūreti, nekkhammavitakko paripuṇṇo anaññātaññassāmītindriyaṃ paripūreti, anaññātaññassāmītindriyaṃ paripuṇṇaṃ nekkhammūpavicāraṃ paripūreti, nekkhammūpavicāro paripuṇṇo kāmesanaṃ pajahati, kāmesanappahānaṃ samādhikkhandhaṃ paripūreti.
அதோ³ஸோ குஸலமூலங் சிந்தாமயிபஞ்ஞங் பரிபூரேதி, சிந்தாமயீ பஞ்ஞா பரிபுண்ணா அவிதக்கவிசாரமத்தங் ஸமாதி⁴ங் பரிபூரேதி . அவிதக்கவிசாரமத்தோ ஸமாதி⁴ பரிபுண்ணோ அதி⁴ஸீலஸிக்க²ங் பரிபூரேதி, அதி⁴ஸீலஸிக்கா² பரிபுண்ணா உபெக்கா²னிமித்தங் பரிபூரேதி, உபெக்கா²னிமித்தங் பரிபுண்ணங் அப்³யாபாத³விதக்கங் பரிபூரேதி, அப்³யாபாத³விதக்கோ பரிபுண்ணோ அஞ்ஞிந்த்³ரியங் பரிபூரேதி, அஞ்ஞிந்த்³ரியங் பரிபுண்ணங் அப்³யாபாதூ³பவிசாரங் பரிபூரேதி, அப்³யாபாதூ³பவிசாரோ பரிபுண்ணோ ப⁴வேஸனங் பஜஹதி, ப⁴வேஸனப்பஹானங் ஸீலக்க²ந்த⁴ங் பரிபூரேதி.
Adoso kusalamūlaṃ cintāmayipaññaṃ paripūreti, cintāmayī paññā paripuṇṇā avitakkavicāramattaṃ samādhiṃ paripūreti . Avitakkavicāramatto samādhi paripuṇṇo adhisīlasikkhaṃ paripūreti, adhisīlasikkhā paripuṇṇā upekkhānimittaṃ paripūreti, upekkhānimittaṃ paripuṇṇaṃ abyāpādavitakkaṃ paripūreti, abyāpādavitakko paripuṇṇo aññindriyaṃ paripūreti, aññindriyaṃ paripuṇṇaṃ abyāpādūpavicāraṃ paripūreti, abyāpādūpavicāro paripuṇṇo bhavesanaṃ pajahati, bhavesanappahānaṃ sīlakkhandhaṃ paripūreti.
அமோஹோ குஸலமூலங் பா⁴வனாமயிபஞ்ஞங் பரிபூரேதி, பா⁴வனாமயீபஞ்ஞா பரிபுண்ணா அவிதக்கஅவிசாரங் ஸமாதி⁴ங் பரிபூரேதி, அவிதக்கோ அவிசாரோ ஸமாதி⁴ பரிபுண்ணோ அதி⁴பஞ்ஞாஸிக்க²ங் பரிபூரேதி, அதி⁴பஞ்ஞாஸிக்கா² பரிபுண்ணா பக்³க³ஹனிமித்தங் பரிபூரேதி, பக்³க³ஹனிமித்தங் பரிபுண்ணங் அஞ்ஞாதாவினோ இந்த்³ரியங் பரிபூரேதி, அஞ்ஞாதாவினோ இந்த்³ரியங் பரிபுண்ணங் அவிஹிங்ஸூபவிசாரங் பரிபூரேதி, அவிஹிங்ஸூபவிசாரோ பரிபுண்ணோ ப்³ரஹ்மசரியேஸனங் பரிபூரேதி, ப்³ரஹ்மசரியேஸனா பரிபுண்ணா பஞ்ஞாக்க²ந்த⁴ங் பரிபூரேதி.
Amoho kusalamūlaṃ bhāvanāmayipaññaṃ paripūreti, bhāvanāmayīpaññā paripuṇṇā avitakkaavicāraṃ samādhiṃ paripūreti, avitakko avicāro samādhi paripuṇṇo adhipaññāsikkhaṃ paripūreti, adhipaññāsikkhā paripuṇṇā paggahanimittaṃ paripūreti, paggahanimittaṃ paripuṇṇaṃ aññātāvino indriyaṃ paripūreti, aññātāvino indriyaṃ paripuṇṇaṃ avihiṃsūpavicāraṃ paripūreti, avihiṃsūpavicāro paripuṇṇo brahmacariyesanaṃ paripūreti, brahmacariyesanā paripuṇṇā paññākkhandhaṃ paripūreti.
இதி இமே தயோ த⁴ம்மா குஸலபக்கி²கா ஸப்³பே³ குஸலா த⁴ம்மா தீஹி திகனித்³தே³ஸேஹி நித்³தி³ஸியந்தி தீணி விமொக்க²முகா²னி தஸ்ஸ பரியோஸானங். தத்த² பட²மேன அப்பணிஹிதங், து³தியேன ஸுஞ்ஞதங், ததியேன அனிமித்தங். அயங் வுச்சதி து³தியோ திபுக்க²லோ நாம நயோ.
Iti ime tayo dhammā kusalapakkhikā sabbe kusalā dhammā tīhi tikaniddesehi niddisiyanti tīṇi vimokkhamukhāni tassa pariyosānaṃ. Tattha paṭhamena appaṇihitaṃ, dutiyena suññataṃ, tatiyena animittaṃ. Ayaṃ vuccati dutiyo tipukkhalo nāma nayo.
தத்த² யே இமே தயோ புக்³க³லா உக்³க⁴டிதஞ்ஞூ விபஞ்சிதஞ்ஞூ நெய்யோதி. இமேஸங் திண்ணங் புக்³க³லானங் யே ச புக்³க³லா ஸுகா²ய படிபதா³ய கி²ப்பாபி⁴ஞ்ஞாய, ஸுகா²ய படிபதா³ய த³ந்தா⁴பி⁴ஞ்ஞாய ச நிய்யந்தி, தே த்³வே புக்³க³லா. யே ச த்³வே புக்³க³லா து³க்கா²ய படிபதா³ய கி²ப்பாபி⁴ஞ்ஞாய, து³க்கா²ய படிபதா³ய த³ந்தா⁴பி⁴ஞ்ஞாய ச நிய்யந்தி , இமே சத்தாரோ தேன விஸேஸேன த்³வே ப⁴வந்தி தி³ட்டி²சரிதோ ச தண்ஹாசரிதோ ச. இமே சத்தாரோ ப⁴வித்வா தயோ ப⁴வந்தி, தயோ ப⁴வித்வா த்³வே ப⁴வந்தி. இமேஸங் த்³வின்னங் புக்³க³லானங் அயங் ஸங்கிலேஸோ, அவிஜ்ஜா ச தண்ஹா ச, அஹிரிகஞ்ச அனொத்தப்பஞ்ச, அஸ்ஸதி ச அஸம்பஜஞ்ஞஞ்ச, நீவரணானி ச ஸங்யோஜனானி ச, அஜ்ஜோ²ஸானஞ்ச அபி⁴னிவேஸோ ச, அஹங்காரோ ச மமங்காரோ ச, அஸ்ஸத்³தி⁴யஞ்ச தோ³வசஸ்ஸஞ்ச, கோஸஜ்ஜஞ்ச அயோனிஸோ ச மனஸிகாரோ, விசிகிச்சா² ச அபி⁴ஜ்ஜா² ச, அஸத்³த⁴ம்மஸ்ஸவனஞ்ச அஸமாபத்தி ச.
Tattha ye ime tayo puggalā ugghaṭitaññū vipañcitaññū neyyoti. Imesaṃ tiṇṇaṃ puggalānaṃ ye ca puggalā sukhāya paṭipadāya khippābhiññāya, sukhāya paṭipadāya dandhābhiññāya ca niyyanti, te dve puggalā. Ye ca dve puggalā dukkhāya paṭipadāya khippābhiññāya, dukkhāya paṭipadāya dandhābhiññāya ca niyyanti , ime cattāro tena visesena dve bhavanti diṭṭhicarito ca taṇhācarito ca. Ime cattāro bhavitvā tayo bhavanti, tayo bhavitvā dve bhavanti. Imesaṃ dvinnaṃ puggalānaṃ ayaṃ saṃkileso, avijjā ca taṇhā ca, ahirikañca anottappañca, assati ca asampajaññañca, nīvaraṇāni ca saṃyojanāni ca, ajjhosānañca abhiniveso ca, ahaṃkāro ca mamaṃkāro ca, assaddhiyañca dovacassañca, kosajjañca ayoniso ca manasikāro, vicikicchā ca abhijjhā ca, asaddhammassavanañca asamāpatti ca.
தத்த² அவிஜ்ஜா ச அஹிரிகஞ்ச அஸ்ஸதி ச நீவரணானி ச அஜ்ஜோ²ஸானஞ்ச அஹங்காரோ ச அஸ்ஸத்³தி⁴யஞ்ச கோஸஜ்ஜஞ்ச விசிகிச்சா² ச அஸத்³த⁴ம்மஸ்ஸவனஞ்ச, அயங் ஏகா தி³ஸா.
Tattha avijjā ca ahirikañca assati ca nīvaraṇāni ca ajjhosānañca ahaṃkāro ca assaddhiyañca kosajjañca vicikicchā ca asaddhammassavanañca, ayaṃ ekā disā.
தண்ஹா ச அனொத்தப்பஞ்ச அஸம்பஜஞ்ஞஞ்ச ஸங்யோஜனானி ச அபி⁴னிவேஸோ ச மமங்காரோ ச தோ³வசஸ்ஸதா ச அயோனிஸோ மனஸிகாரோ ச அபி⁴ஜ்ஜா² ச அஸமாபத்தி ச, அயங் து³தியா தி³ஸா. த³ஸன்னங் து³கானங் த³ஸ பதா³னி பட²மானி காதப்³பா³னி. ஸங்கி²த்தேன அத்த²ங் ஞாபெந்தி படிபக்கே² கண்ஹபக்க²ஸ்ஸ ஸப்³பே³ஸங் து³கானங் த³ஸ பதா³னி து³தியகானி, அயங் து³தியா தி³ஸா.
Taṇhā ca anottappañca asampajaññañca saṃyojanāni ca abhiniveso ca mamaṃkāro ca dovacassatā ca ayoniso manasikāro ca abhijjhā ca asamāpatti ca, ayaṃ dutiyā disā. Dasannaṃ dukānaṃ dasa padāni paṭhamāni kātabbāni. Saṃkhittena atthaṃ ñāpenti paṭipakkhe kaṇhapakkhassa sabbesaṃ dukānaṃ dasa padāni dutiyakāni, ayaṃ dutiyā disā.
இதி அகுஸலானங் த⁴ம்மானங் து³க்க²னித்³தே³ஸோ, அயங் ஸமுத³யோ. யங் தங் த⁴ம்மங் அஜ்ஜா²வஸதி நாமஞ்ச ரூபஞ்ச இத³ங் து³க்க²ங் இதி அயஞ்ச ஸமுத³யோ, இத³ஞ்ச து³க்க²ங், இமானி த்³வே ஸச்சானி து³க்க²ஞ்ச ஸமுத³யோ ச நந்தி³யாவட்டஸ்ஸ நயஸ்ஸ பட²மனித்³தே³ஸோ.
Iti akusalānaṃ dhammānaṃ dukkhaniddeso, ayaṃ samudayo. Yaṃ taṃ dhammaṃ ajjhāvasati nāmañca rūpañca idaṃ dukkhaṃ iti ayañca samudayo, idañca dukkhaṃ, imāni dve saccāni dukkhañca samudayo ca nandiyāvaṭṭassa nayassa paṭhamaniddeso.
தத்த² கதமோ குஸலபக்கோ²? ஸமதோ² ச விபஸ்ஸனா ச, விஜ்ஜா ச சரணஞ்ச, ஸதி ச ஸம்பஜஞ்ஞஞ்ச, ஹிரீ ச ஒத்தப்பஞ்ச, அஹங்காரப்பஹானஞ்ச மமங்காரப்பஹானஞ்ச, ஸம்மாவாயாமோ ச யோனிஸோ ச மனஸிகாரோ, ஸம்மாஸதி ச ஸம்மாஸமாதி⁴ ச, பஞ்ஞா ச நிப்³பி³தா³ ச, ஸமாபத்தி ச ஸத்³த⁴ம்மஸ்ஸவனஞ்ச, ஸோமனஸ்ஸஞ்ச த⁴ம்மானுத⁴ம்மப்படிபத்தி ச.
Tattha katamo kusalapakkho? Samatho ca vipassanā ca, vijjā ca caraṇañca, sati ca sampajaññañca, hirī ca ottappañca, ahaṃkārappahānañca mamaṃkārappahānañca, sammāvāyāmo ca yoniso ca manasikāro, sammāsati ca sammāsamādhi ca, paññā ca nibbidā ca, samāpatti ca saddhammassavanañca, somanassañca dhammānudhammappaṭipatti ca.
தத்த² ஸமதோ² ச விஜ்ஜா ச ஸதி ச ஹிரீ ச அஹங்காரப்பஹானஞ்ச ஸம்மாவாயாமோ ச ஸம்மாஸதி ச பஞ்ஞா ச ஸமாபத்தி ச ஸோமனஸ்ஸஞ்ச, இமே த⁴ம்மா ஏகா தி³ஸா. விபஸ்ஸனா ச சரணஞ்ச ஸம்பஜஞ்ஞஞ்ச ஒத்தப்பஞ்ச மமங்காரப்பஹானஞ்ச யோனிஸோ மனஸிகாரோ ச ஸம்மாஸமாதி⁴ ச நிப்³பி³தா³ ச ஸத்³த⁴ம்மஸ்ஸவனஞ்ச த⁴ம்மானுத⁴ம்மப்படிபத்தி ச, அயங் து³தியா தி³ஸா. இதி குஸலபக்கே² ச அகுஸலபக்கே² ச நந்தி³யாவட்டஸ்ஸ பன நயஸ்ஸ சதஸ்ஸோ தி³ஸா.
Tattha samatho ca vijjā ca sati ca hirī ca ahaṃkārappahānañca sammāvāyāmo ca sammāsati ca paññā ca samāpatti ca somanassañca, ime dhammā ekā disā. Vipassanā ca caraṇañca sampajaññañca ottappañca mamaṃkārappahānañca yoniso manasikāro ca sammāsamādhi ca nibbidā ca saddhammassavanañca dhammānudhammappaṭipatti ca, ayaṃ dutiyā disā. Iti kusalapakkhe ca akusalapakkhe ca nandiyāvaṭṭassa pana nayassa catasso disā.
தாஸு யானி அகுஸலபக்க²ஸ்ஸ பட²மானி பதா³னி அகுஸலானி குஸலேஹி பஹானங் க³ச்ச²ந்தி, தானி குஸலபக்கே² து³தியேஹி பதே³ஹி பஹானங் க³ச்ச²ந்தி. தேஸங் பஹானா ராக³விராகா³ சேதோவிமுத்தி யானி அகுஸலபக்க²ஸ்ஸ து³தியானி அகுஸலபதா³னி பஹானங் க³ச்ச²ந்தி, தானி குஸலபக்க²ஸ்ஸ பட²மேஹி பதே³ஹி பஹானங் க³ச்ச²ந்தி. தேஸங் பஹானா அவிஜ்ஜாவிராகா³ பஞ்ஞாவிமுத்தி பரியோஸானங். இமேஸங் திண்ணங் நயானங் பட²மோ நயோ ஸீஹவிக்கீளிதோ நாம. அட்ட² பதா³னி சத்தாரி ச குஸலானி சத்தாரி ச அகுஸலானி இமானி அட்ட² பதா³னி மூலபதா³னி, அத்த²னயேன து³தியோ திபுக்க²லோ. ஸோ ச²ஹி த⁴ம்மேஹி நேதி குஸலமூலானி ச நேதி அகுஸலமூலானி ச, இதி இமானி ச² பதா³னி புரிமகானி ச அட்ட² மூலபதா³னி இமானி சுத்³த³ஸ பதா³னி அட்டா²ரஸன்னங் மூலபதா³னங். தத்த² யோ பச்சி²மகோ நயோ நந்தி³யாவட்டோ, ஸோ சதூஹி த⁴ம்மேஹி நேதி. அவிஜ்ஜாய ச தண்ஹாய ச ஸமதே²ன ச விபஸ்ஸனாய ச, இமே சத்தாரோ த⁴ம்மா இமானி அட்டா²ரஸ மூலபதா³னி தீஸு நயேஸு நித்³தி³ட்டா²னி.
Tāsu yāni akusalapakkhassa paṭhamāni padāni akusalāni kusalehi pahānaṃ gacchanti, tāni kusalapakkhe dutiyehi padehi pahānaṃ gacchanti. Tesaṃ pahānā rāgavirāgā cetovimutti yāni akusalapakkhassa dutiyāni akusalapadāni pahānaṃ gacchanti, tāni kusalapakkhassa paṭhamehi padehi pahānaṃ gacchanti. Tesaṃ pahānā avijjāvirāgā paññāvimutti pariyosānaṃ. Imesaṃ tiṇṇaṃ nayānaṃ paṭhamo nayo sīhavikkīḷito nāma. Aṭṭha padāni cattāri ca kusalāni cattāri ca akusalāni imāni aṭṭha padāni mūlapadāni, atthanayena dutiyo tipukkhalo. So chahi dhammehi neti kusalamūlāni ca neti akusalamūlāni ca, iti imāni cha padāni purimakāni ca aṭṭha mūlapadāni imāni cuddasa padāni aṭṭhārasannaṃ mūlapadānaṃ. Tattha yo pacchimako nayo nandiyāvaṭṭo, so catūhi dhammehi neti. Avijjāya ca taṇhāya ca samathena ca vipassanāya ca, ime cattāro dhammā imāni aṭṭhārasa mūlapadāni tīsu nayesu niddiṭṭhāni.
தத்த² யானி நவ பதா³னி குஸலானி, தத்த² ஸப்³ப³ங் குஸலங் ஸமோஸரதி. தேஸஞ்ச நவன்னங் மூலானங் சத்தாரி பதா³னி ஸீஹவிக்கீளிதனயே தீணி திபுக்க²லே த்³வே நந்தி³யாவட்டே, இச்சேதே குஸலஸ்ஸ பக்கா². தத்த² யானி நவ பதா³னி குஸலானி, தத்த² ஸப்³ப³ங் குஸலங் யுஜ்ஜதி. தத்த² ஸீஹவிக்கீளிதே நயே சத்தாரி பதா³னி தீணி திபுக்க²லே த்³வே நந்தி³யாவட்டே இமானி நவ பதா³னி குஸலானி நித்³தி³ட்டா²னி.
Tattha yāni nava padāni kusalāni, tattha sabbaṃ kusalaṃ samosarati. Tesañca navannaṃ mūlānaṃ cattāri padāni sīhavikkīḷitanaye tīṇi tipukkhale dve nandiyāvaṭṭe, iccete kusalassa pakkhā. Tattha yāni nava padāni kusalāni, tattha sabbaṃ kusalaṃ yujjati. Tattha sīhavikkīḷite naye cattāri padāni tīṇi tipukkhale dve nandiyāvaṭṭe imāni nava padāni kusalāni niddiṭṭhāni.
தத்த² யானி நந்தி³யாவட்டே நயே சத்தாரி பதா³னி, தத்த² அட்டா²ரஸ மூலபதா³னி ஸமோஸரந்தி. யதா² கத²ங், ஸமதோ² ச அலோபோ⁴ ச அதோ³ஸோ ச அஸுப⁴ஸஞ்ஞா ச து³க்க²ஸஞ்ஞா ச இமானி குஸலபக்கே² பஞ்ச பதா³னி ஸமத²ங் ப⁴ஜந்தி. விபஸ்ஸனா ச அமோஹோ ச அனிச்சஸஞ்ஞா ச அனத்தஸஞ்ஞா ச இமானி சத்தாரி பதா³னி விபஸ்ஸனங் ப⁴ஜந்தி. இமானி நவ பதா³னி குஸலானி த்³வீஸு பதே³ஸு யோஜிதானி, தத்த² அகுஸலபக்கே² நவன்னங் அகுஸலமூலபதா³னங் யா ச தண்ஹா யோ ச லோபோ⁴ யோ ச தோ³ஸோ யா ச ஸுப⁴ஸஞ்ஞா யா ச ஸுக²ஸஞ்ஞா, இமானி பஞ்ச பதா³னி தண்ஹங் ப⁴ஜந்தி . யா ச அவிஜ்ஜா யோ ச மோஹோ யா ச நிச்சஸஞ்ஞா யா ச அத்தஸஞ்ஞா, இமானி சத்தாரி பதா³னி அவிஜ்ஜங் ப⁴ஜந்தி. ஏதானி நவ பதா³னி அகுஸலானி ஸுஸங்கி²த்தானி. இதி தயோ நயா ஏகங் நயங் ந பவிட்டா². ஏவங் அட்டா²ரஸ மூலபதா³னி நந்தி³யாவட்டனயே நித்³தி³ஸிதப்³பா³னி.
Tattha yāni nandiyāvaṭṭe naye cattāri padāni, tattha aṭṭhārasa mūlapadāni samosaranti. Yathā kathaṃ, samatho ca alobho ca adoso ca asubhasaññā ca dukkhasaññā ca imāni kusalapakkhe pañca padāni samathaṃ bhajanti. Vipassanā ca amoho ca aniccasaññā ca anattasaññā ca imāni cattāri padāni vipassanaṃ bhajanti. Imāni nava padāni kusalāni dvīsu padesu yojitāni, tattha akusalapakkhe navannaṃ akusalamūlapadānaṃ yā ca taṇhā yo ca lobho yo ca doso yā ca subhasaññā yā ca sukhasaññā, imāni pañca padāni taṇhaṃ bhajanti . Yā ca avijjā yo ca moho yā ca niccasaññā yā ca attasaññā, imāni cattāri padāni avijjaṃ bhajanti. Etāni nava padāni akusalāni susaṃkhittāni. Iti tayo nayā ekaṃ nayaṃ na paviṭṭhā. Evaṃ aṭṭhārasa mūlapadāni nandiyāvaṭṭanaye niddisitabbāni.
கத²ங் அட்டா²ரஸ மூலபதா³னி, திபுக்க²லே நயே யுஜ்ஜந்தி? நவன்னங் பதா³னங் குஸலானங், விபஸ்ஸனா ச அமோஹோ ச அனிச்சஸஞ்ஞா ச அனத்தஸஞ்ஞா ச, இமானி சத்தாரி பதா³னி; அமோஹோ ச ஸமதோ² ச அலோபோ⁴ ச அஸுப⁴ஸஞ்ஞா ச, இமானி சத்தாரி பதா³னி; லோபோ⁴ ச தோ³ஸோ ச, ஏவங் இமானி நவ பதா³னி தீஸு குஸலேஸு யோஜேதப்³பா³னி. தத்த² நவன்னங் பதா³னங் அகுஸலானங் தண்ஹா ச லோபோ⁴ ச ஸுப⁴ஸஞ்ஞா ச ஸுக²ஸஞ்ஞா ச, இமானி சத்தாரி பதா³னி லோபோ⁴ அகுஸலமூலங்; அவிஜ்ஜா ச மோஹோ ச நிச்சஸஞ்ஞா ச அத்தஸஞ்ஞா ச அயங் மோஹோ அயங் தோ³ஸோ, யே ச இமானி நவ பதா³னி தீஸு அகுஸலேஸு யோஜிதானி. ஏவங் அட்டா²ரஸ மூலபதா³னி குஸலமூலேஸு ச யோஜெத்வா திபுக்க²லேன நயேன நித்³தி³ஸிதப்³பா³னி.
Kathaṃ aṭṭhārasa mūlapadāni, tipukkhale naye yujjanti? Navannaṃ padānaṃ kusalānaṃ, vipassanā ca amoho ca aniccasaññā ca anattasaññā ca, imāni cattāri padāni; amoho ca samatho ca alobho ca asubhasaññā ca, imāni cattāri padāni; lobho ca doso ca, evaṃ imāni nava padāni tīsu kusalesu yojetabbāni. Tattha navannaṃ padānaṃ akusalānaṃ taṇhā ca lobho ca subhasaññā ca sukhasaññā ca, imāni cattāri padāni lobho akusalamūlaṃ; avijjā ca moho ca niccasaññā ca attasaññā ca ayaṃ moho ayaṃ doso, ye ca imāni nava padāni tīsu akusalesu yojitāni. Evaṃ aṭṭhārasa mūlapadāni kusalamūlesu ca yojetvā tipukkhalena nayena niddisitabbāni.
கத²ங் அட்டா²ரஸ மூலபதா³னி ஸீஹவிக்கீளிதே நயே யுஜ்ஜந்தி? தண்ஹா ச ஸுப⁴ஸஞ்ஞா ச, அயங் பட²மோ விபல்லாஸோ. லோபோ⁴ ச ஸுக²ஸஞ்ஞா ச, அயங் து³தியோ விபல்லாஸோ. அவிஜ்ஜா ச நிச்சஸஞ்ஞா ச, அயங் ததியோ விபல்லாஸோ. மோஹோ ச அத்தஸஞ்ஞா ச, அயங் சதுத்தோ² விபல்லாஸோ. இதி நவ பதா³னி அகுஸலமூலானி சதூஸு பதே³ஸு யோஜிதானி. தத்த² நவன்னங் மூலபதா³னங் குஸலானங் ஸமதோ² ச அஸுப⁴ஸஞ்ஞா ச, இத³ங் பட²மங் ஸதிபட்டா²னங். அலோபோ⁴ ச து³க்க²ஸஞ்ஞா ச, இத³ங் து³தியங் ஸதிபட்டா²னங். விபஸ்ஸனா ச அனிச்சஸஞ்ஞா ச, இத³ங் ததியங் ஸதிபட்டா²னங். அமோஹோ ச அனத்தஸஞ்ஞா ச, இத³ங் சதுத்த²ங் ஸதிபட்டா²னங். இமானி அட்டா²ரஸ மூலபதா³னி ஸீஹவிக்கீளிதனயங் அனுபவிட்டா²னி. இமேஸங் திண்ணங் நயானங் யா பூ⁴மி ச யோ ராகோ³ ச யோ தோ³ஸோ ச ஏகங் நயங் பவிஸதி. ஏகஸ்ஸ நயஸ்ஸ அகுஸலே வா த⁴ம்மே குஸலே வா த⁴ம்மே விஞ்ஞாதே படிபக்கோ² அன்வேஸிதப்³போ³, படிபக்கே² அன்வேஸித்வா ஸோ நயோ நித்³தி³ஸிதப்³போ³, தம்ஹி நயே நித்³தி³ட்டோ². யதா² ஏகம்ஹி நயே ஸப்³பே³ நயா பவிட்டா² ததா² நித்³தி³ஸிதப்³பா³. ஏகம்ஹி ச நயே அட்டா²ரஸ மூலபதா³னி பவிட்டா²னி, தம்ஹி த⁴ம்மே விஞ்ஞாதே ஸப்³பே³ த⁴ம்மா விஞ்ஞாதா ஹொந்தி. இமேஸங் திண்ணங் நயானங் ஸீஹவிக்கீளிதனயஸ்ஸ சத்தாரி ப²லானி பரியோஸானங். பட²மாய தி³ஸாய பட²மங் ப²லங், து³தியாய தி³ஸாய து³தியங் ப²லங், ததியாய தி³ஸாய ததியங் ப²லங், சதுத்தா²ய தி³ஸாய சதுத்த²ங் ப²லங். திபுக்க²லஸ்ஸ நயஸ்ஸ தீணி விமொக்க²முகா²னி பரியோஸானங். பட²மாய தி³ஸாய அப்பணிஹிதங், து³தியாய தி³ஸாய ஸுஞ்ஞதங், ததியாய தி³ஸாய அனிமித்தங். நந்தி³யாவட்டஸ்ஸ நயஸ்ஸ ராக³விராகா³ சேதோவிமுத்தி அவிஜ்ஜாவிராகா³ ச பஞ்ஞாவிமுத்தி பரியோஸானங் . பட²மாய தி³ஸாய ராக³விராகா³ சேதோவிமுத்தி, து³தியாய தி³ஸாய அவிஜ்ஜாவிராகா³ பஞ்ஞாவிமுத்தி. இமே தயோ நயா இமேஸங் திண்ணங் நயானங் அட்டா²ரஸன்னங் மூலபதா³னங் ஆலோகனா, அயங் வுச்சதி தி³ஸாலோகனோ 9 நயோ. ஆலோகெத்வான ஜானாதி ‘‘அயங் த⁴ம்மோ இமங் த⁴ம்மங் ப⁴ஜதீ’’தி ஸம்மா யோஜனா. குஸலபக்கே² அகுஸலபக்கே² ச அயங் நயோ அங்குஸோ நாம. இமே பஞ்ச நயா.
Kathaṃ aṭṭhārasa mūlapadāni sīhavikkīḷite naye yujjanti? Taṇhā ca subhasaññā ca, ayaṃ paṭhamo vipallāso. Lobho ca sukhasaññā ca, ayaṃ dutiyo vipallāso. Avijjā ca niccasaññā ca, ayaṃ tatiyo vipallāso. Moho ca attasaññā ca, ayaṃ catuttho vipallāso. Iti nava padāni akusalamūlāni catūsu padesu yojitāni. Tattha navannaṃ mūlapadānaṃ kusalānaṃ samatho ca asubhasaññā ca, idaṃ paṭhamaṃ satipaṭṭhānaṃ. Alobho ca dukkhasaññā ca, idaṃ dutiyaṃ satipaṭṭhānaṃ. Vipassanā ca aniccasaññā ca, idaṃ tatiyaṃ satipaṭṭhānaṃ. Amoho ca anattasaññā ca, idaṃ catutthaṃ satipaṭṭhānaṃ. Imāni aṭṭhārasa mūlapadāni sīhavikkīḷitanayaṃ anupaviṭṭhāni. Imesaṃ tiṇṇaṃ nayānaṃ yā bhūmi ca yo rāgo ca yo doso ca ekaṃ nayaṃ pavisati. Ekassa nayassa akusale vā dhamme kusale vā dhamme viññāte paṭipakkho anvesitabbo, paṭipakkhe anvesitvā so nayo niddisitabbo, tamhi naye niddiṭṭho. Yathā ekamhi naye sabbe nayā paviṭṭhā tathā niddisitabbā. Ekamhi ca naye aṭṭhārasa mūlapadāni paviṭṭhāni, tamhi dhamme viññāte sabbe dhammā viññātā honti. Imesaṃ tiṇṇaṃ nayānaṃ sīhavikkīḷitanayassa cattāri phalāni pariyosānaṃ. Paṭhamāya disāya paṭhamaṃ phalaṃ, dutiyāya disāya dutiyaṃ phalaṃ, tatiyāya disāya tatiyaṃ phalaṃ, catutthāya disāya catutthaṃ phalaṃ. Tipukkhalassa nayassa tīṇi vimokkhamukhāni pariyosānaṃ. Paṭhamāya disāya appaṇihitaṃ, dutiyāya disāya suññataṃ, tatiyāya disāya animittaṃ. Nandiyāvaṭṭassa nayassa rāgavirāgā cetovimutti avijjāvirāgā ca paññāvimutti pariyosānaṃ . Paṭhamāya disāya rāgavirāgā cetovimutti, dutiyāya disāya avijjāvirāgā paññāvimutti. Ime tayo nayā imesaṃ tiṇṇaṃ nayānaṃ aṭṭhārasannaṃ mūlapadānaṃ ālokanā, ayaṃ vuccati disālokano 10 nayo. Āloketvāna jānāti ‘‘ayaṃ dhammo imaṃ dhammaṃ bhajatī’’ti sammā yojanā. Kusalapakkhe akusalapakkhe ca ayaṃ nayo aṅkuso nāma. Ime pañca nayā.
தத்தி²மா உத்³தா³னகா³தா²
Tatthimā uddānagāthā
தண்ஹா ச அவிஜ்ஜாபி ச, லோபோ⁴ தோ³ஸோ ததே²வ மோஹோ ச;
Taṇhā ca avijjāpi ca, lobho doso tatheva moho ca;
சத்தாரோ ச விபல்லாஸா, கிலேஸபூ⁴மீ நவ பதா³னி.
Cattāro ca vipallāsā, kilesabhūmī nava padāni.
யே ச ஸதிபட்டா²னா, ஸமதோ² ச விபஸ்ஸனா குஸலமூலா;
Ye ca satipaṭṭhānā, samatho ca vipassanā kusalamūlā;
ஏதங் ஸப்³ப³ங் குஸலங், இந்த்³ரியபூ⁴மீ நவ பதா³னி.
Etaṃ sabbaṃ kusalaṃ, indriyabhūmī nava padāni.
ஸப்³ப³குஸலங் நவஹி பதே³ஹி யுஜ்ஜதி, நவஹி சேவ அகுஸலங்;
Sabbakusalaṃ navahi padehi yujjati, navahi ceva akusalaṃ;
ஏதே தே மூலபதா³, உப⁴தோ அட்டா²ரஸ பதா³னி.
Ete te mūlapadā, ubhato aṭṭhārasa padāni.
தண்ஹா சேவ அவிஜ்ஜா ச, ஸமதோ² ச விபஸ்ஸனா;
Taṇhā ceva avijjā ca, samatho ca vipassanā;
யோ நேதி ஸப்³பே³ஸு யோக³யுத்தோ, அயங் நயோ நந்தி³யாவட்டோ.
Yo neti sabbesu yogayutto, ayaṃ nayo nandiyāvaṭṭo.
யங் குஸலமூலேஹி, நயதி குஸலஅகுஸலமூலேஹி;
Yaṃ kusalamūlehi, nayati kusalaakusalamūlehi;
பூ⁴தங் தத²ங் அவிதத²ங், திபுக்க²லங் தங் நயங் ஆஹு.
Bhūtaṃ tathaṃ avitathaṃ, tipukkhalaṃ taṃ nayaṃ āhu.
ஸோ நேதி விபல்லாஸேஹி, கிலேஸஇந்த்³ரியேஹி ச;
So neti vipallāsehi, kilesaindriyehi ca;
த⁴ம்மே தங் நயங் வினயமாஹு, ஸீஹவிக்கீளிதங் நாம.
Dhamme taṃ nayaṃ vinayamāhu, sīhavikkīḷitaṃ nāma.
வெய்யாகரணே வுத்தே, குஸலதாஹி அகுஸலதாஹி ச;
Veyyākaraṇe vutte, kusalatāhi akusalatāhi ca;
தயோ ஆலோகயதி, அயங் நயோ தி³ஸாலோசனோ நாம.
Tayo ālokayati, ayaṃ nayo disālocano nāma.
ஓலோகெத்வா தி³ஸாலோசனேன, உக்கி²பிய யங் ஸமானேதி;
Oloketvā disālocanena, ukkhipiya yaṃ samāneti;
ஸப்³பே³ குஸலாகுஸலே, அயங் நயோ அங்குஸோ நாம.
Sabbe kusalākusale, ayaṃ nayo aṅkuso nāma.
நயஸமுட்டா²னங்.
Nayasamuṭṭhānaṃ.
பேடகோபதே³ஸே மஹாகச்சாயனஸ்ஸ தே²ரஸ்ஸ ஸுத்தவிப⁴ங்க³ஸ்ஸ
Peṭakopadese mahākaccāyanassa therassa suttavibhaṅgassa
யானி சதுக்கானி அகுஸலானி குஸலானி ச ஸீஹவிக்கீளிதே நயே நித்³தி³ட்டா²னி, திகானி குஸலானி ச அகுஸலானி ச திபுக்க²லே நயே நித்³தி³ட்டா²னி, து³கானி குஸலானி ச அகுஸலானி ச நந்தி³யாவட்டே நயே நித்³தி³ட்டா²னி. யேஸு த்³வீஸு த⁴ம்மேஸு 13 குஸலேஸு ஸோ அத்தோ² திகேஸு விப⁴ஜ்ஜமானஸ்ஸ ப⁴வபூ⁴மி, அத² ச ஸப்³போ³ 14 ச அத்தோ² தீஹி ப்³யஞ்ஜனேஹி நித்³தி³ஸதி. தத்தகானி வுச்சதி. யோ அத்தோ² சதூஹி பதே³ஹி அட்ட²வீஸதிபா⁴கே³ஹி நத்தி²பூ⁴மி நித்³தி³ஸிதுங், அவசரந்தோவ சதூஹி பதே³ஹி நித்³தி³ஸதி. இதி யங் யதா²னித்³தி³ட்ட²ஸ்ஸ அவிகோஸனா இத³ங் பமாணங். யதா² ஸப்³பே³ ஸமாத⁴யோ தீஸு ஸமாதீ⁴ஸு பரியேஸிதப்³பா³, ஸவிதக்கஸவிசாரே அவிதக்கவிசாரமத்தே அவிதக்கஅவிசாரே இத³ங் பமாணங், நத்தி² சதுத்தோ² ஸமாதி⁴. ததா² திஸ்ஸோ பஞ்ஞா சிந்தாமயீ ஸுதமயீ பா⁴வனாமயீ ஸப்³பா³ஸு பஞ்ஞாஸு நித்³தி³ஸதி, நத்தி² சதுத்தீ² பஞ்ஞா ந சிந்தாமயீ ந ஸுதமயீ ந பா⁴வனாமயீ, பஞ்ஞா நாஸ்ஸ அத்தி² இமேஸங் த⁴ம்மானங் யா அவிக்கே²பனா, இத³ங் வுச்சதி பமாணந்தி.
Yāni catukkāni akusalāni kusalāni ca sīhavikkīḷite naye niddiṭṭhāni, tikāni kusalāni ca akusalāni ca tipukkhale naye niddiṭṭhāni, dukāni kusalāni ca akusalāni ca nandiyāvaṭṭe naye niddiṭṭhāni. Yesu dvīsu dhammesu 15 kusalesu so attho tikesu vibhajjamānassa bhavabhūmi, atha ca sabbo 16 ca attho tīhi byañjanehi niddisati. Tattakāni vuccati. Yo attho catūhi padehi aṭṭhavīsatibhāgehi natthibhūmi niddisituṃ, avacarantova catūhi padehi niddisati. Iti yaṃ yathāniddiṭṭhassa avikosanā idaṃ pamāṇaṃ. Yathā sabbe samādhayo tīsu samādhīsu pariyesitabbā, savitakkasavicāre avitakkavicāramatte avitakkaavicāre idaṃ pamāṇaṃ, natthi catuttho samādhi. Tathā tisso paññā cintāmayī sutamayī bhāvanāmayī sabbāsu paññāsu niddisati, natthi catutthī paññā na cintāmayī na sutamayī na bhāvanāmayī, paññā nāssa atthi imesaṃ dhammānaṃ yā avikkhepanā, idaṃ vuccati pamāṇanti.
தே²ரஸ்ஸ மஹாகச்சாயனஸ்ஸ ஜம்பு³வனவாஸினோ பேடகோபதே³ஸோ
Therassa mahākaccāyanassa jambuvanavāsino peṭakopadeso
ஸமத்தோ.
Samatto.
பேடகோபதே³ஸபகரணங் நிட்டி²தங்.
Peṭakopadesapakaraṇaṃ niṭṭhitaṃ.
Footnotes:
