| Library / Tipiṭaka / ติปิฎก • Tipiṭaka / เปตวตฺถุปาฬิ • Petavatthupāḷi |
๑๑. สุตฺตเปตวตฺถุ
11. Suttapetavatthu
๓๔๑.
341.
‘‘อหํ ปุเร ปพฺพชิตสฺส ภิกฺขุโน, สุตฺตํ อทาสิํ อุปสงฺกมฺม ยาจิตา;
‘‘Ahaṃ pure pabbajitassa bhikkhuno, suttaṃ adāsiṃ upasaṅkamma yācitā;
ตสฺส วิปาโก วิปุลผลูปลพฺภติ, พหุกา จ เม อุปฺปชฺชเร 1 วตฺถโกฎิโยฯ
Tassa vipāko vipulaphalūpalabbhati, bahukā ca me uppajjare 2 vatthakoṭiyo.
๓๔๒.
342.
‘‘ปุปฺผาภิกิณฺณํ รมิตํ 3 วิมานํ, อเนกจิตฺตํ นรนาริเสวิตํ;
‘‘Pupphābhikiṇṇaṃ ramitaṃ 4 vimānaṃ, anekacittaṃ naranārisevitaṃ;
สาหํ ภุญฺชามิ จ ปารุปามิ จ, ปหูตวิตฺตา น จ ตาว ขียติฯ
Sāhaṃ bhuñjāmi ca pārupāmi ca, pahūtavittā na ca tāva khīyati.
๓๔๓.
343.
‘‘ตเสฺสว กมฺมสฺส วิปากมนฺวยา, สุขญฺจ สาตญฺจ อิธูปลพฺภติ;
‘‘Tasseva kammassa vipākamanvayā, sukhañca sātañca idhūpalabbhati;
สาหํ คนฺตฺวา ปุนเทว มานุสํ, กาหามิ ปุญฺญานิ นยยฺยปุตฺต ม’’นฺติฯ
Sāhaṃ gantvā punadeva mānusaṃ, kāhāmi puññāni nayayyaputta ma’’nti.
๓๔๔.
344.
‘‘สตฺต ตุวํ วสฺสสตา อิธาคตา,
‘‘Satta tuvaṃ vassasatā idhāgatā,
ชิณฺณา จ วุฑฺฒา จ ตหิํ ภวิสฺสสิ;
Jiṇṇā ca vuḍḍhā ca tahiṃ bhavissasi;
สเพฺพว เต กาลกตา จ ญาตกา,
Sabbeva te kālakatā ca ñātakā,
กิํ ตตฺถ คนฺตฺวาน อิโต กริสฺสสี’’ติฯ
Kiṃ tattha gantvāna ito karissasī’’ti.
๓๔๕.
345.
‘‘สเตฺตว วสฺสานิ อิธาคตาย เม, ทิพฺพญฺจ สุขญฺจ สมปฺปิตาย;
‘‘Satteva vassāni idhāgatāya me, dibbañca sukhañca samappitāya;
สาหํ คนฺตฺวาน ปุนเทว มานุสํ, กาหามิ ปุญฺญานิ นยยฺยปุตฺต ม’’นฺติฯ
Sāhaṃ gantvāna punadeva mānusaṃ, kāhāmi puññāni nayayyaputta ma’’nti.
๓๔๖.
346.
โส ตํ คเหตฺวาน ปสยฺห พาหายํ, ปจฺจานยิตฺวาน เถริํ สุทุพฺพลํ;
So taṃ gahetvāna pasayha bāhāyaṃ, paccānayitvāna theriṃ sudubbalaṃ;
‘‘วเชฺชสิ อญฺญมฺปิ ชนํ อิธาคตํ, ‘กโรถ ปุญฺญานิ สุขูปลพฺภติ’’ฯ
‘‘Vajjesi aññampi janaṃ idhāgataṃ, ‘karotha puññāni sukhūpalabbhati’’.
๓๔๗.
347.
‘‘ทิฎฺฐา มยา อกเตน สาธุนา, เปตา วิหญฺญนฺติ ตเถว มนุสฺสา;
‘‘Diṭṭhā mayā akatena sādhunā, petā vihaññanti tatheva manussā;
กมฺมญฺจ กตฺวา สุขเวทนียํ, เทวา มนุสฺสา จ สุเข ฐิตา ปชา’’ติฯ
Kammañca katvā sukhavedanīyaṃ, devā manussā ca sukhe ṭhitā pajā’’ti.
สุตฺตเปตวตฺถุ เอกาทสมํฯ
Suttapetavatthu ekādasamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / เปตวตฺถุ-อฎฺฐกถา • Petavatthu-aṭṭhakathā / ๑๑. สุตฺตเปตวตฺถุวณฺณนา • 11. Suttapetavatthuvaṇṇanā
