| Library / Tipiṭaka / तिपिटक • Tipiṭaka / चरियापिटकपाळि • Cariyāpiṭakapāḷi |
१२. सुतसोमचरिया
12. Sutasomacariyā
१०५.
105.
‘‘पुनापरं यदा होमि, सुतसोमो महीपति।
‘‘Punāparaṃ yadā homi, sutasomo mahīpati;
गहितो पोरिसादेन, ब्राह्मणे सङ्गरं सरिं॥
Gahito porisādena, brāhmaṇe saṅgaraṃ sariṃ.
१०६.
106.
‘‘खत्तियानं एकसतं, आवुणित्वा करत्तले।
‘‘Khattiyānaṃ ekasataṃ, āvuṇitvā karattale;
एतेसं पमिलापेत्वा, यञ्ञत्थे उपनयी ममं॥
Etesaṃ pamilāpetvā, yaññatthe upanayī mamaṃ.
१०७.
107.
‘‘अपुच्छि मं पोरिसादो, ‘किं त्वं इच्छसि निस्सजं।
‘‘Apucchi maṃ porisādo, ‘kiṃ tvaṃ icchasi nissajaṃ;
यथामति ते काहामि, यदि मे त्वं पुनेहिसि’॥
Yathāmati te kāhāmi, yadi me tvaṃ punehisi’.
१०८.
108.
‘‘तस्स पटिस्सुणित्वान, पण्हे आगमनं मम।
‘‘Tassa paṭissuṇitvāna, paṇhe āgamanaṃ mama;
उपगन्त्वा पुरं रम्मं, रज्जं निय्यादयिं तदा॥
Upagantvā puraṃ rammaṃ, rajjaṃ niyyādayiṃ tadā.
१०९.
109.
‘‘अनुस्सरित्वा सतं धम्मं, पुब्बकं जिनसेवितं।
‘‘Anussaritvā sataṃ dhammaṃ, pubbakaṃ jinasevitaṃ;
ब्राह्मणस्स धनं दत्वा, पोरिसादं उपागमिं॥
Brāhmaṇassa dhanaṃ datvā, porisādaṃ upāgamiṃ.
११०.
110.
‘‘नत्थि मे संसयो तत्थ, घातयिस्सति वा न वा।
‘‘Natthi me saṃsayo tattha, ghātayissati vā na vā;
सच्चवाचानुरक्खन्तो, जीवितं चजितुमुपागमिं।
Saccavācānurakkhanto, jīvitaṃ cajitumupāgamiṃ;
सच्चेन मे समो नत्थि, एसा मे सच्चपारमी’’ति॥
Saccena me samo natthi, esā me saccapāramī’’ti.
सुतसोमचरियं द्वादसमं।
Sutasomacariyaṃ dvādasamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / चरियापिटक-अट्ठकथा • Cariyāpiṭaka-aṭṭhakathā / १२. महासुतसोमचरियावण्णना • 12. Mahāsutasomacariyāvaṇṇanā
