| Library / Tipiṭaka / ཏིཔིཊཀ • Tipiṭaka / པརིཝཱརཔཱལི༹ • Parivārapāḷi |
༦. སུརཱམེརཡཝགྒོ
6. Surāmerayavaggo
༡༧༠. མཛྫཾ པིཝནྟོ དྭེ ཨཱཔཏྟིཡོ ཨཱཔཛྫཏི། ‘‘པིཝིསྶཱམཱི’’ཏི པཊིགྒཎྷཱཏི, ཨཱཔཏྟི དུཀྐཊསྶ; ཨཛ྄ཛྷོཧཱརེ ཨཛ྄ཛྷོཧཱརེ ཨཱཔཏྟི པཱཙིཏྟིཡསྶ།
170. Majjaṃ pivanto dve āpattiyo āpajjati. ‘‘Pivissāmī’’ti paṭiggaṇhāti, āpatti dukkaṭassa; ajjhohāre ajjhohāre āpatti pācittiyassa.
བྷིཀྑུཾ ཨངྒུལིཔཏོདཀེན ཧཱསེནྟོ དྭེ ཨཱཔཏྟིཡོ ཨཱཔཛྫཏི། ཧཱསེཏི, པཡོགེ དུཀྐཊཾ; ཧསིཏེ ཨཱཔཏྟི པཱཙིཏྟིཡསྶ།
Bhikkhuṃ aṅgulipatodakena hāsento dve āpattiyo āpajjati. Hāseti, payoge dukkaṭaṃ; hasite āpatti pācittiyassa.
ཨུདཀེ ཀཱིལ༹ནྟོ དྭེ ཨཱཔཏྟིཡོ ཨཱཔཛྫཏི། ཧེཊྛཱགོཔྥཀེ ཨུདཀེ ཀཱིལ༹ཏི, ཨཱཔཏྟི དུཀྐཊསྶ; ཨུཔརིགོཔྥཀེ ཀཱིལ༹ཏི, ཨཱཔཏྟི པཱཙིཏྟིཡསྶ།
Udake kīḷanto dve āpattiyo āpajjati. Heṭṭhāgopphake udake kīḷati, āpatti dukkaṭassa; uparigopphake kīḷati, āpatti pācittiyassa.
ཨནཱདརིཡཾ ཀརོནྟོ དྭེ ཨཱཔཏྟིཡོ ཨཱཔཛྫཏི། ཀརོཏི, པཡོགེ དུཀྐཊཾ; ཀཏེ ཨཱཔཏྟི པཱཙིཏྟིཡསྶ།
Anādariyaṃ karonto dve āpattiyo āpajjati. Karoti, payoge dukkaṭaṃ; kate āpatti pācittiyassa.
བྷིཀྑུཾ བྷིཾསཱཔེནྟོ དྭེ ཨཱཔཏྟིཡོ ཨཱཔཛྫཏི། བྷིཾསཱཔེཏི, པཡོགེ དུཀྐཊཾ; བྷིཾསཱཔིཏེ ཨཱཔཏྟི པཱཙིཏྟིཡསྶ།
Bhikkhuṃ bhiṃsāpento dve āpattiyo āpajjati. Bhiṃsāpeti, payoge dukkaṭaṃ; bhiṃsāpite āpatti pācittiyassa.
ཛོཏིཾ སམཱདཧིཏྭཱ ཝིསིབྦེནྟོ དྭེ ཨཱཔཏྟིཡོ ཨཱཔཛྫཏི། སམཱདཧཏི , པཡོགེ དུཀྐཊཾ; སམཱདཧིཏེ ཨཱཔཏྟི པཱཙིཏྟིཡསྶ།
Jotiṃ samādahitvā visibbento dve āpattiyo āpajjati. Samādahati , payoge dukkaṭaṃ; samādahite āpatti pācittiyassa.
ཨོརེནདྡྷམཱསཾ ནཧཱཡནྟོ དྭེ ཨཱཔཏྟིཡོ ཨཱཔཛྫཏི། ནཧཱཡཏི, པཡོགེ དུཀྐཊཾ; ནཧཱནཔརིཡོསཱནེ ཨཱཔཏྟི པཱཙིཏྟིཡསྶ།
Orenaddhamāsaṃ nahāyanto dve āpattiyo āpajjati. Nahāyati, payoge dukkaṭaṃ; nahānapariyosāne āpatti pācittiyassa.
ཨནཱདིཡིཏྭཱ ཏིཎྞཾ དུབྦཎྞཀརཎཱནཾ ཨཉྙཏརཾ དུབྦཎྞཀརཎཾ ནཝཾ ཙཱིཝརཾ པརིབྷུཉྫནྟོ དྭེ ཨཱཔཏྟིཡོ ཨཱཔཛྫཏི། པརིབྷུཉྫཏི, པཡོགེ དུཀྐཊཾ; པརིབྷུཏྟེ ཨཱཔཏྟི པཱཙིཏྟིཡསྶ།
Anādiyitvā tiṇṇaṃ dubbaṇṇakaraṇānaṃ aññataraṃ dubbaṇṇakaraṇaṃ navaṃ cīvaraṃ paribhuñjanto dve āpattiyo āpajjati. Paribhuñjati, payoge dukkaṭaṃ; paribhutte āpatti pācittiyassa.
བྷིཀྑུསྶ ཝཱ བྷིཀྑུནིཡཱ ཝཱ སིཀྑམཱནཱཡ ཝཱ སཱམཎེརསྶ ཝཱ སཱམཎེརིཡཱ ཝཱ སཱམཾ ཙཱིཝརཾ ཝིཀཔྤེཏྭཱ ཨཔྤཙྩུདྡྷཱརཎཾ པརིབྷུཉྫནྟོ དྭེ ཨཱཔཏྟིཡོ ཨཱཔཛྫཏི། པརིབྷུཉྫཏི, པཡོགེ དུཀྐཊཾ; པརིབྷུཏྟེ ཨཱཔཏྟི པཱཙིཏྟིཡསྶ།
Bhikkhussa vā bhikkhuniyā vā sikkhamānāya vā sāmaṇerassa vā sāmaṇeriyā vā sāmaṃ cīvaraṃ vikappetvā appaccuddhāraṇaṃ paribhuñjanto dve āpattiyo āpajjati. Paribhuñjati, payoge dukkaṭaṃ; paribhutte āpatti pācittiyassa.
བྷིཀྑུསྶ པཏྟཾ ཝཱ ཙཱིཝརཾ ཝཱ ནིསཱིདནཾ ཝཱ སཱུཙིགྷརཾ ཝཱ ཀཱཡབནྡྷནཾ ཝཱ ཨཔནིདྷེནྟོ དྭེ ཨཱཔཏྟིཡོ ཨཱཔཛྫཏི། ཨཔནིདྷེཏི, པཡོགེ དུཀྐཊཾ; ཨཔནིདྷིཏེ ཨཱཔཏྟི པཱཙིཏྟིཡསྶ།
Bhikkhussa pattaṃ vā cīvaraṃ vā nisīdanaṃ vā sūcigharaṃ vā kāyabandhanaṃ vā apanidhento dve āpattiyo āpajjati. Apanidheti, payoge dukkaṭaṃ; apanidhite āpatti pācittiyassa.
སུརཱམེརཡཝགྒོ ཚཊྛོ།
Surāmerayavaggo chaṭṭho.
