| Library / Tipiṭaka / તિપિટક • Tipiṭaka / કઙ્ખાવિતરણી-અભિનવ-ટીકા • Kaṅkhāvitaraṇī-abhinava-ṭīkā |
૩-૪. સુપ્પટિચ્છન્નસિક્ખાપદવણ્ણના
3-4. Suppaṭicchannasikkhāpadavaṇṇanā
સુટ્ઠુ પટિચ્છન્નોતિ જત્તુમ્પિ ઉરમ્પિ અવિવરિત્વા પટિચ્છાદેતબ્બટ્ઠાને પટિચ્છાદનેન પટિચ્છન્નો, ન સીસપારુતો. તેનાહ ‘‘ગણ્ઠિકં પટિમુઞ્ચિત્વા’’તિઆદિ. તત્થ ગણ્ઠિકં પટિમુઞ્ચિત્વાતિ ગણ્ઠિકં પાસકે પટિમુઞ્ચિત્વા. અન્તરઘરે વાતિ ગોચરગામે. એકદિવસમ્પિ વાસૂપગતસ્સ સન્તિકં યથાસુખં ગન્તું વટ્ટતિ, કો પન વાદો ચતુપ્પઞ્ચાહં વાસમધિટ્ઠાય વસિતભિક્ખૂનં સન્તિકન્તિ ગણ્ઠિપદે લિખિતં.
Suṭṭhu paṭicchannoti jattumpi urampi avivaritvā paṭicchādetabbaṭṭhāne paṭicchādanena paṭicchanno, na sīsapāruto. Tenāha ‘‘gaṇṭhikaṃ paṭimuñcitvā’’tiādi. Tattha gaṇṭhikaṃ paṭimuñcitvāti gaṇṭhikaṃ pāsake paṭimuñcitvā. Antaraghare vāti gocaragāme. Ekadivasampi vāsūpagatassa santikaṃ yathāsukhaṃ gantuṃ vaṭṭati, ko pana vādo catuppañcāhaṃ vāsamadhiṭṭhāya vasitabhikkhūnaṃ santikanti gaṇṭhipade likhitaṃ.
વાસૂપગતસ્સાતિ રત્તિવાસત્થાય ઉપગતસ્સ રત્તિભાગે વા દિવસભાગે વા કાયં વિવરિત્વા નિસીદતો અનાપત્તિ.
Vāsūpagatassāti rattivāsatthāya upagatassa rattibhāge vā divasabhāge vā kāyaṃ vivaritvā nisīdato anāpatti.
સુપ્પટિચ્છન્નસિક્ખાપદવણ્ણના નિટ્ઠિતા.
Suppaṭicchannasikkhāpadavaṇṇanā niṭṭhitā.
