| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
३-४. सुप्पटिच्छन्नसिक्खापदवण्णना
3-4. Suppaṭicchannasikkhāpadavaṇṇanā
सुट्ठु पटिच्छन्नोति जत्तुम्पि उरम्पि अविवरित्वा पटिच्छादेतब्बट्ठाने पटिच्छादनेन पटिच्छन्नो, न सीसपारुतो। तेनाह ‘‘गण्ठिकं पटिमुञ्चित्वा’’तिआदि। तत्थ गण्ठिकं पटिमुञ्चित्वाति गण्ठिकं पासके पटिमुञ्चित्वा। अन्तरघरे वाति गोचरगामे। एकदिवसम्पि वासूपगतस्स सन्तिकं यथासुखं गन्तुं वट्टति, को पन वादो चतुप्पञ्चाहं वासमधिट्ठाय वसितभिक्खूनं सन्तिकन्ति गण्ठिपदे लिखितं।
Suṭṭhu paṭicchannoti jattumpi urampi avivaritvā paṭicchādetabbaṭṭhāne paṭicchādanena paṭicchanno, na sīsapāruto. Tenāha ‘‘gaṇṭhikaṃ paṭimuñcitvā’’tiādi. Tattha gaṇṭhikaṃ paṭimuñcitvāti gaṇṭhikaṃ pāsake paṭimuñcitvā. Antaraghare vāti gocaragāme. Ekadivasampi vāsūpagatassa santikaṃ yathāsukhaṃ gantuṃ vaṭṭati, ko pana vādo catuppañcāhaṃ vāsamadhiṭṭhāya vasitabhikkhūnaṃ santikanti gaṇṭhipade likhitaṃ.
वासूपगतस्साति रत्तिवासत्थाय उपगतस्स रत्तिभागे वा दिवसभागे वा कायं विवरित्वा निसीदतो अनापत्ति।
Vāsūpagatassāti rattivāsatthāya upagatassa rattibhāge vā divasabhāge vā kāyaṃ vivaritvā nisīdato anāpatti.
सुप्पटिच्छन्नसिक्खापदवण्णना निट्ठिता।
Suppaṭicchannasikkhāpadavaṇṇanā niṭṭhitā.
