| Library / Tipiṭaka / ติปิฎก • Tipiṭaka / วิมานวตฺถุปาฬิ • Vimānavatthupāḷi |
๑๑. สุนิกฺขิตฺตวิมานวตฺถุ
11. Sunikkhittavimānavatthu
๑๒๘๒.
1282.
‘‘อุจฺจมิทํ มณิถูณํ วิมานํ, สมนฺตโต ทฺวาทส โยชนานิ;
‘‘Uccamidaṃ maṇithūṇaṃ vimānaṃ, samantato dvādasa yojanāni;
กูฎาคารา สตฺตสตา อุฬารา, เวฬุริยถมฺภา รุจกตฺถตา สุภาฯ
Kūṭāgārā sattasatā uḷārā, veḷuriyathambhā rucakatthatā subhā.
๑๒๘๓.
1283.
‘‘ตตฺถจฺฉสิ ปิวสิ ขาทสิ จ, ทิพฺพา จ วีณา ปวทนฺติ วคฺคุํ;
‘‘Tatthacchasi pivasi khādasi ca, dibbā ca vīṇā pavadanti vagguṃ;
ทิพฺพา รสา กามคุเณตฺถ ปญฺจ, นาริโย จ นจฺจนฺติ สุวณฺณฉนฺนาฯ
Dibbā rasā kāmaguṇettha pañca, nāriyo ca naccanti suvaṇṇachannā.
๑๒๘๔.
1284.
‘‘เกน เตตาทิโส วโณฺณ, เกน เต อิธ มิชฺฌติ;
‘‘Kena tetādiso vaṇṇo, kena te idha mijjhati;
อุปฺปชฺชนฺติ จ เต โภคา, เย เกจิ มนโส ปิยาฯ
Uppajjanti ca te bhogā, ye keci manaso piyā.
๑๒๘๕.
1285.
‘‘ปุจฺฉามิ ‘ตํ เทว มหานุภาว, มนุสฺสภูโต กิมกาสิ ปุญฺญํ;
‘‘Pucchāmi ‘taṃ deva mahānubhāva, manussabhūto kimakāsi puññaṃ;
เกนาสิ เอวํ ชลิตานุภาโว, วโณฺณ จ เต สพฺพทิสา ปภาสตี’’ติฯ
Kenāsi evaṃ jalitānubhāvo, vaṇṇo ca te sabbadisā pabhāsatī’’ti.
๑๒๘๖.
1286.
โส เทวปุโตฺต อตฺตมโน, โมคฺคลฺลาเนน ปุจฺฉิโต;
So devaputto attamano, moggallānena pucchito;
ปญฺหํ ปุโฎฺฐ วิยากาสิ, ยสฺส กมฺมสฺสิทํ ผลํฯ
Pañhaṃ puṭṭho viyākāsi, yassa kammassidaṃ phalaṃ.
๑๒๘๗.
1287.
‘‘ทุนฺนิกฺขิตฺตํ มาลํ สุนิกฺขิปิตฺวา, ปติฎฺฐเปตฺวา สุคตสฺส ถูเป;
‘‘Dunnikkhittaṃ mālaṃ sunikkhipitvā, patiṭṭhapetvā sugatassa thūpe;
มหิทฺธิโก จมฺหิ มหานุภาโว, ทิเพฺพหิ กาเมหิ สมงฺคิภูโตฯ
Mahiddhiko camhi mahānubhāvo, dibbehi kāmehi samaṅgibhūto.
๑๒๘๘.
1288.
‘‘เตน เมตาทิโส วโณฺณ,
‘‘Tena metādiso vaṇṇo,
เตน เม อิธ มิชฺฌติ;
Tena me idha mijjhati;
อุปฺปชฺชนฺติ จ เม โภคา,
Uppajjanti ca me bhogā,
เย เกจิ มนโส ปิยาฯ
Ye keci manaso piyā.
๑๒๘๙.
1289.
‘‘อกฺขามิ เต ภิกฺขุ มหานุภาว,
‘‘Akkhāmi te bhikkhu mahānubhāva,
มนุสฺสภูโต ยมหํ อกาสิํ;
Manussabhūto yamahaṃ akāsiṃ;
เตนมฺหิ เอวํ ชลิตานุภาโว,
Tenamhi evaṃ jalitānubhāvo,
วโณฺณ จ เม สพฺพทิสา ปภาสตี’’ติฯ
Vaṇṇo ca me sabbadisā pabhāsatī’’ti.
สุนิกฺขิตฺตวิมานํ เอกาทสมํฯ
Sunikkhittavimānaṃ ekādasamaṃ.
สุนิกฺขิตฺตวโคฺค สตฺตโม นิฎฺฐิโตฯ
Sunikkhittavaggo sattamo niṭṭhito.
ตสฺสุทฺทานํ –
Tassuddānaṃ –
เทฺว ทลิทฺทา วนวิหารา, ภตโก โคปาลกณฺฑกา;
Dve daliddā vanavihārā, bhatako gopālakaṇḍakā;
อเนกวณฺณมฎฺฐกุณฺฑลี, เสรีสโก สุนิกฺขิตฺตํ;
Anekavaṇṇamaṭṭhakuṇḍalī, serīsako sunikkhittaṃ;
ปุริสานํ ตติโย วโคฺค ปวุจฺจตีติฯ
Purisānaṃ tatiyo vaggo pavuccatīti.
ภาณวารํ จตุตฺถํ นิฎฺฐิตํฯ
Bhāṇavāraṃ catutthaṃ niṭṭhitaṃ.
วิมานวตฺถุปาฬิ นิฎฺฐิตาฯ
Vimānavatthupāḷi niṭṭhitā.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / วิมานวตฺถุ-อฎฺฐกถา • Vimānavatthu-aṭṭhakathā / ๑๑. สุนิกฺขิตฺตวิมานวณฺณนา • 11. Sunikkhittavimānavaṇṇanā
