| Library / Tipiṭaka / திபிடக • Tipiṭaka / தே²ரீகா³தா²பாளி • Therīgāthāpāḷi |
4. ஸுந்த³ரீதே²ரீகா³தா²
4. Sundarītherīgāthā
313.
313.
‘‘பேதானி போ⁴தி புத்தானி, கா²த³மானா துவங் புரே;
‘‘Petāni bhoti puttāni, khādamānā tuvaṃ pure;
துவங் தி³வா ச ரத்தோ ச, அதீவ பரிதப்பஸி.
Tuvaṃ divā ca ratto ca, atīva paritappasi.
314.
314.
‘‘ஸாஜ்ஜ ஸப்³பா³னி கா²தி³த்வா, ஸதபுத்தானி 1 ப்³ராஹ்மணீ;
‘‘Sājja sabbāni khāditvā, sataputtāni 2 brāhmaṇī;
வாஸெட்டி² கேன வண்ணேன, ந பா³ள்ஹங் பரிதப்பஸி’’.
Vāseṭṭhi kena vaṇṇena, na bāḷhaṃ paritappasi’’.
315.
315.
‘‘ப³ஹூனி புத்தஸதானி, ஞாதிஸங்க⁴ஸதானி ச;
‘‘Bahūni puttasatāni, ñātisaṅghasatāni ca;
கா²தி³தானி அதீதங்ஸே, மம துய்ஹஞ்ச ப்³ராஹ்மண.
Khāditāni atītaṃse, mama tuyhañca brāhmaṇa.
316.
316.
‘‘ஸாஹங் நிஸ்ஸரணங் ஞத்வா, ஜாதியா மரணஸ்ஸ ச;
‘‘Sāhaṃ nissaraṇaṃ ñatvā, jātiyā maraṇassa ca;
ந ஸோசாமி ந ரோதா³மி, ந சாபி பரிதப்பயிங்’’.
Na socāmi na rodāmi, na cāpi paritappayiṃ’’.
317.
317.
‘‘அப்³பு⁴தங் வத வாஸெட்டி², வாசங் பா⁴ஸஸி ஏதி³ஸிங்;
‘‘Abbhutaṃ vata vāseṭṭhi, vācaṃ bhāsasi edisiṃ;
கஸ்ஸ த்வங் த⁴ம்மமஞ்ஞாய, கி³ரங் 3 பா⁴ஸஸி ஏதி³ஸிங்’’.
Kassa tvaṃ dhammamaññāya, giraṃ 4 bhāsasi edisiṃ’’.
318.
318.
‘‘ஏஸ ப்³ராஹ்மண ஸம்பு³த்³தோ⁴, நக³ரங் மிதி²லங் பதி;
‘‘Esa brāhmaṇa sambuddho, nagaraṃ mithilaṃ pati;
ஸப்³ப³து³க்க²ப்பஹானாய, த⁴ம்மங் தே³ஸேஸி பாணினங்.
Sabbadukkhappahānāya, dhammaṃ desesi pāṇinaṃ.
319.
319.
‘‘தஸ்ஸ ப்³ரஹ்மே 5 அரஹதோ, த⁴ம்மங் ஸுத்வா நிரூபதி⁴ங்;
‘‘Tassa brahme 6 arahato, dhammaṃ sutvā nirūpadhiṃ;
தத்த² விஞ்ஞாதஸத்³த⁴ம்மா, புத்தஸோகங் ப்³யபானுதி³ங்’’.
Tattha viññātasaddhammā, puttasokaṃ byapānudiṃ’’.
320.
320.
‘‘ஸோ அஹம்பி க³மிஸ்ஸாமி, நக³ரங் மிதி²லங் பதி;
‘‘So ahampi gamissāmi, nagaraṃ mithilaṃ pati;
அப்பேவ மங் ஸோ ப⁴க³வா, ஸப்³ப³து³க்கா² பமோசயே’’.
Appeva maṃ so bhagavā, sabbadukkhā pamocaye’’.
321.
321.
அத்³த³ஸ ப்³ராஹ்மணோ பு³த்³த⁴ங், விப்பமுத்தங் நிரூபதி⁴ங்;
Addasa brāhmaṇo buddhaṃ, vippamuttaṃ nirūpadhiṃ;
ஸ்வஸ்ஸ த⁴ம்மமதே³ஸேஸி, முனி து³க்க²ஸ்ஸ பாரகூ³.
Svassa dhammamadesesi, muni dukkhassa pāragū.
322.
322.
து³க்க²ங் து³க்க²ஸமுப்பாத³ங், து³க்க²ஸ்ஸ ச அதிக்கமங்;
Dukkhaṃ dukkhasamuppādaṃ, dukkhassa ca atikkamaṃ;
அரியங் சட்ட²ங்கி³கங் மக்³க³ங், து³க்கூ²பஸமகா³மினங்.
Ariyaṃ caṭṭhaṅgikaṃ maggaṃ, dukkhūpasamagāminaṃ.
323.
323.
தத்த² விஞ்ஞாதஸத்³த⁴ம்மோ, பப்³ப³ஜ்ஜங் ஸமரோசயி;
Tattha viññātasaddhammo, pabbajjaṃ samarocayi;
ஸுஜாதோ தீஹி ரத்தீஹி, திஸ்ஸோ விஜ்ஜா அப²ஸ்ஸயி.
Sujāto tīhi rattīhi, tisso vijjā aphassayi.
324.
324.
‘‘ஏஹி ஸாரதி² க³ச்சா²ஹி, ரத²ங் நிய்யாத³யாஹிமங்;
‘‘Ehi sārathi gacchāhi, rathaṃ niyyādayāhimaṃ;
ஸுஜாதோ தீஹி ரத்தீஹி, திஸ்ஸோ விஜ்ஜா அப²ஸ்ஸயி’’’.
Sujāto tīhi rattīhi, tisso vijjā aphassayi’’’.
325.
325.
ததோ ச ரத²மாதா³ய, ஸஹஸ்ஸஞ்சாபி ஸாரதி²;
Tato ca rathamādāya, sahassañcāpi sārathi;
ஆரொக்³யங் ப்³ராஹ்மணிவோச, ‘‘பப்³ப³ஜி தா³னி ப்³ராஹ்மணோ;
Ārogyaṃ brāhmaṇivoca, ‘‘pabbaji dāni brāhmaṇo;
ஸுஜாதோ தீஹி ரத்தீஹி, திஸ்ஸோ விஜ்ஜா அப²ஸ்ஸயி’’.
Sujāto tīhi rattīhi, tisso vijjā aphassayi’’.
326.
326.
‘‘ஏதஞ்சாஹங் அஸ்ஸரத²ங், ஸஹஸ்ஸஞ்சாபி ஸாரதி²;
‘‘Etañcāhaṃ assarathaṃ, sahassañcāpi sārathi;
தேவிஜ்ஜங் ப்³ராஹ்மணங் ஸுத்வா 11, புண்ணபத்தங் த³தா³மி தே’’.
Tevijjaṃ brāhmaṇaṃ sutvā 12, puṇṇapattaṃ dadāmi te’’.
327.
327.
‘‘துய்ஹேவ ஹொத்வஸ்ஸரதோ², ஸஹஸ்ஸஞ்சாபி ப்³ராஹ்மணி;
‘‘Tuyheva hotvassaratho, sahassañcāpi brāhmaṇi;
அஹம்பி பப்³ப³ஜிஸ்ஸாமி, வரபஞ்ஞஸ்ஸ ஸந்திகே’’.
Ahampi pabbajissāmi, varapaññassa santike’’.
328.
328.
‘‘ஹத்தீ² க³வஸ்ஸங் மணிகுண்ட³லஞ்ச, பீ²தஞ்சிமங் க³ஹவிப⁴வங் பஹாய;
‘‘Hatthī gavassaṃ maṇikuṇḍalañca, phītañcimaṃ gahavibhavaṃ pahāya;
பிதா பப்³ப³ஜிதோ துய்ஹங், பு⁴ஞ்ஜ போ⁴கா³னி ஸுந்த³ரி; துவங் தா³யாதி³கா குலே’’.
Pitā pabbajito tuyhaṃ, bhuñja bhogāni sundari; Tuvaṃ dāyādikā kule’’.
329.
329.
‘‘ஹத்தீ² க³வஸ்ஸங் மணிகுண்ட³லஞ்ச, ரம்மங் சிமங் க³ஹவிப⁴வங் பஹாய;
‘‘Hatthī gavassaṃ maṇikuṇḍalañca, rammaṃ cimaṃ gahavibhavaṃ pahāya;
பிதா பப்³ப³ஜிதோ மய்ஹங், புத்தஸோகேன அட்டிதோ;
Pitā pabbajito mayhaṃ, puttasokena aṭṭito;
அஹம்பி பப்³ப³ஜிஸ்ஸாமி, பா⁴துஸோகேன அட்டிதா’’.
Ahampi pabbajissāmi, bhātusokena aṭṭitā’’.
330.
330.
‘‘ஸோ தே இஜ்ஜ²து ஸங்கப்போ, யங் த்வங் பத்தே²ஸி ஸுந்த³ரீ;
‘‘So te ijjhatu saṅkappo, yaṃ tvaṃ patthesi sundarī;
உத்திட்ட²பிண்டோ³ உஞ்சோ² ச, பங்ஸுகூலஞ்ச சீவரங்;
Uttiṭṭhapiṇḍo uñcho ca, paṃsukūlañca cīvaraṃ;
ஏதானி அபி⁴ஸம்பொ⁴ந்தீ, பரலோகே அனாஸவா’’.
Etāni abhisambhontī, paraloke anāsavā’’.
331.
331.
‘‘ஸிக்க²மானாய மே அய்யே, தி³ப்³ப³சக்கு² விஸோதி⁴தங்;
‘‘Sikkhamānāya me ayye, dibbacakkhu visodhitaṃ;
புப்³பே³னிவாஸங் ஜானாமி, யத்த² மே வுஸிதங் புரே.
Pubbenivāsaṃ jānāmi, yattha me vusitaṃ pure.
332.
332.
‘‘துவங் நிஸ்ஸாய கல்யாணீ, தே²ரீ ஸங்க⁴ஸ்ஸ ஸோப⁴னே;
‘‘Tuvaṃ nissāya kalyāṇī, therī saṅghassa sobhane;
திஸ்ஸோ விஜ்ஜா அனுப்பத்தா, கதங் பு³த்³த⁴ஸ்ஸ ஸாஸனங்.
Tisso vijjā anuppattā, kataṃ buddhassa sāsanaṃ.
333.
333.
‘‘அனுஜானாஹி மே அய்யே, இச்சே² ஸாவத்தி² க³ந்தவே;
‘‘Anujānāhi me ayye, icche sāvatthi gantave;
ஸீஹனாத³ங் நதி³ஸ்ஸாமி, பு³த்³த⁴ஸெட்ட²ஸ்ஸ ஸந்திகே’’.
Sīhanādaṃ nadissāmi, buddhaseṭṭhassa santike’’.
334.
334.
‘‘பஸ்ஸ ஸுந்த³ரி ஸத்தா²ரங், ஹேமவண்ணங் ஹரித்தசங்;
‘‘Passa sundari satthāraṃ, hemavaṇṇaṃ harittacaṃ;
அத³ந்தானங் த³மேதாரங், ஸம்பு³த்³த⁴மகுதோப⁴யங்’’.
Adantānaṃ dametāraṃ, sambuddhamakutobhayaṃ’’.
335.
335.
‘‘பஸ்ஸ ஸுந்த³ரிமாயந்திங், விப்பமுத்தங் நிரூபதி⁴ங்;
‘‘Passa sundarimāyantiṃ, vippamuttaṃ nirūpadhiṃ;
வீதராக³ங் விஸங்யுத்தங், கதகிச்சமனாஸவங்.
Vītarāgaṃ visaṃyuttaṃ, katakiccamanāsavaṃ.
336.
336.
‘‘பா³ராணஸீதோ நிக்க²ம்ம, தவ ஸந்திகமாக³தா;
‘‘Bārāṇasīto nikkhamma, tava santikamāgatā;
ஸாவிகா தே மஹாவீர, பாதே³ வந்த³தி ஸுந்த³ரீ’’.
Sāvikā te mahāvīra, pāde vandati sundarī’’.
337.
337.
‘‘துவங் பு³த்³தோ⁴ துவங் ஸத்தா², துய்ஹங் தீ⁴தாம்ஹி ப்³ராஹ்மண;
‘‘Tuvaṃ buddho tuvaṃ satthā, tuyhaṃ dhītāmhi brāhmaṇa;
ஓரஸா முக²தோ ஜாதா, கதகிச்சா அனாஸவா’’.
Orasā mukhato jātā, katakiccā anāsavā’’.
338.
338.
‘‘தஸ்ஸா தே ஸ்வாக³தங் ப⁴த்³தே³, ததோ 13 தே அது³ராக³தங்;
‘‘Tassā te svāgataṃ bhadde, tato 14 te adurāgataṃ;
ஏவஞ்ஹி த³ந்தா ஆயந்தி, ஸத்து² பாதா³னி வந்தி³கா;
Evañhi dantā āyanti, satthu pādāni vandikā;
வீதராகா³ விஸங்யுத்தா, கதகிச்சா அனாஸவா’’.
Vītarāgā visaṃyuttā, katakiccā anāsavā’’.
… ஸுந்த³ரீ தே²ரீ….
… Sundarī therī….
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / தே²ரீகா³தா²-அட்ட²கதா² • Therīgāthā-aṭṭhakathā / 4. ஸுந்த³ரீதே²ரீகா³தா²வண்ணனா • 4. Sundarītherīgāthāvaṇṇanā
