| Library / Tipiṭaka / तिपिटक • Tipiṭaka / अपदानपाळि • Apadānapāḷi |
८. सुमनावेळियत्थेरअपदानं
8. Sumanāveḷiyattheraapadānaṃ
६४.
64.
‘‘वेस्सभुस्स भगवतो, लोकजेट्ठस्स तादिनो।
‘‘Vessabhussa bhagavato, lokajeṭṭhassa tādino;
सब्बे जना समागम्म, महापूजं करोन्ति ते॥
Sabbe janā samāgamma, mahāpūjaṃ karonti te.
६५.
65.
‘‘सुधाय पिण्डं कत्वान, आवेळं सुमनायहं।
‘‘Sudhāya piṇḍaṃ katvāna, āveḷaṃ sumanāyahaṃ;
सीहासनस्स पुरतो, अभिरोपेसहं तदा॥
Sīhāsanassa purato, abhiropesahaṃ tadā.
६६.
66.
‘‘सब्बे जना समागम्म, पेक्खन्ति पुप्फमुत्तमं।
‘‘Sabbe janā samāgamma, pekkhanti pupphamuttamaṃ;
केनिदं पूजितं पुप्फं, बुद्धसेट्ठस्स तादिनो॥
Kenidaṃ pūjitaṃ pupphaṃ, buddhaseṭṭhassa tādino.
६७.
67.
‘‘तेन चित्तप्पसादेन, निम्मानं उपपज्जहं।
‘‘Tena cittappasādena, nimmānaṃ upapajjahaṃ;
६८.
68.
‘‘यं यं योनुपपज्जामि, देवत्तं अथ मानुसं।
‘‘Yaṃ yaṃ yonupapajjāmi, devattaṃ atha mānusaṃ;
सब्बेसानं पियो होमि, पुप्फपूजायिदं फलं॥
Sabbesānaṃ piyo homi, pupphapūjāyidaṃ phalaṃ.
६९.
69.
‘‘नाभिजानामि कायेन, वाचाय उद चेतसा।
‘‘Nābhijānāmi kāyena, vācāya uda cetasā;
संयतानं तपस्सीनं, कतं अक्कोसितं मया॥
Saṃyatānaṃ tapassīnaṃ, kataṃ akkositaṃ mayā.
७०.
70.
‘‘तेन सुचरितेनाहं, चित्तस्स पणिधीहि च।
‘‘Tena sucaritenāhaṃ, cittassa paṇidhīhi ca;
सब्बेसं पूजितो होमि, अनक्कोसस्सिदं फलं॥
Sabbesaṃ pūjito homi, anakkosassidaṃ phalaṃ.
७१.
71.
‘‘इतो एकादसे कप्पे, सहस्सारोसि खत्तियो।
‘‘Ito ekādase kappe, sahassārosi khattiyo;
सत्तरतनसम्पन्नो, चक्कवत्ती महब्बलो॥
Sattaratanasampanno, cakkavattī mahabbalo.
७२.
72.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा सुमनावेळियो थेरो इमा गाथायो अभासित्थाति।
Itthaṃ sudaṃ āyasmā sumanāveḷiyo thero imā gāthāyo abhāsitthāti.
सुमनावेळियत्थेरस्सापदानं अट्ठमं।
Sumanāveḷiyattherassāpadānaṃ aṭṭhamaṃ.
Footnotes:
