| Library / Tipiṭaka / ತಿಪಿಟಕ • Tipiṭaka / ಥೇರೀಗಾಥಾ-ಅಟ್ಠಕಥಾ • Therīgāthā-aṭṭhakathā |
೧೪. ಸುಮನಾಥೇರೀಗಾಥಾವಣ್ಣನಾ
14. Sumanātherīgāthāvaṇṇanā
ಧಾತುಯೋ ದುಕ್ಖತೋ ದಿಸ್ವಾತಿ ಸುಮನಾಯ ಥೇರಿಯಾ ಗಾಥಾ। ತಸ್ಸಾ ವತ್ಥು ತಿಸ್ಸಾಥೇರಿಯಾ ವತ್ಥುಸದಿಸಂ। ಇಮಿಸ್ಸಾಪಿ ಹಿ ಸತ್ಥಾ ಓಭಾಸಂ ವಿಸ್ಸಜ್ಜೇತ್ವಾ ಪುರತೋ ನಿಸಿನ್ನೋ ವಿಯ ಅತ್ತಾನಂ ದಸ್ಸೇತ್ವಾ –
Dhātuyodukkhato disvāti sumanāya theriyā gāthā. Tassā vatthu tissātheriyā vatthusadisaṃ. Imissāpi hi satthā obhāsaṃ vissajjetvā purato nisinno viya attānaṃ dassetvā –
೧೪.
14.
‘‘ಧಾತುಯೋ ದುಕ್ಖತೋ ದಿಸ್ವಾ, ಮಾ ಜಾತಿಂ ಪುನರಾಗಮಿ।
‘‘Dhātuyo dukkhato disvā, mā jātiṃ punarāgami;
ಭವೇ ಛನ್ದಂ ವಿರಾಜೇತ್ವಾ, ಉಪಸನ್ತಾ ಚರಿಸ್ಸಸೀ’’ತಿ॥ –
Bhave chandaṃ virājetvā, upasantā carissasī’’ti. –
ಇಮಂ ಗಾಥಮಾಹ। ಸಾ ಗಾಥಾಪರಿಯೋಸಾನೇ ಅರಹತ್ತಂ ಪಾಪುಣಿ ।
Imaṃ gāthamāha. Sā gāthāpariyosāne arahattaṃ pāpuṇi .
ತತ್ಥ ಧಾತುಯೋ ದುಕ್ಖತೋ ದಿಸ್ವಾತಿ ಸಸನ್ತತಿಪರಿಯಾಪನ್ನಾ ಚಕ್ಖಾದಿಧಾತುಯೋ ಇತರಾಪಿ ಚ ಉದಯಬ್ಬಯಪಟಿಪೀಳನಾದಿನಾ ‘‘ದುಕ್ಖಾ’’ತಿ ಞಾಣಚಕ್ಖುನಾ ದಿಸ್ವಾ। ಮಾ ಜಾತಿಂ ಪುನರಾಗಮೀತಿ ಪುನ ಜಾತಿಂ ಆಯತಿಂ ಪುನಬ್ಭವಂ ಮಾ ಉಪಗಚ್ಛಿ । ಭವೇ ಛನ್ದಂ ವಿರಾಜೇತ್ವಾತಿ ಕಾಮಭವಾದಿಕೇ ಸಬ್ಬಸ್ಮಿಂ ಭವೇ ತಣ್ಹಾಛನ್ದಂ ವಿರಾಗಸಙ್ಖಾತೇನ ಮಗ್ಗೇನ ಪಜಹಿತ್ವಾ। ಉಪಸನ್ತಾ ಚರಿಸ್ಸಸೀತಿ ಸಬ್ಬಸೋ ಪಹೀನಕಿಲೇಸತಾಯ ನಿಬ್ಬುತಾ ವಿಹರಿಸ್ಸಸಿ।
Tattha dhātuyo dukkhato disvāti sasantatipariyāpannā cakkhādidhātuyo itarāpi ca udayabbayapaṭipīḷanādinā ‘‘dukkhā’’ti ñāṇacakkhunā disvā. Mā jātiṃ punarāgamīti puna jātiṃ āyatiṃ punabbhavaṃ mā upagacchi . Bhave chandaṃ virājetvāti kāmabhavādike sabbasmiṃ bhave taṇhāchandaṃ virāgasaṅkhātena maggena pajahitvā. Upasantā carissasīti sabbaso pahīnakilesatāya nibbutā viharissasi.
ಏತ್ಥ ಚ ‘‘ಧಾತುಯೋ ದುಕ್ಖತೋ ದಿಸ್ವಾ’’ತಿ ಇಮಿನಾ ದುಕ್ಖಾನುಪಸ್ಸನಾಮುಖೇನ ವಿಪಸ್ಸನಾ ದಸ್ಸಿತಾ। ‘‘ಭವೇ ಛನ್ದಂ ವಿರಾಜೇತ್ವಾ’’ತಿ ಇಮಿನಾ ಮಗ್ಗೋ, ‘‘ಉಪಸನ್ತಾ ಚರಿಸ್ಸಸೀ’’ತಿ ಇಮಿನಾ ಸಉಪಾದಿಸೇಸಾ ನಿಬ್ಬಾನಧಾತು, ‘‘ಮಾ ಜಾತಿಂ ಪುನರಾಗಮೀ’’ತಿ ಇಮಿನಾ ಅನುಪಾದಿಸೇಸಾ ನಿಬ್ಬಾನಧಾತು ದಸ್ಸಿತಾತಿ ದಟ್ಠಬ್ಬಂ।
Ettha ca ‘‘dhātuyo dukkhato disvā’’ti iminā dukkhānupassanāmukhena vipassanā dassitā. ‘‘Bhave chandaṃ virājetvā’’ti iminā maggo, ‘‘upasantā carissasī’’ti iminā saupādisesā nibbānadhātu, ‘‘mā jātiṃ punarāgamī’’ti iminā anupādisesā nibbānadhātu dassitāti daṭṭhabbaṃ.
ಸುಮನಾಥೇರೀಗಾಥಾವಣ್ಣನಾ ನಿಟ್ಠಿತಾ।
Sumanātherīgāthāvaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಥೇರೀಗಾಥಾಪಾಳಿ • Therīgāthāpāḷi / ೧೪.ಸುಮನಾಥೇರೀಗಾಥಾ • 14.Sumanātherīgāthā
